ផលិតកម្ម​ធំ​ SM ចំណាយ​ប្រាក់ ៩០លាន​ដុល្លារ​ ដើម្បី​ធ្វើ​ស្ថានសួគ៌​ K-Pop!

  • 2017-09-13 05:01:28
  • ចំនួនមតិ

ចន្លោះមិនឃើញ

គម្រោង​ចុងក្រោយ​របស់​ផលិតកម្ម​យក្ស​របស់​កូរ៉េ​ SM បាន​ចាប់​ផ្ដើម​បើក​ដំណើរការ​សាង​សង់​អគារ​ Changwon SMTown ហើយ (ពីមុន​ជា​ Changwon Culture Complex Town)។

គម្រោង​សាងសង់​មួយ​នេះ​ គ្រោង​នឹង​បញ្ចប់​នៅ​ខែ​មេសា​ ឆ្នាំ​២០២០ ហើយ​បើ​តាម​អភិបាល​ក្រុង​ Changwon លោក​ Ahn Sang Soo បាន​និយាយ​ពី​អត្ថន័យ​ជ្រាលជ្រៅ​កម្រិត​ណា​ចំពោះ​ទីក្រុង​ នៅ​ពេល​គម្រោង​ដែល​ចំណាយ​ទឹក​ប្រាក់​ ១០១ប៊ីលានវ៉ុន​ (ប្រហែល​ ៨៩,៩២​លាន​ដុល្លារ) មួយ​នេះ​មាន​វត្តមាន​ក្នុង​ទីក្រុង។

មន្ត្រី​ក្នុង​ទីក្រុង​ Changwon កំពុង​បើ​កដំណើរ​ការ​សាងសង់ អគារ​ Changwon SMTown

“វា​គឺ​ជា​ថ្ងៃ​ដ៏​មាន​ន័យ​បំផុត​ ដែល​គម្រោង​ថ្មី​អស្ចារ្យ​មួយ​ទៀត​ នឹង​លេច​រូបរាង​ឡើង​ក្នុង​ទីក្រុង​ Changwon។ ទិស​ដៅ​របស់​ទីក្រុង​ គឺ​ចង់​ក្លាយ​ជា​ទីក្រុង​នៃ​សិល្បៈ​ និង​វប្បធម៌ ហើយ​ពេល​នេះ​យើង​កាន់​តែ​ខិត​ជិត​ដល់​អ្វី​ដែល​យើង​ចង់​បាន​ហើយ។ ជាមួយ​ការ​ចូលរួម​សហការ​របស់​ផលិតកម្ម​ SM បាន​ធ្វើ​ឲ្យ​ទីក្រុង​ Changwon បាន​ក្លាយ​ជា​មជ្ឈមណ្ឌល​វប្បធម៌​មួយ​របស់​កូរ៉េ”។ នេះ​បើ​តាម​សម្ដី​របស់​លោក​អភិបាល​ក្រុង។

គំរូ​អគារ​ថ្មី

ដោយឡែក​ចំពោះ​ ក្រុមហ៊ុន SM នឹង​​បន្ថែម​សាល​មហោស្រព​ធំ​មួយ​ទៀត​ដែរ​ សម្រាប់​សិល្បករ-សិល្បការិនី​ ពេល​ដែល​មាន​កម្មវិធី​ជួបជុំ​អ្នក​គាំទ្រ​របស់​ខ្លួន​ទាំង​អស់ ក៏​ដូចជា​ទុក​ប្រារព្ធ​កម្មវិធី​ផ្សេងៗ​ផង​ដែរ។ អ្វី​ដែល​ពិសេស​ជាង​នេះ​ទៀត​ ក្រុមហ៊ុន​នេះ​ក៏​គ្រោង​រៀបចំ​បន្ទប់​សណ្ឋាគារ​ ២​ជាន់​ដែរ ដើម្បី​ឲ្យ​ភ្ញៀវ​ដែល​ទោ​កម្សាន្ត​នៅ​ទីនោះ​ ទទួល​បាន​បទ​ពិសោធន៍​ពី​វប្បធម៌​កូរ៉េ។

តារា​ប្រុស​ស្រី​ប្រចាំ​ផលិតកម្ម​ SM

សរុប​សេចក្ដី​មក​ អ្វី​ៗ​គ្រប់​យ៉ាង​ ត្រូវ​បាន​គិត​គូរ​ និង​រៀប​ចំ​យ៉ាង​ឥតខ្ចោះ​ ដើម្បី​បើ​កឱកាស​ឲ្យ​ភ្ញៀវ​ទេសចរបាន​ស្គាល់​ និង​បាន​លម្ហែ​អារម្មណ៍​ សប្បាយ​រីករាយ​ជាមួយ​វប្បធម៌​ ជាពិសេស​វិស័យ​សិល្បៈ​កូរ៉េ (K-Pop)។ ម្យ៉ាង​ទីកន្លែង​នេះ នឹង​ក្លាយ​ជា​ស្ថានសួគ៌​​ក្រោម​មេឃ​ថ្មី​មួយ​ទៀត​ប្រចាំ​តំបន់ ហើយ​រឹត​តែ​ត្រូវ​ប៉ាន់​អ្នកគាំទ្រ​វិស័យ​ K-Pop ព្រោះ​ថា​ តារាល្បីៗ​ប្រចាំ​ផលិតកម្ម​ SM ក៏​អាច​ស្នាក់នៅ​សណ្ឋាគារ​នោះ​ដែរ៕


ប្រភព៖ Koreaboo ប្រែ​សម្រួល៖ យី សុធារី