បុគ្គលិកនារីដើមកំណើតអាស៊ីម្នាក់ លាឈប់ពី Google ព្រោះរើសអើងពេក

2017-08-21 08:18:10
ចំនួនមតិ 0 | ចំនួនចែករំលែក 0

ចន្លោះមិនឃើញ

បុគ្គលិកនារីម្នាក់នៅក្រុមហ៊ុន Google មានដើមកំណើតនៅតំបន់អាស៊ី បានដាក់ពាក្យលាឈប់ធ្វើការ ដោយបាននិយាយថាក្រុមហ៊ុននេះមានការរើសអើងពូជសាសន៍ និងយេនឌ័រ។

ស្ត្រីខាងលើឈ្មោះ Qichen Zhang អតីតបុគ្គលិក Google និយាយថានាងស្ទើរតែមិនជឿនឹងត្រចៀក នៅពេលមិត្តរួមការងាររបស់នាង ដែលជាបុរសស្បែកស បាននិយាយចំអន់នាងថា "វាងាយស្រួលសម្រាប់អ្នកក្នុងការទទួលបានការងារ ព្រោះអ្នកគឺជាស្ត្រីជនជាតិអាស៊ី ដែលគេគិតថាអ្នកពូកែគណិតវិទ្យា"។

Zhang វ័យ២៧ឆ្នាំ មានអារម្មណ៍ឯកោក្នុងនាមជាមនុស្សស្រីធ្វើការឲ្យក្រុមហ៊ុនយក្សផ្នែកបច្ចេកវិទ្យា។ ប៉ុន្មានខែក្រោយមកនាងយល់ថានៅជាមួយ Google គ្មានអនាគតទេ ហើយនាងក៏បានលាឈប់។ នាងបានប្រាប់សារព័ត៌មានរបស់អង់គ្លេស The Guardian។

Qichen Zhang

មិនមានស្ត្រីច្រើនទេមានតួនាទីធំ ឬថ្នាក់ប្រតិបត្តិនៅក្រុមហ៊ុនមួយនេះ ជាពិសេសនារីអាស៊ី និង ស្បែកខ្មៅ ដោយសារវប្បធម៌មិនលើកទឹកចិត្តមនុស្សស្រីនៅក្រុមហ៊ុន Google នេះហើយ ដែលធ្វើឲ្យនាងសម្រេចចិត្តចាកចេញ Zhang បន្ថែម។

នៅ Google បុគ្គលិកបុរស ៨០% ហើយ ៧៥% នៃពួកគេកាន់តួនាទីជាអ្នកដឹកនាំ។ សរុបមក បុគ្គលិកស្បែកខ្មៅមានតែ ២% អាម៉េរិកាំងដើមកំណើតអេស្ប៉ាញ ៤% ជនជាតិអាស៊ី ៣៥% និងច្រើនជាងគេជនជាតិស្បែកស ៥៦% ។

អតីតបុគ្គលិកម្នាក់ទៀតបាននិយាយថានាងជាស្ត្រីស្បែកខ្មៅតែម្នាក់គត់នៅក្នុងក្រុមរបស់នាង ហើយនាងតែងត្រូវបានគេឲ្យបង្ហាញកាតសម្គាល់ខ្លួននៅពេលនាងដើរក្នុងបរិវេណក្រុមហ៊ុន Google រីឯបុគ្គលិកដទៃទៀតមិនមែនជនជាតិស្បែកខ្មៅ មិនត្រូវបានគេសួរនាំឡើយ។

បុគ្គលិកជាស្ត្រីជាង ៦០ នាក់របស់ Google កាលពីដើមខែនេះគ្រោងនឹងដាក់ពាក្យបណ្ដឹងក្រុមហ៊ុនពីបញ្ហារើសអើងយេនឌ័រ និងវិសមភាពប្រាក់ខែនៅក្រុមហ៊ុន។ ជុំវិញបញ្ហានេះ នាយកដ្ឋានការងាររបស់អាមេរិក ក៏បានចោទប្រកាន់ Google ថាផ្ដល់ប្រាក់ខែឲ្យបុគ្គលិកស្ត្រី តិចជាងបុរសសម្រាប់ការងារប្រហាក់ប្រហែលគ្នា ដែលនេះវាផ្ទុយនឹងច្បាប់ការងារអាមេរិក ខណៈដែល Google បានបដិសេធយ៉ាងដាច់អហង្ការចំពោះការចោទប្រកាន់នេះ៕

ទទួលបានព័ត៌មានថ្មីៗ គន្លឹះមានប្រយោជន៍រួមទាំងចំណេះដឹងផ្សេងៗពីបច្ចេកវិទ្យា កុំភ្លេចចុច Like Page Sabay News Technology...

ចុចអានបន្ត ៖

ប្រភព៖ theguardian ប្រែសម្រួល ៖ សុខ លាងហ៊ត