ចប់! ចិនប្រកាសឈប់រកស៊ីជាមួយកូរ៉េខាងជើងហើយ

2017-08-29 04:25:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងពាណិជ្ជកម្មចិន បានចេញសេចក្ដីប្រកាសថ្មីៗនេះដោយហាមឃាត់សហគ្រាស និងការធ្វើជំនួញលក្ខណឯកជននានារបស់កូរ៉េខាងជើង មិនឲ្យបើកជំនួញថ្មីនៅក្នុងប្រទេសចិន បានទៀតទេ។

គីម ជុងអ៊ុន, រូបភាពផ្ដល់សិទ្ធិដោយ Reuters

ការចេញបម្រាមនេះធ្វើឡើងស្របទៅតាមទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិ (UNSC) ដែលបានអនុម័តកាលពីដើមខែនេះ ឆ្លើយតបនឹងកូរ៉េខាងជើងដែលបន្តតេស្ដមីស៊ីលកាលពីខែមុន។

យោងទៅតាមគេហទំព័ររបស់ក្រសួងខាងលើបានបញ្ជាក់ថា សហគ្រាសរកស៊ីរួមគ្នា ការបើកជំនួញថ្មី និងការពង្រីកជំនួញបន្ថែមដែលជាប់ពាក់ព័ន្ធនឹងក្រុមហ៊ុន ឬជនជាតិកូរ៉េខាងជើង ត្រូវបានហាមឃាត់ដាច់ខាត។

ចំណែក ការវិនិយោគថ្មី ឬពង្រីកជំនួញរបស់ជនជាតិចិនទៅក្នុងប្រទេស កូរ៉េខាងជើងវិញ រដ្ឋាភិបាលលែងយល់ព្រមឲ្យហើយ។ វិធានការថ្មីក៏បានដាក់ចូលជាធរមានភ្លាមៗ ហើយចិនសន្យាអនុវត្តទណ្ឌកម្មនេះឲ្យបានផងដែរ។

អង្គការសហប្រជាជាតិបានអនុម័តទណ្ឌកម្មប្រឆាំងក្រុងព្យុងយ៉ាងនៅដើមខែនេះ ត្រូវគេព្យាករណ៍ថា ធ្វើឲ្យកូរ៉េខាងជើងខាតចំណូលដល់ទៅ ១ពាន់លានដុល្លារក្នុងមួយឆ្នាំ។ កាលប៉ុន្មានថ្ងៃ មុនចិនអនុវត្តទណ្ឌកម្មខាងលើ ចិនក៏បានហាមឃាត់ការនាំចូល ដែក រ៉ែដែក ធ្យូងថ្ម និងអាហារសមុទ្រម្ដងហើយ។

គួរបញ្ជាក់ថា ទណ្ឌកម្មថ្មីដាក់ដោយចិន អាមេរិក ជប៉ុន និងអង្គការសហប្រជាជាតិ មានគោលបំណងដាក់សម្ពាធលើទីក្រុងព្យុងយ៉ាង ដើម្បីបញ្ឈប់កម្មវិធីនុយក្លេអ៊ែរ៕