ក្មេងស្រី ១៧ឆ្នាំ សម្រាលកូនតាមផ្លូវព្រោះម្ដាយមិនឲ្យចូលផ្ទះ ធ្វើឲ្យគ្រប់គ្នារន្ធត់ចិត្ត

2017-08-28 03:36:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្មេងស្រីអាយុ ១៧ឆ្នាំ ជនជាតិឥណ្ឌាម្នាក់ ត្រូវបានក្រុមគ្រួសារបណ្ដេញចេញពីផ្ទះ បន្ទាប់ពីធ្លោយមានផ្ទៃពោះជាមួយសង្សារ រហូតសម្រាលកូនតាមផ្លូវនៅទីក្រុង Chandil រដ្ឋ Jharkhand ភាគខាងកើតប្រទេសឥណ្ឌា។

តាមប្រភព ពេលឈឺពោះ នាងបានដើរសំដៅទៅកាន់មណ្ឌលសុខភាពខ្វះតែជាង ១០០ម៉ែត្រទៀតដល់ ក៏សម្រាលកូនតែម្ដង។ តាមរយៈវីដេអូ គេឃើញម្ដាយវ័យក្មេងរូបនេះ សម្រាលកូនលើថ្នល់បេតុងតែម្នាក់ឯងយ៉ាងកណ្ដោចកណ្ដែង រួចអង្គុយនឹងថ្កល់សម្លឹងមុខកូនមិនកម្រើកជាច្រើននាទី ខណៈអ្នកភូមិចោមរោមមើល និងម៉ូតូ រថយន្តបើកទៅមកធម្មតា។

ទារកនេះត្រូវគេឃើញនៅមានជាប់ទងផ្ចិត និងស្រែកយំក្នុងកន្ទបសំពត់របស់ម្ដាយ។ តាមរយៈគេហទំព័រព័ត៌មានឥណ្ឌា Jagran បានរាយការណ៍ថា ពុំមានគ្រូពេទ្យ ឬគិលានុបដ្ឋាយិកាពីមន្ទីរពេទ្យក្បែរនោះចុះមកជួយក្មេងស្រីទេ ទោះបីជាអ្នកស្រុកប្រាប់ដំណឹងក៏ដោយ។

អ្នកភូមិឃើញហេតុការណ៍ផ្ទាល់ភ្នែកម្នាក់ប្រាប់ថា "ម្ដាយរូបនេះមានសភាពអស់កម្លាំង ញ័រដៃ មិនអាចលើក និងឱបបីកូនបានទេ។ រថយន្តធំៗបានធ្វើដំណើរក្បែរនាង ប៉ុន្តែនាងមិនអាចរំកិលខ្លួនទៅជ្រុងម្ខាងបានឡើយ"។

អ្នកភូមិមកមើលច្រើនឡើងៗ ក៏ពិភាក្សាគ្នាបិទផ្លូវបណ្ដោះអាសន្នជុំវិញនាងសិន ព្រោះខ្លាចគ្រោះថ្នាក់ រួចក៏ទាក់ទងទៅកាន់មណ្ឌលសុខភាពឃុំឲ្យមកយកនាងតែម្ដង។ ចុងក្រោយ នាងទទួលបានការមើលថែពីគ្រូពេទ្យហើយ បន្ទាប់ពីអ្នកភូមិដឹកនាងទៅមណ្ឌលសុខភាពខាងលើ។

គួរបញ្ជាក់ថា ក្មេងស្រីមិនបញ្ចេញអត្តសញ្ញាណនេះ បានរស់នៅជាមួយម្ដាយមេម៉ាយ ប៉ុន្តែគាត់បានបណ្ដេញចេញពីផ្ទះ ក្រោយនាងមានផ្ទៃពោះ។ នាងប្រាប់អ្នកយកព័ត៌មានថា នាងបានលង់ស្រលាញ់បុរសម្នាក់ ប៉ុន្តែបុរសនោះបានផ្ដាច់ទំនាក់ទំនងពីនាងពេលដឹងថា នាងមានផ្ទៃពោះ៕