៣ចំណុច ដើម្បីបង្កើនទឹកដៃតែងនិពន្ធ ពីឯកឧត្តម ជ័យ ចាប
- 2017-08-25 02:31:00
- ចំនួនមតិ 0 | ចំនួនចែករំលែក 0
៣ចំណុច ដើម្បីបង្កើនទឹកដៃតែងនិពន្ធ ពីឯកឧត្តម ជ័យ ចាប
ចន្លោះមិនឃើញ
មានបទពិសោធន៍ក្នុងវិស័យតែងនិពន្ធប្រមាណ៣៨ឆ្នាំ សាស្ត្រាចារ្យមុខវិជ្ជាតែងនិពន្ធឯកឧត្ដម ជ័យ ចាប បានចែករំលែកគន្លឹះមួយចំនួនដើម្បីបង្កើនទឹកដៃតែងនិពន្ធប្រកបដោយគុណភាពខ្ពស់។
អ្នកនិពន្ធកំណាព្យ និងបទចម្រៀងដ៏ល្បីរូបនេះបានប្រាប់ Sabay ថា ការតែងនិពន្ធមិនមែននិពន្ធតែ១អត្ថបទ បានលទ្ធផលល្អនោះទេ តែត្រូវនិពន្ធ១ពាន់ដងទើបបានអត្ថបទល្អ។ លោកថា ការផ្ទៀងផ្ទាត់អត្ថបទរបស់ខ្លួនម្ដងហើយម្ដងទៀត គឺជាវិធីសាស្ត្រដ៏ល្អបំផុតដើម្បីបង្កើនគុណភាពអត្ថបទ។ ជាងនោះទៅទៀតដើម្បីឱ្យដឹងថា តើអត្ថបទនោះមានតម្លៃកម្រិតណា ទាល់តែម្ចាស់អត្ថបទមានចំណេះដឹងទូទៅខ្ពស់ និងយល់ដឹងពីអក្សរសាស្ត្រ និងអក្សរសិល្ប៍ខ្មែរច្បាស់។
“មុនដំបូងត្រូវចេះក្បួនតែង ក្បួនដែលមានប៉ុន្មានយើងត្រូវចេះឱ្យអស់ ទី២ត្រូវមានចំណេះដឹងទូទៅទូលាយ វប្បធម៌ទូទៅទូលាយ ហើយឱ្យយើងយកចិត្តទុកដាក់ពីអក្សរសាស្ត្រ បន្ទាប់មកយើងត្រូវព្យាយាមតែង។ តែង១អត្ថបទមិនទាន់ល្អទេ តែង១ពាន់អត្ថបទបានល្អ មានន័យថាតែងឱ្យយូរឱ្យច្រើនដងមិនមែនតែងឱ្យគ្រប់១ពាន់អត្ថបទទេ ជាការប្រៀបធៀបពេលវេលាទេ អីចឹងតែងឱ្យយូរហើយតាមកែលម្អស្នាដៃហ្នឹងជាបន្តបន្ទាប់”។
អ្នកនិពន្ធចេញពីត្រកូលក្រីក្ររូបនេះ មានស្នាដៃតែងនិពន្ធចាស់ៗដូចជាសៀវភៅ "កំណាព្យពីនេះពីនោះភាគ១" បានទទួលពានរង្វាន់ពីប្រទេសថៃ ក្នុងកម្មវិធីតែងនិពន្ធក្របខ័ណ្ឌអាស៊ីអាគ្នេយ៍ "កំណាព្យពីនេះពីនោះភាគ២" សៀវភៅ "យល់សប្ដិយល់សូង" សៀវភៅ"ការប្រមូលផ្ដុំចងក្រងពាក្យបណ្ដៅខ្មែរ" និងមានស្នាដៃជាច្រើនទៀត។ អ្វីដែលធ្វើឱ្យមហាជនស្គាល់លោកច្រើន នោះគឺស្នាដៃបទចម្រៀងមានបទ"បុប្ផាកោះជ័យទត្ត" ចំណងជើងខុស"ទូកត្នោតបងមួយ” និងមានស្នាដៃបទចម្រៀងផ្សេងៗទៀត។ ចំណែកស្នាដៃថ្មីៗ លោកសរសេរបានមួយចំនួនតែមិនទាន់បានចេញផ្សាយនៅឡើយ៊៕