មកស្គាល់សាកលវិទ្យាល័យរដ្ឋល្បីៗបំផុតនៅភ្នំពេញ និស្សិតប្រាថ្នាចង់រៀនគ្រប់ជំនាន់
- 2017-08-24 08:36:23
- ចំនួនមតិ 0 | ចំនួនចែករំលែក 0
មកស្គាល់សាកលវិទ្យាល័យរដ្ឋល្បីៗបំផុតនៅភ្នំពេញ និស្សិតប្រាថ្នាចង់រៀនគ្រប់ជំនាន់
ចន្លោះមិនឃើញ
ជំហានបន្ទាប់ ក្រោយបញ្ចប់ការប្រឡងមធ្យមសិក្សាទុតិយភូមិដោយជោគជ័យ គឺការជ្រើសរើសសាកលវិទ្យាល័យដើម្បីសិក្សាបន្ត។ នៅថ្ងៃនេះ Sabay សូមលើកយកនូវគ្រឹះស្ថានឧត្ដមសិក្សាសាធារណៈមានវ័យចំណាស់ និងល្បីៗបំផុតនៅរាជធានីភ្នំពេញ ដែលសិស្សតែងប្រាថ្នាចង់ទៅសិក្សា។ ខាងក្រោមនេះជាសាកលវិទ្យាល័យសាធារណៈកំពូលៗនៅភ្នំពេញ៖
១. សាកលវិទ្យាល័យភូមិន្ទភ្នំពេញ
សាកលវិទ្យាល័យភូមិន្ទភ្នំពេញ ឫហៅកាត់ជាភាសាបារាំងថា (URPP) និងភាសាអង់គ្លេស (RUPP) គឺជាគ្រឹះស្ថានឧត្ដមសិក្សាចំណាស់ជាងគេនិងធំជាងគេនៅកម្ពុជា។ សាកលវិទ្យាល័យនេះចែកចេញជា មហាវិទ្យាល័យវិទ្យាសាស្ត្រ មហាវិទ្យាល័យសង្គមសាស្ត្រនិងមនុស្សសាស្ត្រ និង វិទ្យាស្ថានភាសាបរទេសIFL។ សកលវិទ្យាល័យភូមិន្ទភ្នំពេញត្រូវបានបង្កើតឡើងដំបូងនៅឆ្នាំ១៩៦០ អំឡុងពេលដែលប្រទេសកម្ពុជាមានការរីកចម្រើនយ៉ាងខ្លាំងក្លា។ ចំពោះជំនាញសិក្សាល្បីៗបំផុតមានដូចជា៖ អក្សរសាស្ត្រខ្មែរ ប្រវត្តិវិទ្យា ចិត្តវិទ្យា ទេសចរណ៍ អក្សរសាស្ត្រអង់គ្លេស និងជំនាញជាច្រើនទៀត។
២. សាកលវិទ្យាល័យវិទ្យាសាស្ត្រសុខាភិបាល
សាកលវិទ្យាល័យវិទ្យាសាស្ត្រសុខាភិបាល(ស.វ.ស) ហៅក្រៅថាសាលាក្រហម ជាគ្រឹះស្ថានឧត្ដមសិក្សាផ្នែកសុខាភិបាលដ៏ចំណាស់មួយ និងល្បីល្បាញបំផុតក្នុងប្រទេសកម្ពុជា ដែលបានបង្កើតឡើងតាំងពីឆ្នាំ ១៩៤៦មកម្ល៉េះ។ ចំពោះសិស្សដែលចង់សិក្សាក្នុងសាកលវិទ្យាល័យនេះ ត្រូវសម្រិតសម្រាំងយ៉ាងពិសេស តាមរយៈការប្រឡងចូលរៀនយ៉ាងតឹងរ៉ឹងបំផុត និងត្រូវមាននិទ្ទេសល្អក្នុងការប្រឡងមធ្យមសិក្សាទុតិយភូមិទៀតផង។
៣. សាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច
សាកលវិទ្យាល័យ ភូមិន្ទនីតិសាស្ត្រ និង វិទ្យាសាស្ត្រ សេដ្ឋកិច្ច ជា សាកលវិទ្យាល័យ ដែលចំណាស់ជាងគេ នៅក្នុងចំណោមគ្រឹះស្ថានឧត្ដមសិក្សានៃព្រះរាជាណាចក្រកម្ពុជា។ សាកលវិទ្យាល័យនេះ ត្រូវបានបង្កើតឡើងនៅឆ្នាំ ១៩៤៨ ក្នុងទម្រង់ជា វិទ្យាស្ថាននីតិសាស្ត្រ នយោបាយនិងសេដ្ឋកិច្ច ហើយត្រូវបានប្ដូរឈ្មោះដូចបច្ចុប្បន្ននៅក្នុងឆ្នាំ ២០០៣។ សាកលវិទ្យាល័យ ផ្ដល់កម្មវិធីសិក្សាជាមួយនឹងការផ្ដោតជាចម្បង ទៅលើផ្នែកនីតិសាស្ត្រ សេដ្ឋកិច្ច និងការអប់រំពាណិជ្ជកម្ម។ ចំណែកប្រព័ន្ធអប់រំវគ្គសិក្សាត្រូវបានបែងចែកជា ២ ឆមាស និងជា ៨ ឆមាសសម្រាប់ការសិក្សាបរិញ្ញាបត្រទាំងមូល ៤ ឆ្នាំ។
៤. សាកលវិទ្យាល័យជាតិគ្រប់គ្រង
សាកលវិទ្យាល័យជាតិគ្រប់គ្រង (NUM) ជាគ្រឹះស្ថានឧត្ដមសិក្សាសាធារណៈដ៏ល្បីល្បាញមួយក្នុងប្រទេសកម្ពុជា បង្កើតឡើងតាំងពីឆ្នាំ ១៩៨៣មកម្ល៉េះក្នុងនាមជាវិទ្យាស្ថានវិទ្យាសាស្ត្រសេដ្ឋកិច្ច។ សាកលវិទ្យាល័យនេះផ្ដល់នូវជំនាញសិក្សាជាច្រើនដល់និស្សិតដូចជា៖ គ្រប់គ្រង, សេដ្ឋកិច្ច, ពាណិជ្ជកម្ម, ព័ត៌មានវិទ្យា, ច្បាប់ពាណិជ្ជកម្ម, ទេសចរណ៍, និងភាសាបរទេស អមដោយការស្រាវជ្រាវ និងការអភិវឌ្ឍនៅក្នុងការឆ្លើយតបទៅនឹងតម្រូវការទីផ្សារការងារ។
៥. សាកលវិទ្យាល័យភូមិន្ទវិចិត្រសិល្បៈ
សាកលវិទ្យាល័យភូមិន្ទវិចិត្រសិល្បៈដំបូងមានឈ្មោះជាសាលាភូមិន្ទសិល្បៈ ត្រូវបានកសាងឡើងក្នុងឆ្នាំ១៩១៨ ហើយបានក្លាយទៅជាសាកលវិទ្យាល័យភូមិន្ទវិចិត្រសិល្បៈនៅឆ្នាំ ១៩៦៥។ ចំពោះជំនាញសិក្សារួមមាន៖ បុរាណវិទ្យា ស្ថាបត្យកម្ម និងនគរោបនីយវិទ្យា តុបតែងលម្អរ វិចិត្រកម្ម និងចម្លាក់ជាដើម។ ក្នុងនោះចែកចេញជា៥មហាវិទ្យាល័យដូចជា៖ មហាវិទ្យាល័យបុរាណវិទ្យា មហាវិទ្យាល័យវិចិត្រសិល្បៈសូនរូប មហាវិទ្យាល័យស្ថាបត្យកម្ម និងនគរោបនីយវិទ្យា មហាវិទ្យាល័យដូរ្យតន្ត្រី និងមហាវិទ្យាល័យសិល្បៈនាដសាស្ត្រ។
៦. សាកលវិទ្យាល័យភូមិន្ទកសិកម្ម
សាកលវិទ្យាល័យភូមិន្ទកសិកម្មជាគ្រឹះស្ថានឧត្ដមសិក្សាសាធារណៈផ្នែកកសិកម្ម មានទីតាំងនៅប៉ែកខាងលិចឈៀងខាងត្បូងនៃរាជធានីភ្នំពេញ បង្កើតឡើងនៅឆ្នាំ១៩៦៤ ក្រោមព្រះរាជកិច្ចដឹកនាំនៃព្រះបាទនរោត្តម សីហនុ។
សាកលវិទ្យាល័យនេះស្ថិតនៅក្រោមការគ្រប់គ្រងរបស់ក្រសួងកសិកម្ម និងចែកចេញជា៧មហាវិទ្យាល័យដូចជា៖
ក្សេត្រសាស្ត្រ
វិទ្យាសាស្ត្រសត្វ និង បសុព្យាបាល
ព្រៃឈើ
នេសាទ
បច្ចេកទេស និង ការគ្រប់គ្រងកសិកម្ម
សេដ្ឋកិច្ចកសិកម្ម និង អភិវឌ្ឍជនបទ
កសិឧស្សាហកម្ម
៧. វិទ្យាស្ថានបច្ចេកវិទ្យាកម្ពុជា
វិទ្យាស្ថាននេះគឺជាគ្រឹះស្ថានឧត្ដមសិក្សាសាធារណៈដ៏ល្បីល្បាញបំផុតនៅកម្ពុជា តាំងពីឆ្នាំ ១៩៦៤ រហូតមកដល់បច្ចុប្បន្ននេះ។ វិទ្យាស្ថាននេះផ្ដោតការអប់រំសំខាន់លើការបណ្ដុះបណ្ដាលផ្នែកបច្ចេកទេស ដែលជាតម្រូវការចាំបាច់បំផុត ក្នុងការអភិវឌ្ឍប្រទេសកម្ពុជាក្នុងវិស័យ វិទ្យាសាស្ត្រ និងវិស្វករ។ ចំណែកនិស្សិត ដែលចង់សិក្សានៅទីនោះត្រូវសម្រិតសម្រាំងតាមរយៈការប្រឡងប្រជែងកម្រិតសញ្ញាបត្រមធ្យមសិក្សាទុតិយភូមិ។
៨. វិទ្យាស្ថានជាតិពហុបច្ចេកទេសកម្ពុជា
វិទ្យាស្ថានជាតិពហុបច្ចេកទេសកម្ពុជាគឺជាគ្រឹះស្ថានឧត្ដមសិក្សារបស់រដ្ឋធំជាងគេក្នុងព្រះរាជាណាចក្រកម្ពុជាដែលមានសមត្ថភាពផ្ទេរនូវបច្ចេកទេសដល់និស្សិត រៀបចំឡើងដោយរដ្ឋាភិបាលកម្ពុជានិងសាធារណៈរដ្ឋកូរ៉េ ដែលមានសហប្រតិបត្តិការជាមួយនិងសាកលវិទ្យាល័យ Jeon Ju នៃប្រទេសកូរ៉េខាងត្បូង ។ NPIC ត្រូវបានបើកសម្ពោធដាក់ឱ្យប្រើប្រាស់ជាផ្លូវការក្រោមអធិបតីភាពរបស់នាយករដ្ឋមន្ត្រី ហ៊ុនសែន នៅថ្ងៃទី១៦ ខែឧសភា ឆ្នាំ ២០០៥ ។
ចំពោះការសិក្សាផ្ដោតសំខាន់ទៅលើការអនុវត្តន៍ (៧០ភាគរយ) និងទ្រឹស្ដី (៣០ភាគរយ)។ សិស្សនិស្សិតត្រូវសិក្សាជំនាញជាមួយសាស្ត្រាចារ្យខ្មែរដែលមានបទពិសោធន៍យូរឆ្នាំ និងសាស្ត្រាចារ្យជនជាតិកូរ៉េ ដោយសិក្សាក្នុងមួយថ្ងៃ ៦ ម៉ោង ហើយ៥ ថ្ងៃក្នុងមួយសប្ដាហ៍ ។ បន្ទាប់ពីពួកគេបញ្ចប់ការសិក្សា គេអាចមានសំណាងបន្តការសិក្សានិងធ្វើការនៅប្រទេសកូរ៉េទៀតផង៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
