សេង ស្រឿន ដកខ្លួនពីសង្វៀនមួយរយៈក្រោយចាញ់វគ្គផ្ដាច់ព្រ័ត្រលើកទី៣

2017-09-11 04:51:53
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់គុនខ្មែរ សេង ស្រឿន ថាសុំដកឃ្លាពីសង្វៀនប្រដាល់មួយរយៈពេលសិន ដើម្បីឲ្យស្ងប់អារម្មណ៍បន្តិច ព្រោះចាញ់ក្នុងវគ្គផ្ដាច់ព្រ័ត្រនេះច្រើនដងពេកហើយ។

កីឡាករ សេង ស្រឿន ក្រហម

សេង ស្រឿន បានឲ្យដឹងថា ពិតជាមានអារម្មណ៍សោកស្ដាយខ្លាំងដែលចាញ់ការប្រកួតនៅវគ្គផ្ដាច់ព្រ័ត្រខ្សែក្រវាត់គូបូតានេះ ដែលការចាញ់នៅនេះហាក់ដូចជាមិនខុសពិន្ទុគ្នាច្រើននោះទេ។ អ្នកប្រដាល់រូបនេះព្យាយាមចូលវ៉ៃរហូតតាំងពីទឹកទី១មកម្ល៉េះ ប៉ុន្តែហាក់អស់កម្លាំងនៅទឹកទី៥បន្តិចជាហេតុធ្វើឲ្យចាញ់ពិន្ទុតែម្ដង។

កីឡាករ សេង ស្រឿន ក្រហម

អ្នកប្រដាល់វ័យ២៧ឆ្នាំខាងលើបន្តទៀតថា ខ្លួនពិតជាពិបាកធ្វើចិត្តណាស់ ព្រោះកម្មវិធីគូបូតានេះ គេធ្លាប់ឡើងដល់វគ្គផ្ដាច់ព្រ័ត្រ២លើកមកហើយ ប៉ុន្តែចាញ់នៅវគ្គផ្ដាច់រហូត ហើយការចាញ់លើកនេះវាពិតជាធ្វើឲ្យរូបគេបាក់ទឹកចិត្តក្នុងការប្រកួតតែម្ដង ដូច្នេះប្រហែលត្រូវផ្អាកឡើងប្រកួតមួយរយៈសិនហើយ មិនទាន់ដឹងថានឹងត្រូវឡើងប្រកួតវិញពេលណានោះឡើយ។

កីឡាករ សេង ស្រឿន ពេលបានលេខ២គូបូតា

គូបញ្ជាក់ដែរថា សេង ស្រឿន ចាញ់ពិន្ទុកីឡាករ ផាន់ គ្រាន់ នៅវគ្គផ្ដាច់ព្រ័ត្រខ្សែក្រវាត់គូបូតា រដូវការទី៧នៅសង្វៀនបាយ័នស្ទឹងមានជ័យកាលពីយប់ថ្ងៃសុក្រ ទី៨ កញ្ញា កន្លងទៅនេះ ហើយការចាញ់នេះ ជាលើកទី៣ហើយនៅវគ្គផ្ដាច់ព្រ័ត្រសម្រាប់អាជីពប្រដាល់របស់គេ៕

អត្ថបទ៖ នួន ស៊ីណា