រៀនចប់បរិញ្ញា បែកគំនិតបង្កើតសួនសត្វទន្សាយ រកចំណូលកប់ក្ដោង

2017-08-14 23:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្រលាញ់សត្វចិញ្ចឹមជនជាតិម៉ាឡេស៊ីម្នាក់ កំពុងទទួលបានជោគជ័យជំនួញថ្មី ក្រោយបើកសួនសត្វទន្សាយដោយអាចរកចំណូលបានច្រើនមិននឹកស្មាន ខណៈទើបបញ្ចប់ការសិក្សា។

លោក Jubair Juhinin

លោកJubair Juhinin អាយុ ២៧ឆ្នាំបានបញ្ចប់ការសិក្សាផ្នែកវិទ្យាសាស្ត្រជលផល ពីសាកលវិទ្យាល័យ University of Sabah (UMS) ប្រទេសម៉ាឡេស៊ី និងមិនដែលគិតថា ចំណង់ចំណូលចិត្តចិញ្ចឹមសត្វទន្សាយរបស់ខ្លួនអាចប្រែក្លាយជាជំនួញចំណេញប្រាក់ច្រើនដូច្នេះឡើយ។

តាមសារព័ត៌មានក្នុងស្រុក Bernama រៀបរាប់ថា ជំនួញរបស់លោក Jubair ស្ថិតនៅសង្កាត់ Kampung Purakagis ទីក្រុងRanau រដ្ឋ Sabah អាចរកចំណូលប្រមាណ ៣០ម៉ឺនរីងហ្គីត ឬប្រមាណ ៦៩ ៨០០ដុល្លារអាមេរិកក្នុងមួយឆ្នាំ តាមរយៈការលក់សំបុត្រចូលទៅលេង។

បើតាមប្រភព គាត់បានចាប់ផ្ដើមជាមួយដើមទុនប្រមាណ ១ ១០០ដុល្លារប៉ុណ្ណោះក្នុងការទិញសម្ភារៈផ្សេងៗ និងការតុបតែងលម្អ ខណៈមានដីស្រាប់។ សួនសត្វរបស់គាត់មានឈ្មោះថា ភូមិ Arnab ឬ Arnab Village ដោយមានហាងលក់វត្ថុអនុស្សាវរីយមួយផង។

សួនខាងលើមានទន្សាយចំនួន ៨ប្រភេទដូចជា New Zealand White, Standard Rex, Mini Satin, Lion Head, Netherland Dwarf, Lop Ear, Anggora និងប្រភេទក្នុងស្រុកមួយទៀត។ ទន្សាយប្រមាណជាង ៤០០ក្បាល ត្រូវបានលែងឲ្យទៅស្វាគមន៍ភ្ញៀវក្នុងបរិវេណរបង ដើម្បីឲ្យគេងាយថតរូប ថតវីដេអូជាមួយពួកវា។

លោក Jubair មានគម្រោងបន្ថែមសត្វទន្សាយឲ្យបានចំនួន ១ ០០០ក្បាលនៅឆ្នាំក្រោយ។ ចំពោះតម្លៃសំបុត្រចូលទស្សនាសួនសត្វ Arnab Village គឺម្នាក់ ៥រីងហ្គីត (១,២ដុល្លារ) និងជនបរទេស ១០រីងហ្គីត (២,៣ដុល្លារ)៕