ក្ដុកក្ដួល! CL បង្ហោះសារយ៉ាងរំជួលចិត្តមួយទៅអ្នកគាំទ្រ ដែលមិនធ្លាប់មានពីមុនមក

2017-08-28 06:50:54
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាស្រីដែលអ្នកគាំទ្រភាគច្រើនតែងសរសើរថាជា "Queen of K-Pop” CL បានបង្ហោះសារដ៏កម្រមួយលើគណនី Instagram ផ្ទាល់ខ្លួនរបស់នាង រ៉ាយរ៉ាប់ពីរឿងរ៉ាវមួយចំនួនក្នុងជីវិតឯកជនរបស់នាង។

កាលពីថ្ងៃទី ២៧ ខែសីហាម្សិលមិញ CL បានបង្ហាញពីអារម្មណ៍របស់ខ្លួនលើបណ្ដាញសង្គមថា៖ "អ្នកទាំងអស់គ្នាដឹងហើយ ថាខ្ញុំមិនមែនជាអ្នកដែលពូកែនិយាយអ្វីទេ ប៉ុន្តែខ្ញុំគ្រាន់តែចង់អរគុណទៅកាន់អ្នកគាំទ្រទាំងអស់ដែលខំអត់ធ្មត់ និងមិនអត់ធ្មត់ចំពោះខ្ញុំ។ ខ្ញុំសន្យានឹងអ្នកទាំងអស់គ្នាថា បទចម្រៀងថ្មី នឹងលេចវត្តមានក្នុងពេលឆាប់ៗនេះ។ ខ្ញុំគ្រាន់តែចង់ជម្រាបអ្នកទាំងអស់គ្នាថា ខ្ញុំកំពុងធ្វើការងារនេះហើយ ហើយខ្ញុំក៏មិនបោះបង់ដែរ”។

ក្រោយនិយាយពីរឿងការងាររួច ម្ចាស់បទ "Hello B*tches” រូបនេះក៏បានងាកមកនិយាយរឿងផ្ទាល់ខ្លួនរបស់នាងវិញម្ដង៖ "វាអាចគ្រាន់តែជាការកម្សាន្តសម្រាប់មនុស្សមួយចំនួន ប៉ុន្តែខ្ញុំជាមនុស្ស ហើយនេះជាជីវិតខ្ញុំ។ នៅក្នុងសិល្បៈរយៈពេលជាយូរមកហើយ តាំងពីខ្ញុំនៅវ័យជំទង់ ខ្ញុំមិនដែលមើលមកក្រោយវិញទេ។ ការលះបង់ ភាពពលីជាច្រើន ប៉ុន្តែខ្ញុំតែងតែខិតខំប្រឹងប្រែងគ្រប់បែបយ៉ាងរក្សាជីវិតរបស់ Lee Chae Rin (ឈ្មោះកូរ៉េរបស់ CL) និង CL។ កាលពីប៉ុន្មានឆ្នាំកន្លងទៅ ខ្ញុំឆ្លងកាត់ភាពប្រែប្រួលជាច្រើន ទាំងល្អ និងអាក្រក់។ ខ្ញុំបានបែកបាក់ជីវិតស្នេហា និងក្រុមចម្រៀងដែលខ្ញុំស្រលាញ់បំផុត-ល-។ វាមិនមែនជារឿងងាយស្រួលទេ ពីព្រោះនេះគឺជាអ្វីដែលខ្ញុំមានក្នុងជីវិតរបស់ខ្ញុំ”។

CL បន្តថា៖ "ដូច្នេះហើយ ខ្ញុំត្រូវការពេលខ្លះ ដើម្បីព្យាបាលចិត្ត ព្រមទាំងយកឱកាសនេះទៅរៀន ទៅអភិវឌ្ឍ និងរិះគិតស្វែងរកអ្វីដែលល្អ។ ខ្ញុំបានព្យាយាមធ្វើវាទាំងបង្ខំ ដូច្នេះលទ្ធផលអាចនឹងមិនសូវល្អ បន្តែខ្ញុំបានសម្រេចចិត្តថាបណ្ដោយតាមនោះចុះ ដើម្បីចាំមើលថាពេលបន្ទាប់នឹងទៅជាយ៉ាងណា។ ខ្ញុំចង់និយាយថា ខ្ញុំមានក្រុមដ៏អស្ចារ្យក្នុងពិភពលោកដែលចាំជួយខ្ញុំ ទាំងលោកខាងលិច និងខាងកើត ដែលកំពុងខិតខំរាល់ថ្ងៃសម្រាប់ខ្ញុំ”។

ជាបញ្ចប់ នាងក៏បានថ្លែងការអរគុណ ព្រមជាមួយទឹកចិត្តស្រឡាញ់ និងក្ដីនឹករលឹកដ៏ធំធេងចំពោះអ្នកគាំទ្ររបស់នាងទាំងអស់ផងដែរ។

ដោយឡែក ក្រោយ CL បង្ហោះសារមិនយូរប៉ុន្មាន ខាងផលិតកម្ម YG ក៏បានចេញសារមួយដែរ បញ្ជាក់ថា CL កំពុងមមាញឹក និងយកចិត្តទុកដាក់ខ្លាំងលើអាល់ប៊ុមនេះ ហើយពួកគេនឹងផ្ដល់ដំណឹងល្អឆាប់ៗនេះ៕