Sanchez អាចលេងបានវិញហើយអាទិត្យនេះ បន្ទាប់ពីបានជារបួស

2017-08-24 13:32:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធស្លាបរបស់ក្លឹបកាំភ្លើងធំ Arsenal កីឡាករ Alexis Sanchez បានជាពីរបួសសាច់ដុំវិញហើយនាពេលនេះ ហើយអាចលេងវិញបាននាសប្ដាហ៍នេះ នេះបើតាមពាក្យសំដីរបស់អ្នកចាត់ការទូទៅចាស់វស្សារបស់ក្លឹបមួយនេះ លោក Arsene Wenger ថ្លែងក្នុងថ្ងៃនេះ។

លោក Wenger បាននិយាយថា៖ “Alexis បានខិតខំណាស់ក្នុងការព្យាបាលរបួស ដើម្បីត្រលប់មកលេងឲ្យក្លឹបវិញ ហើយឥលូវគាត់អាចលេងវិញបានហើយ"។ អ្នកចាត់ការសញ្ជាតិបារាំងរូបនេះ បានបន្តទៀតថា៖ "គេ (Sanchez) ចូលចិត្តលេងបាល់ណាស់ ហើយពេលខ្លះវាពិបាកក្នុងការឃាត់គេ ប៉ុន្តែឥលូវគេ (Sanchez) បានត្រៀមខ្លួនរួចរាល់សម្រាប់ការប្រកួតហើយ។ គេ (Sanchez) មិនទាន់បានលេងបាល់អស់រយៈពេលយូរគ្រាន់បើហើយ ដូច្នេះខ្ញុំនឹងត្រូវសម្រេចថាតើគួរដាក់គេ (Sanchez) ឲ្យលេងឬអត់ ប៉ុន្តែមើលទៅគេ (Sanchez) អាចលេងបានហើយក្នុងសប្ដាហ៍នេះ"។

ក្លឹបកាំភ្លើងធំ Arsenal នឹងត្រូវប៉ះជាមួយក្លឹបហង្សក្រហម Liverpool ក្នុងថ្ងៃអាទិត្យនេះ។ ក្លឹបយក្សទីក្រុងឡុងដុងមួយនេះទើបតែបានចាញ់ក្លឹប Stoke កាលពីសប្ដាហ៍មុនហើយមាន ៣ពិន្ទុ ខណៈក្លឹបហង្សក្រហមមាន ៤ពិន្ទុ ក្រោយឈ្នះ Crystal Palace ក្នុងការប្រកួតមុន។ ដោយឡែក កីឡាករសញ្ជាតិឈីលី Alexis Sanchez បានចូលដល់ឆ្នាំចុងក្រោយនៃកុងត្រារបស់ខ្លួនជាមួយក្លឹប Arsenal ហើយ ខណៈក្លឹប Manchester City និង ក្លឹបតោខៀវ Chelsea កំពុងតាមយ៉ាងប្រកិតក្នុងការទិញកីឡាកររូបនេះ។ ទោះជាយ៉ាងណា លោក Wenger បានបញ្ជាក់ហើយបញ្ជាក់ទៀតកាលពីថ្មីៗនេះថា នឹងមិនលក់ទេកីឡាករវ័យ ២៨ឆ្នាំរូបនេះទេ បើទោះជាលោកដឹងថា Arsenal នឹងមិនបានសូម្បីមួយកាក់មួយសេន ពីការចាកចេញរបស់ខ្សែប្រយុទ្ធរូបនេះនារដូវកាលក្រោយ បើសិនជាគេនៅតែមិនចុះកុងត្រាថ្មីជាមួយក្លឹប៕

ប្រភព៖ ESPN FC ប្រែសម្រួល៖ ហ៊ីម រស្មី