ភ្ញាក់ផ្អើល ពេលឃើញវីដេអូកូនទាព្រៃស្លាបស លោតចេញពីសំបុកដើមគគីរនៅកម្ពុជា

2017-08-28 04:07:37
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីព្រឹកមិញនេះអង្គការសមាគមអភិរក្សសត្វព្រៃ (WCS) បង្ហាញ វីដេអូដ៏កម្រ នៃសកម្មភាពកូនសត្វទាព្រៃស្លាបសចំនួន០៣ក្បាល លោតចេញពីសំបុកដើមគគីរដែលមានកម្ពស់ ៥-៦ម៉ែត្រពីដី ជាលើកដំបូងខណៈមេទាព្រៃស្លាបសរង់ចាំកូនៗរបស់វាលោតចេញពីសំបុក។

កាលពីចុងឆ្នាំ២០១៥ មេទាព្រៃស្លាបសក្នុងវីដេអូនេះ ត្រូវបានអ្នកភូមិព្រៃវែងជួយសង្គ្រោះពេលវារង របួសនៅក្នុងព្រៃ ហើយបានប្រគល់មកឲ្យក្រុមអ្នកអភិរក្សរបស់អង្គការ WCS។ អង្គការWCS បានបញ្ជូនទាព្រៃស្លាបសនេះ ទៅកាន់មជ្ឈមណ្ឌលអង្គរសម្រាប់ការអភិរក្សជីវចម្រុះដើម្បីទទួលបានការព្យាបាល និងថែទាំ។ ក្រោយមក ទាព្រៃស្លាបសនេះ ត្រូវបានក្រុមអ្នកអភិរក្សលែងឲ្យទៅរស់នៅក្នុងព្រៃធម្មជាតិវិញនៅក្នុងខែធ្នូ ឆ្នាំ២០១៥ ដោយបំពាក់ជាមួយកងជាប់នឹងជើងខាងស្កាំរបស់វា។

ទស្សនាវីដេអូដ៏កម្រ៖

គួរជម្រាបជូនថា កាលពីខែកក្កដានេះ អង្គការWCS បានចេញសេចក្តីប្រកាសព័ត៌មានអំពីការរកឃើញសំបុកសត្វទាព្រៃស្លាបសដែលជាប្រភេទរងគ្រោះជិតផុតពូជនៅលើសាកលលោក ជាលើកដំបូងក្នុងរយៈពេល០៥ឆ្នាំចុងក្រោយនៅក្នុងតំបន់ខ្ពង់រាបភាគខាងជើងប្រទេសកម្ពុជា។ សំបុកទាព្រៃស្លាបសនេះ ក៏មានបង្ហាញនៅក្នុងវីដេអូផងដែរ។

ទាព្រៃស្លាបស ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតពូជនៅលើសាកលលោក ដោយចំនួនរបស់ពួកវានៅបន្តធ្លាក់ចុះយ៉ាងខ្លាំងដោយសារតែការបាត់បង់ទីជម្រក ការរំខាននៅតាមដងព្រែក និងការបរបាញ់ជាដើម។ ទាព្រៃស្លាបស មានចំនួនចន្លោះ២៥០-១០០០ក្បាលនៅលើសាកលលោក និងមានវត្តមានតិចតួចរស់នៅក្នុងប្រទេសកម្ពុជា៕

ចុចអាន៖