ចាន់ រតនា សង្ឃឹមបាន៣ពិន្ទុបន្ថែម តែសន្លប់ដូចមុនឬអត់មិនហ៊ាននិយាយមុន
- 2017-08-18 23:12:00
- ចំនួនមតិ 0 | ចំនួនចែករំលែក 0
ចាន់ រតនា សង្ឃឹមបាន៣ពិន្ទុបន្ថែម តែសន្លប់ដូចមុនឬអត់មិនហ៊ាននិយាយមុន
ចន្លោះមិនឃើញ
អ្នកប្រដាល់កំពុងសាងកេរ្តិ៍ឈ្មោះជាថ្មីក្នុងវិស័យប្រដាល់គុនខ្មែរ ចាន់ រតនា ថាការជួបជាមួយអ្នកប្រដាល់ថៃ Kaopong Chaiyapum លើកទី២នេះ គេមិនហ៊ាននិយាយថាសន្លប់ដូចលើកទី១ឬទេ គ្រាន់តែដឹងថា នឹងបាន៣ពិន្ទុបន្ថែមទៀត។
ចាន់ រតនា ឲ្យដឹងមុននេះថា ការប៉ះដៃគូចាស់ Kaopong Chaiyapum មិនអាចហើយមើលស្រាលកីឡាករថៃរូបនេះឡើយ ព្រោះធ្លាប់ជួបគ្នាម្ដងហើយដូច្នេះគឺដឹងក្បាច់គ្នារៀងៗខ្លួន ច្បាស់ណាស់ម្នាក់ៗ ប្រកួតប្រយ័ត្នប្រយែងជាងមុនទៀត។ ប៉ុន្តែ រតនា នៅតែសង្ឃឹមថា នឹងទទួលបាន ៣ពិន្ទុ បន្ថែមទៀត សម្រាប់ការប្រកួតវិលជុំសន្សំពិន្ទុ ខ្សែក្រវាត់ស្រាបៀ លីអូ។
ជើងខ្លាំងរបស់កម្ពុជាខាងលើបន្ថែមទៀតថា ការជួបគ្នាលើកទី២ នេះ ខ្លួនមិនសូវបារម្ភនោះទេ ព្រោះបានដឹងពីដៃគូម្ដងហើយ ចំណុចល្អរបស់អ្នកប្រដាល់ថៃនេះ មានកាវដៃល្អ ធ្ងន់ និងពូកែទាត់ជើងក្រោម។ បើនិយាយពីការហ្វឹកហាត់ត្រៀមការប្រកួតនោះ រតនា ប្រាប់ថាខំប្រឹងហ្វឹកហាត់ដូចសព្វមួយដង ទោះជាខ្លួនមាន ៦ពិន្ទុក្នុងដៃក៏ដោយ ហើយសម្រាប់ការប្រកួតនៅល្ងាចថ្ងៃអាទិត្យនេះ គេសង្ឃឹមថានឹងធ្វើបានល្អថែទៀត ដើម្បីបានឱកាសឡើងទៅវគ្គពាក់កណ្ដាលផ្ដាច់ព្រ័ត្រ។
ចាន់ រតនា ជាបេក្ខភាពម្នាក់ក្នុងចំណោមកីឡាករកម្ពុជា ៤រូប ដែលត្រូវប្រកួតដណ្ដើមខ្សែក្រវាត់ស្រាបៀ លីអូ ហើយបច្ចុប្បន្ននេះគេមាន ៦ពិន្ទុក្នុងដៃ ក្រោយប្រកួត២ដង ឈ្នះទាំង២ដង។ ការប៉ះគ្នាជាមួយ Chaiyapum លើកនេះជាលើកទី២ហើយ ខណៈលើកទី១ នោះ កីឡាករថៃម្នាក់នេះចាញ់ដោយសន្លប់ក្នុងទឹកទី៣ ម្ដងហើយ នាជំនួបមិត្តភាពអន្តរជាតិនៅសង្វៀន គូបូតា កាលពីចុងខែមិថុនា៕