ការលួចចម្លងស្នាដៃសិល្បៈពីបរទេស មានទោសទណ្ឌទេ?

2017-08-15 03:54:23
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងរ៉ាវនៃការលួចបទចម្រៀងវៀតណាម "I'm Sorry Babe” កំពុងជារឿងរ៉ាវក្តៅគគុកលើបណ្តាញសង្គមប៉ុន្មានថ្ងៃនេះ។ ទន្ទឹមនឹងការរិះគន់លួចចម្លងស្នាដែរបស់ខ្លួន អ្នកនិពន្ធវៀតណាម លោក Bao Thach ថែមទាំងព្រលយពាក្យថា ទោះបីជាបទលោកត្រូវគេចម្លងក៏ដោយ តែលោកក៏គ្មានដំណោះស្រាយដែរ ព្រោះកម្ពុជាមិនទាន់ចូលជាសមាជិកសមាគមការពារកម្មសិទ្ធិបញ្ញាបទចម្រៀង។

ឆ្លើយតបទៅនឹងការឡើងលើករបស់អ្នកនិពន្ធវៀតណាមរូបនេះ លោក ស៊ិន សារ៉ាឌី ប្រធាននាយកដ្ឋាន សិទ្ធិអ្នកនិពន្ធ និងសិទ្ធិប្រហាក់ប្រហែល នៃក្រសួងវប្បធម៌ និងវិចិត្រសិល្បៈ ថា ជាការពិតប្រទេសកម្ពុជា មិនទាន់បានចូលជាសមាជិកអនុសញ្ញាទីក្រុងប៊ែន ស្តីពីស្នាដៃអក្សរសាស្ត្រ និងសិល្បៈ (Berne Convention) នៅឡើយ។ លោកថា ក្នុងចំណោមប្រទេសជាសមាជិកអាស៊ាន មានតែកម្ពុជា និងមីយ៉ាន់ម៉ាទេ ដែលមិនទាន់បានចូលជាសមាជិក ខណៈវៀតណាមបានចូលជាសមាជិកអនុសញ្ញានេះតាំងពីឆ្នាំ២០០៤។

ចំពោះមូលហេតុដែលប្រទេសកម្ពុជាមិនទាន់បានចូលជាសមាជិកអនុសញ្ញាទីក្រុងប៊ែន នេះ ប្រធាននាយកដ្ឋានដដែលអះអាងថា មកការយល់ដឹងពីកម្មសិទ្ធិបញ្ញារបស់ពលរដ្ឋនៅមានកម្រិត «យើងមិនមែនគេចវេះនោះទេ តែយើងគិតផលប្រយោជន៍ជាតិជាធំ ហើយបច្ចុប្បន្នក្រសួងកំពុងសិក្សាពីផលប្រយោជន៍ និងផលប៉ះពាល់នៃអនុសញ្ញានេះ»។

លោក ស៊ិន សារ៉ាឌី បានបន្តថា បច្ចុប្បន្នយើងនៅប្រើស្នាដៃបរទេសច្រើន មិនថា ថៃ វៀតណាម អាមេរិក អង់គ្លេស នោះទេ ចង់មិនចង់ប្រសិនបើយើងចូលជាសមាជិកក្នុងពេលនេះជួបផលលំបាកច្រើន ព្រោះអនុសញ្ញានេះឲ្យតែយើងធ្វីខុស ឬលួចចម្លងស្នាដៃរបស់គេ គេនឹងប្តឹង។

ក្នុងន័យចូលរួមលើកកម្ពស់ឲ្យមានការបង្កើតស្នាដៃថ្មី និងបញ្ជ្រាបការយល់ដឹងពីកម្មសិទ្ធិបញ្ញា កន្លងមកក្រសួងតែងតែបើកវគ្គបណ្តុះបណ្តាលផ្សេងៗ ដោយអញ្ជើញមន្រ្តី ស្ថាប័នពាក់ព័ន្ធចូលរួមសិក្សាស្វែងយល់ ពិសេសខាងផលិតកម្ម។ លោកថា ការខកខាន ឬមិនយកចិត្តទុកដាក់ចំពោះបញ្ហាខាងលើ គឺជាមូលហេតុដែលអ្នកនិពន្ធមួយចំនួន នៅតែបន្តលួចចម្លងស្នាដៃបរទេស ដោយពុំុំមានសុំអនុញ្ញាតពីម្ចាស់ដើម។

បើតាមលោក ស៊ិន សារ៉ាឌី ឱសានវាទនៃការចូលរួមជាសមាជិកអនុសញ្ញានេះរបស់កម្ពុជា គឺឆ្នាំ២០២១ ខាងមុខ នេះ។

អត្ថបទ៖ ដេត ធន្នី