ប្រណាំងកង់កម្ពុជានឹងជាឧបសគ្គធំសម្រាប់ប្រទេសផ្សេងយកមេដាយ

2017-08-18 02:04:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមប្រណាំងកង់ជម្រើសជាតិកម្ពុជានឹងមិនមែនជាសាច់ជ្រូក៣ជាន់ដែលបណ្ដោយឲ្យក្រុមកីឡាប្រណាំងកង់ប្រទេសផ្សេងៗយកមេដាយបានដោយងាយនោះទេក្នុងព្រឹត្តិការណ៍កីឡាស៊ីហ្គេមនាពេលខាងមុខនេះ។ នេះបើតាមការវិភាគរបស់គ្រូបង្វឹកកម្ពុជា កីឡាករ និងកីឡាការិនីដែលបានហ្វឹកហាត់ខ្លាំងបំផុត។

លោក អេង លីន

លោក អេង លីន គ្រូជំនួយប្រណាំងទោចក្រយានកម្ពុជាបាននិយាយថា បន្ទាប់ពីហ្វឹកហាត់អស់រយៈពេលជាច្រើនខែកន្លងមក លោកអាចប្រៀបធៀបកម្រិតសមត្ថភាពរបស់ក្រុមប្រណាំងកង់កម្ពុជានឹងបណ្តាលប្រទេសផ្សេងៗនៅអាស៊ានគឺប្រហាក់ប្រហែលគ្នា ដូច្នេះក្រុមកម្ពុជាអាចលេងជាមួយគេបាន។ «ខ្ញុំជឿជាក់ថា យើង ទោះបីជាយើងចាញ់គេមែន ប៉ុន្តែមិនមែនចាញ់រហូតដូចកាលពីពីរឆ្នាំមុនទេ។ យើងអាចមានឱកាសប្រដុំប្រសងជាមួយគេបាន ជាពិសេសយើងអាចមានឱកាសឈានដល់លក្ខណមួយដែលយើងអាចដណ្តើមយកជ័យជម្នះបាន»។ ចំពោះកីឡាករ យឿង ភីយុទ្ធ ដែលលេចធ្លោជាងគេក្នុងចំណោមកីឡាករប្រណាំងកង់កម្ពុជាបានលើកឡើងថា ស៊ីហ្គេមលើកមុនកម្ពុជាធ្វើមិនបានល្អទេ ប៉ុន្តែឆ្នាំនេះកម្ពុជាមានសង្ឃឹមច្រើន។ ឆ្នាំក្រុមកម្ពុជាហ្វឹកហាត់ដិតដល់ គ្រូបង្វឹកល្អ និងសម្ភារៈហ្វឹកហាត់គ្រប់គ្រាន់។

កីឡាករ យឿង ភីយុទ្ធ

ទោះបីជាយ៉ាងណា អ្នកស្រី ហេង ស៊ីវឡាង កីឡាការិនីប្រណាំងទោចក្រយានកម្ពុជាបាននិយាយថា ពេលហ្វឹកហាត់រយៈពេលប៉ុន្មានខែកន្លងទៅនេះមិនគ្រប់គ្រាន់ឡើយ។ កីឡាប្រណាំងកង់គួរហ្វឹកហាត់ឲ្យបានទៀតទាត់ និងរាប់ឆ្នាំទើបកាន់តែប្រសើរ។ អ្វីដែលពិសេសសម្រាប់កីឡាការិនីប្រណាំងកង់កម្ពុជាគឺហ្វឹកហាត់ជាមួយបុរសៗរាល់ថ្ងៃ ដូច្នេះកីឡាការិនីរូបនេះគិតថា កីឡាការិនីប្រទេសផ្សេងៗនឹងមិនខ្លាំងលើកីឡាការិនីកម្ពុជាប៉ុន្មានឡើយ។

កីឡាករ ហេង ស៊ីវឡាង

វិញ្ញាសាកង់នារីតម្រូវឲ្យប្រទេសនីមួយៗមានកីឡាការិនីពីរនាក់ ដូច្នេះកីឡាការិនី ហេង ស៊ីវឡាង នឹងចាប់ដៃជាមួយបងស្រី ហេង ស៊ីវហ្គិច។ ចំពោះវិញ្ញាសាកង់បុរសតម្រូវឲ្យប្រទេសនីមួយៗមានកីឡាករ៥នាក់ ដូច្នេះកម្ពុជាកីឡាករ យឿង ភីយុទ្ធ, កែវ រដ្ឋា, ភួង សុភី, ញ៉ុញ លេញ និង គីម សាន ដែលត្រូវប្រកួតជាក្រុមលើពីរវិញ្ញាសា៕