ប្រាសាទបន្ទាយសម្រែ ភ្ញៀវទេសចរ ទៅហួសមកហួស

2017-08-29 02:46:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបីជាមានទីតាំងស្ថិតនៅចន្លោះផ្លូវទៅកាន់ប្រាសាទ បន្ទាយស្រីក្ដី ក៏ប៉ុន្តែភ្ញៀវទេសចរហាក់ធ្វើដំណើរទៅហួសមកហួស មិនបានចូលទស្សនាប្រាសាទបន្ទាយសម្រែ ដែលជាសំណង់ស្ថាបត្យកម្មមានរចនាបថដូចប្រាសាទអង្គរវត្តនោះឡើយ។

លោក ណារិទ្ធ សុធា ជាអ្នកពិនិត្យសំបុត្រភ្ញៀវទេសចរចូលទស្សនាប្រាសាទបន្ទាយសម្រែ បានឲ្យដឹងថា ក្នុងមួយថ្ងៃមានភ្ញៀវទេសចរបរទេសប្រមាណ ៥០០នាក់ប៉ុណ្ណោះ ដែលមកទស្សនាកម្សាន្តនៅប្រាសាទនេះ ក្នុងនោះភ្ញៀវទេសចរអាស៊ីមានប្រមាណជាង ៣០០នាក់ និងអឺរ៉ុបប្រមាណជាង ១០០នាក់។

លោកសុធា ឲ្យដឹងដែរថា មូលហេតុដែលមានភ្ញៀវមកទស្សនាប្រាសាទបន្ទាយសម្រែតិចដោយសារតែប្រាសាទនេះស្ថិតនៅដាច់តែឯង និងឆ្ងាយពីបណ្ដាប្រាសាទដ៏ទៃ។

ប្រាសាទបន្ទាយសម្រែ មានទីតាំងស្ថិតនៅភូមិ-ឃុំព្រះដាក ស្រុកបន្ទាយស្រី ខេត្តសៀមរាបសាងសង់ឡើងឡើងក្នុងរាជព្រះបាទសុរិយវរ្ម័នទី២ ដើម្បីឧទ្ទិសដល់ព្រះវិស្ណុ ក្នុងព្រហ្មញ្ញសាសនា។

ប្រាសាទនេះត្រូវបានចាត់បញ្ចូលជាសំណង់ស្ថាបត្យកម្មស្ថិតក្នុងសម័យអង្គរ មានកំពែងពីរជាន់ ធ្វើអំពីថ្មក្រៀម និងប្រាង្គកណ្ដាលដែលមានរូបជាផ្កាឈូកក្រពុំ។

ដើម្បីទៅទស្សនាប្រាសាទនេះ គេត្រូវចូលតាមគោបុរៈខាងលិច តែពីជំនាន់ដើម គឺតាមគោបុរៈខាងកើត ដែលផ្លូវក្រាលដោយថ្មភក់ ហើយមានបង្កាន់ដៃលម្អដោយក្បាច់ចម្លាក់នាគបើកពពារគួរឲ្យស្ញប់ស្ញែងអស្ចារ្យ៕