មិននឹកស្មានថា គ្រាប់បែកកូរ៉េខាងជើងបាញ់សាកល្បងម្សិលមិញ មានអនុភាពខ្លាំងយ៉ាងនេះ

2017-09-04 02:33:48
ចំនួនមតិ 0 | ចំនួនចែករំលែក 0

ចន្លោះមិនឃើញ

កូរ៉េខាងជើង បានអះអាងនៅថ្ងៃទី៣ កញ្ញា ម្សិលមិញនេះថា ខ្លួនបានសម្រេចជោគជ័យលើការធ្វើតេស្តគ្រាប់បែកអ៊ីដ្រូហ្សែន ដែលអាចបំពាក់នៅលើមីស៊ីលបាលីស្ទីកអន្តរទ្វីបបាន។ ទូរទស្សន៍រដ្ឋកូរ៉េខាងជើង បានផ្សព្វផ្សាយថា ក្រុងព្យុងយ៉ាង បានបើកការសាកល្បងនុយក្លេអ៊ែរជាលើកទី៦ នៅតំបន់ភាគឦសាន ដែលបង្កឲ្យមានការរញ្ជួយដីរង្វាស់ ៥,៧វ៉ិចទ័រកើតឡើង។

បើយោងតាមសារព័ត៌មាន Metro របស់ចក្រភពអង់គ្លេស បានឲ្យដឹងថា ការសាកល្បងនុយក្លេអ៊ែរ ដែលបានធ្វើឡើងនៅក្នុងព្រំដែន របស់ប្រទេសកូរ៉េខាងជើងផ្ទាល់នោះ មានអនុភាពខ្លាំងក្លាជាងគ្រាប់បែកបរមាណូ ដែលទម្លាក់នៅទីក្រុងហ៊ីរ៉ូស៊ីម៉ា (Hiroshima) ប្រទេសជប៉ុន ក្នុងអំឡុងសង្គ្រាមលោកលើកទី២ រហូតដល់ទៅ ៨ដងឯណោះ។

ជាមួយគ្នានេះដែរ របបផ្ដាច់ការរបស់ លោក គីម ជុងអ៊ុន ក៏បានអះអាងដែរថា ពួកគេបានធ្វើតេស្តដោយជោគជ័យនូវគ្រាប់បែកអ៊ីដ្រូហ្សែន (H-Bomb) ទម្ងន់ ១២០គីឡូតោន។

គួររំលឹកឲ្យដឹងថា គ្រាប់បែកដែលទម្លាក់ដោយសហរដ្ឋអាមេរិក នៅទីក្រុងហ៊ីរ៉ូស៊ីម៉ា ក្នុងអំឡុងសង្គ្រាមលោកលើកទី២ គឺមានទម្ងន់ ១៥គីឡូតោន ដែលបណ្ដាលឲ្យមនុស្សចំនួន ១៥០ ០០០នាក់ស្លាប់ និងនៅទីក្រុងណាហ្គាសាគី (Nagasaki) គឺ ២០គីឡូតោន បង្កឲ្យមនុស្សចំនួន ៧៥ ០០០នាក់ស្លាប់។

ទោះបីជាយ៉ាងណា គេមិនសូវជឿជាក់លើ ភាពត្រឹមត្រូវ និងស្មោះត្រង់ នៃការចេញផ្សាយរបស់ប្រព័ន្ធផ្សព្វផ្សាយទាំងអស់ពីកូរ៉េខាងជើងឡើយ ប៉ុន្តែក្រុមអ្នកជំនាញយល់ស្របថា នេះគឺជាការសាកល្បងដ៏ធំបំផុតរបស់ពួកគេ។

គួរបញ្ជាក់ថា ការសាកល្បងនេះបានធ្វើឡើង រយៈពេលប្រមាណជា ៣ថ្ងៃប៉ុណ្ណោះ បន្ទាប់ពីកូរ៉េខាងជើង បានបាញ់មីស៊ីលហោះរំលងលើប្រទេសជប៉ុន ដែលបង្កឲ្យមានការភ័យខ្លាចយ៉ាងខ្លាំង៕

ចុចអាន៖

ប្រភព៖ Metro ប្រែសម្រួល៖ សេង ឡុង