កូរ៉េខាងត្បូង បង្ហើបថានឹងបង្កើតកងកម្លាំងពិសេស ដើម្បីធ្វើឃាត គីម ជុងអ៊ុន

2017-09-13 02:21:30
ចំនួនមតិ 0 | ចំនួនចែករំលែក 0

ចន្លោះមិនឃើញ

កូរ៉េខាងត្បូង កំពុងតែបង្កើត «អង្គភាពធ្វើឃាត» ដែលជាផ្នែកមួយនៃកងកម្លាំងយោធាពិសេសរបស់ខ្លួន ដែលត្រូវបានបណ្ដុះបណ្ដាលជាពិសេស ដើម្បីកម្ចាត់មេដឹកនាំផ្ដាច់ការកូរ៉េខាងជើង លោក គីម ជុងអ៊ុន។

បើតាមក្រសួងការពារជាតិកូរ៉េខាងត្បូង បានប្រកាសនៅសប្ដាហ៍នេះថា អង្គភាពពិសេសខាងលើនឹងត្រូវបានបង្កើតឡើង នៅចុងឆ្នាំនេះតែម្ដង។ តួនាទីរបស់វា គឺដើម្បីធ្វើឲ្យ លោក គីម ជុងអ៊ុន ព្រួយបារម្ភ និងភ័យខ្លាចចំពោះជីវិតរបស់លោក ហើយរារាំងមេដឹកនាំផ្ដាច់ការរូបនេះ មិនឲ្យប្រើអាវុធនុយក្លេអ៊ែរតទៅទៀត។

រដ្ឋមន្ត្រីក្រសួងការពារជាតិ លោក Song Young-moo បានប្រាប់សមាជិកសភាកូរ៉េខាងត្បូង នៅសប្ដាហ៍នេះថា អង្គភាពនេះនឹងមានទំហំកងទ័ព ចន្លោះពី ១ ៥០០ ទៅ ៣ ០០០ នាក់ ហើយនឹងត្រៀមខ្លួនសម្រាប់ដាក់ពង្រាយនៅចុងឆ្នាំ ២០១៧។

គួរបញ្ជាក់ឲ្យដឹងថា នាពេលកន្លងមក កូរ៉េខាងជើង តែងតែគំរាមកំហែងកម្ទេចកូរ៉េខាងជើង និងសម្ព័ន្ធមិត្តសំខាន់របស់គេ គឺ សហរដ្ឋអាមេរិក ដោយចោទប្រកាន់ប្រទេសទាំង ២ នេះថា បានត្រៀមខ្លួនជាស្រេចសម្រាប់ការលុកលុយមកលើប្រទេសខ្លួន។

សូមរំលឹកថា កាលពីថ្ងៃច័ន្ទ ទី១១ ខែកញ្ញា ឆ្នាំ២០១៧ ក្រុមប្រឹក្សាសន្តិសុខអង្គការសហប្រជាជាតិ បានដាក់ទណ្ឌកម្មចំនួន ៦ ធំៗ ទៅលើកូរ៉េខាងជើង ដូចជា ហាមឃាត់ការនាំចូលប្រេងកាត, ការនាំចេញវាយនភណ្ឌ, បញ្ចប់កិច្ចសន្យាការងារក្រៅប្រទេស, បង្ក្រាបការរត់ពន្ធ, បញ្ឈប់ការបណ្ដាក់ទុនជាមួយប្រទេសដទៃទៀត និងការដាក់ទណ្ឌកម្មលើអង្គភាពរដ្ឋាភិបាលកូរ៉េខាងជើង បន្ទាប់ពីប្រទេសផ្ដាច់ការមួយនេះ បានធ្វើតេស្តសាកល្បងអាវុធនុយក្លេអ៊ែរ ជាលើកទី៦ កាលពីពេលថ្មីៗកន្លងទៅ៕