ខោអាវរាប់រយកំប្លេរក្សាទុកជិត២០ឆ្នាំរបស់ ខាត់ សុឃីម បានចែកជូនសិល្បការិនីខ្វះខាត

2017-08-18 07:16:11
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកមិញនេះតារាពហុជំនាញអ្នកនាង ខាត់ សុឃីម បានចែកសំលៀកបំពាក់មួយទឹករបស់ខ្លួនដល់សិល្បការិនីមួយចំនួនដែលខ្វះខាតនៅសម្អាងការ ខាត់ សុឃីម ម្ដុំផ្សារដេប៉ូ។

អ្នកនាង ខាត់ សុឃីម បានប្រាប់ Sabay ថា នេះគឺជាលើកទី១ហើយដែលខ្លួនបានប្រមូលសំលៀកបំពាក់ ស្លៀកបាន១ដង ឬ២ដងតែប៉ុណ្ណោះយកទៅបោកទឹកទុកឲ្យស្អាតហើយយកមកចែកជូន សិល្បការិនីដែលខ្វះខាតពុំមានលទ្ធភាពទិញសំលៀកបំពាក់ទុកសម្រាប់ផ្លាស់ប្ដូរ ពេលឡើងឆាកម្ដង។

“បងចែកសំលៀកបំពាក់ទៅពួកគាត់នៅថ្ងៃនេះ មានទាំងហូលផាមួង រ៉ូបព្រមទាំងសម័យផងដែរ។ ក្នុង១នាក់គាត់ទទួលបាន ២ កំប្លេ ឬ ៣កំប្លេ សំលៀកបំពាក់ទាំងអស់ហ្នឹងខ្ញុំរក្សាវាទុកតាំងពីឆ្នាំ ២០០១ ២០០២ រហូតដល់ឆ្នាំ២០១៧ សរុបទៅច្រើនកំប្លេណាស់អូនតែថ្ងៃនេះបងយកមកជូនពួកគាត់ជាង ៣០០ កំប្លេប៉ុណ្ណឹងឯង"។ អ្នកនាង ខាត់ សុឃីម រៀបរាប់។

ចំណែកឯសំលៀកបំពាក់ចូលសិល្បៈក្នុងអំឡុង ១៩៩៦ ដល់ ១៩៩៩ ក៏មាននៅសល់ដែរ ថែមទាំងថ្មីទៀតតែមិនបានយកមកចែកជូននោះទេ។ សិល្បការិនីដែលមកទទួលសំលៀកបំពាក់របស់ អ្នកនាង ខាត់ ឃីម ថ្ងៃនេះភាគច្រើនជាសិល្បការិនីមកពី រាជធានីភ្នំពេញ ខេត្តស្វាយរៀង ព្រៃវែង ខេត្តកណ្ដាល កំពង់ចាម កំពង់ឆ្នាំង និងកំពុងស្ពឺ៕