ព្រះអង្គម្ចាស់ប្រធានស៊ីហ្គេមសរសើរកម្ពុជារឿងត្រៀមខ្លួនស៊ីហ្គេម២០២៣
- 2017-08-18 07:13:47
- ចំនួនមតិ 0 | ចំនួនចែករំលែក 0
ព្រះអង្គម្ចាស់ប្រធានស៊ីហ្គេមសរសើរកម្ពុជារឿងត្រៀមខ្លួនស៊ីហ្គេម២០២៣
ចន្លោះមិនឃើញ
ប្រមុខដឹកនាំក្រុមប្រឹក្សាកីឡាអាស៊ីអាគ្នេយ៍ និងជាប្រធានក្រុមប្រឹក្សាអូឡាំពិកម៉ាឡេស៊ីបានកោតសរសើរប្រទេសកម្ពុជាដែលបានកំពុងរៀបចំខ្លួនយ៉ាងល្អដើម្បីឈានឆ្ពោះទៅរៀបចំធ្វើម្ចាស់ផ្ទះព្រឹត្តិការណ៍កីឡាអាស៊ីអាគ្នេយ៍ (ស៊ីហ្គេម)ឆ្នាំ២០២៣។
តាមការឲ្យដឹងពីគណៈកម្មាធិការជាតិអូឡាំពិកកម្ពុជាថា ព្រះអង្គម្ចាស់ Tunku Tan Sri Imran ប្រធានក្រុមប្រឹក្សាកីឡាអាស៊ីអាគ្នេយ៍ និងជាប្រធានក្រុមប្រឹក្សាអូឡាំពិកម៉ាឡេស៊ីបានកោតសរសើរពី វឌ្ឍនភាពនៃដំណើរការឆ្ពោះទៅធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣នៅកម្ពុជា។
ការកោតសរសើរនេះបានកើតមានឡើងនៅពេល ព្រះអង្គម្ចាស់ Tunku Tan Sri Imran បានចូលរួមជាអធិបតីក្នុងកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ នៅទីក្រុងកូឡាឡាំពួរ ប្រទេសម៉ាឡេស៊ីនាព្រឹកថ្ងៃទី១៨ ខែសីហានេះ។ ក្នុងកិច្ចប្រជុំនេះគណៈប្រតិភូកម្ពុជាដឹកនាំដោយ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា អមដោយ ឯកឧត្តម វ៉ាត់ ចំរើន អគ្គលេខាធិការ NOCC។
ឆ្លើយតបនឹងការកោតសរសើរពីប្រមុខដឹកនាំ ក្រុមប្រឹក្សាកីឡាអាស៊ីអាគ្នេយ៍ ឯកឧត្តម ថោង ខុន បានជម្រាបជូនអង្គប្រជុំថា រាជរដ្ឋាភិបាលកម្ពុជាបានគាំទ្រយ៉ាងពេញទំហឹងក្នុងការអភិវឌ្ឍហេដ្ឋារចនាសម្ព័ន្ធកីឡាគឺ ពហុកីឡដ្ឋានមរតកតេជោ និងហេដ្ឋារចនាសម្ព័ន្ធទ្រទ្រង់នានា ដែលបានបញ្ចប់ការសាងសង់ក្នុងដំណាក់កាលទី១រួចហើយ និងបានចាប់ផ្តើមការសាងសង់ក្នុងដំណាក់កាលទី២បន្តទៀត ពិសេស ការសាងសង់ កីឡដ្ឋានធំ(Main Stadium) ដែលអាចដាក់មនុស្ស៥៥០០០នាក់ក្រោមជំនួយឥតសំណង របស់រដ្ឋាភិបាល នៃសាធារណរដ្ឋប្រជាមានិតចិនដែលសំណង់នេះនឹងអាចបញ្ចប់នៅចុងឆ្នាំ២០២០ ឬ នៅដើមឆ្នាំ២០២១។
ក្នុងកិច្ចប្រជុំនេះដែរ គណៈកម្មាធិការអូឡាំពិកហ្វីលីពីន និងវៀតណាម បានបញ្ជាក់ពីការត្រៀមធ្វើម្ចាស់ផ្ទះព្រឹត្តិការណ៍កីឡាស៊ីហ្គេមលើកទី៣០ ឆ្នាំ២០១៩និងលើកទី៣១ ឆ្នាំ២០២១ ដែលបន្ទាប់ពីព្រឹត្តិការណ៍ទាំងពីរនេះ គឺកម្ពុជាជាម្ចាស់ផ្ទះក្នុងឆ្នាំ២០២៣៕