កុលសម្ព័ន្ធល្បីប្រើព្រួញពួនបាញ់យន្តហោះ ត្រូវគេលួចកាប់សម្លាប់អស់ជាច្រើន

2017-09-12 02:24:35
ចំនួនមតិ 0 | ចំនួនចែករំលែក 0

ចន្លោះមិនឃើញ

កុលសម្ព័ន្ធនៅព្រៃអាម៉ាហ្សូនមិនធ្លាប់ឃើញពិភពលោកខាងក្រៅជាង ២០នាក់ ដែលល្បីប្រើព្រួញ ធ្នូ លំពែងបាញ់យន្តហោះកាលពីប៉ុន្មានខែមុន មានសេចក្ដីរាយការណ៍ថា ត្រូវបានអ្នកជីករ៉ែមាសកាប់សម្លាប់នៅភាគពាយ័ព្យប្រទេសប្រេស៊ីល កាលពីពេលថ្មីៗនេះ។

អ្នកជីករ៉ែចំនួន ២នាក់ ត្រូវបានចាប់ខ្លួន បន្ទាប់ពីស្រវឹងស្រាធ្លោយនិយាយអំពីការសម្លាប់កុលសម្ព័ន្ធខាងលើ។ នេះបើតាមភ្នាក់ងារកិច្ចការជនជាតិភាគតិចប្រេស៊ីល (Funai)។ ជនសង្ស័យទាំងពីរបានអួតអាងពីការកាប់ចិញ្ច្រាំសាកសព រួចបោះពួកគេចូលទៅក្នុងទន្លេទៀតផង។

ការកាប់សម្លាប់នេះបានកើតឡើងនៅតំបន់ Vale do Javari ដែលស្ថិតនៅចម្ងាយប្រមាណ ១ ២០០គីឡូម៉ែត្រពីទីក្រុង Manause នៃរដ្ឋអាម៉ាហ្សូណាស់។ យោងទៅតាមមូលនិធិជាតិឥណ្ឌាបានរកឃើញថា យ៉ាងហោចណាស់មានជនជាតិភាគតិច ១៤ក្រុមរស់នៅតំបន់ទំហំ ២១លានអា ខាងលើ។

ចំណែកប្រធានកិច្ចការជនជាតិភាគតិចលោក Kanamari បានបង្ហើបថា សមាជិកក្រុមកុលសម្ព័ន្ធចន្លោះពី ១៨ ទៅ ២១នាក់ត្រូវបានគេកាប់សម្លាប់។ ឯប្រធានាធិបតីប្រេស៊ីលលោក Mechel Temer និងរដ្ឋាភិបាលរបស់លោក នឹងត្រូវទទួលខុសត្រូវទាំងស្រុងចំពោះការប្រល័យពូជសាសន៍នេះ ប្រសិនរឿងរ៉ាវបានបញ្ជាក់ជាផ្លូវការ។ ជាទូទៅ អ្នកឈ្លានពាន រំខានដល់ក្រុមកុលសម្ព័ន្ធមានដូចជា អ្នករានព្រៃ អ្នកប្រមាញ់សត្វ និងអ្នកជីករ៉ែជាដើម៕