មិនសរសើរមិនបាន! នៅក្មេងសោះ តែមានស្នាដៃសិល្បៈជាច្រើនទុកឲ្យអ្នកជំនាន់ក្រោយ

2017-09-03 02:14:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងនាមជាក្មេងជំនាន់ក្រោយដែលកើតលើទឹកដីសុវណ្ណភូមិ តើអ្នកមានសម្បត្តិអ្វីខ្លះទុកសម្រាប់វប្បធម៌ ឬសម្រាប់ក្មេងជំនាន់ក្រោយៗ? បើនិយាយពីក្មេងជំនាន់នេះ លោក សួន សុភ័ក្ត្រ គឺបានតាំងចិត្តហើយថា នឹងមានស្នាដៃសម្រាប់សម័យកាលក្រោយៗទៀត។

មានវ័យ៣១ឆ្នាំ លោក សួន សុភ័ក្ត្រ ជាតន្ត្រីករ ហើយក៏ជាអ្នកធ្វើឧបករណ៍ភ្លេងខ្មែរមួយរូបដែរ លោកមានឧបនិស្ស័យខាងភ្លេងបុរាណខ្មែរ។ សិល្បកររូបនេះបានប្រាប់ Sabay ពីការយល់ឃើញរបស់ខ្លួនថា ដូនតាបានទុករបស់ច្រើនណាស់ឱ្យកូនខ្មែរ ដូចជាប្រាសាទអង្គរវត្ត វប្បធម៌ អរិយធម៌ ទំនៀមទម្លាប់ និងប្រពៃណីដ៏ល្អផូរផង់។

លោកបានសួរខ្លួនឯងថា តើក្នុងសម័យនេះលោកមានអ្វីសម្រាប់ទុកឱ្យក្មេងជំនាន់ក្រោយៗទៀត? ដូច្នេះហើយទើបបានជាលោកខំស្រាវជ្រាវរៀនភ្លេង និងធ្វើឧបករណ៍ភ្លេងបុរាណសម្រាប់ទុកជាកេរ្តិ៍មរតកតិចតួចសម្រាប់វិស័យសិល្បៈបុរាណ។

ងាកមកការធ្វើឧបករណ៍ភ្លេងវិញ លោកចេះធ្វើឧបករណ៍ខ្លុយ ស្រឡៃ (ច្រើនប្រភេទ) ប៉ីអ ប៉ីពក ស្នែងតូចស្នែងធំ សែដៀវ (សាយដៀវ) ស្គរ និងធ្វើឧបករណ៍ខ្យង។ រាល់ឧបករណ៍ភ្លេងទាំងនេះ ភាគច្រើនលោកមិនលក់ទេ លើកលែងតែខ្លុយ ប៉ីអ ប៉ីពក និងស្រឡៃព្រោះវាងាយស្រួលធ្វើ និងងាយស្រួលរកវត្ថុធាតុដើម។

សិល្បករមកពីខណ្ឌច្បារអំពៅរូបនេះ បានបញ្ជាក់ថា ការចុះទៅរកឧបករណ៍មួយចំនួន គឺពិបាកណាស់ ជាពិសេសឧបករណ៍ស្នែងធំ លោកត្រូវចុះទៅខេត្តឆ្ងាយៗដូចជារតនគិរី មណ្ឌលគិរី ក្រចេះ ជាដើម និងទៅព្រៃជ្រៅៗដើម្បីបានស្នែងដែលល្អ។

“ខ្ញុំគិតថា បើខ្ញុំលក់ទៅ ថ្ងៃក្រោយបើខ្ញុំត្រូវការវាខ្ញុំអត់ដឹងទៅរកណាទេ ឬចង់បង្ហាញក្មេងជំនាន់ក្រោយ ខ្ញុំអត់ដឹងមានអីទៅពន្យល់វាទេ អ៊ីចឹងខ្ញុំត្រូវសន្សំពីមួយថ្ងៃទៅមួយថ្ងៃ។ នៅពេលក្មេងជំនាន់ក្រោយត្រូវការស្រាវជ្រាវពីវា មិនបាច់ដើររកច្រើនកន្លែង”។

ថ្វីត្បិតឧបករណ៍មួយចំនួនត្រូវបានលក់ក៏ដោយចុះ តែឧបករណ៍ដដែលនេះលោក សុភ័ក្ត្រ ក៏នៅតែរក្សាទុកមួយចំនួននៅផ្ទះរបស់លោកដើម្បីជាមរតកដល់ក្មេងជំនាន់ក្រោយដែរ តែលោកមិនទាន់បានរៀបចំជាកន្លែងឱ្យបានត្រឹមត្រូវនៅឡើយទេ។

សិល្បករមានដើមកំណើតក្នុងគ្រួសារកសិករដែលម្ដាយឪពុកជាអតីតទាហាននៅសម័យមុនរូបនេះរៀនធ្វើឧបករណ៍ភ្លេងពីគ្រូច្រើននាក់ដែរ តែអ្វីដែលសំខាន់គឺលោកព្យាយាមស្វែងរកគន្លឹះដោយខ្លួនឯង ព្រោះការធ្វើឧបករណ៍មានភាពស្មុគស្មាញច្រើន។

ប្រសិនបើមានលទ្ធភាព លោក សួន សុភ័ក្ត្រ នឹងបើកកន្លែងដាក់តាំងឧបករណ៍ភ្លេង ដែលជាស្នាដៃរបស់លោក ដើម្បីកូនខ្មែរជំនាន់ក្រោយបានឃើញ។

ប្រធានក្រុមដឹកនាំក្រុមភ្លេងរូបនេះ បានលេងភ្លេងក្នុងប្រទេសក្នុងកម្មវិធីទាំងតូចទាំងធំជាច្រើន និងធ្លាប់ទៅសម្ដែងនៅប្រទេសមួយចំនួនដូចជា ឥណ្ឌូណេស៊ី ម៉ាឡេស៊ី សិង្ហបុរី និងវៀតណាម ហើយនៅខែតុលាខាងមុខនេះ លោកនឹងទៅសម្ដែងនៅប្រទេសទួរគី ភាគច្រើនលោកទៅតាមរយៈសមាគមសិល្បៈសុវណ្ណភូមិ៕

អត្ថបទៈ ប៉ូ សាគុន