PRUDENTIAL បើកសាខាថ្មីនៅសៀមរាបទៀតហើយ បន្ទាប់ពីលេចមុខនៅបាត់ដំបង

2017-09-14 09:11:08
ចំនួនមតិ 0 | ចំនួនចែករំលែក 0

ចន្លោះមិនឃើញ

PRUDENTIALបានពង្រីកសាខាថ្មីរបស់ខ្លួននៅខេត្តសៀមរាប ដើម្បីផ្ដល់ផលិតផល និងសេវាការពារផ្នែកហិរញ្ញវត្ថុដល់ប្រជាពលរដ្ឋកម្ពុជាឲ្យបានកាន់តែច្រើនថែមទៀត ដោយការសម្ពោធនេះមានការចូលរួមពីឯកឧត្ដម ទៀ សីហា អភិបាលរងខេត្តសៀមរាប លោក អ៊ិន មាត្រា តំណាងក្រសួងសេដ្ឋកិច្ច និងហិរញ្ញវត្ថុ និងលោក David Nutman អគ្គនាយកPRUDENTIAL។

លោក David Nutman បាននិយាយថា៖ "កម្មវិធីថ្ងៃនេះ គឺជាសក្ខីកម្មមួយពីការខិតខំពង្រីក និងការផ្ដល់សេវាធានារ៉ាប់រងអាយុជីវិត ដល់ប្រជាពលរដ្ឋកម្ពុជាឲ្យបានកាន់តែច្រើនថែមទៀត ហើយយើងនឹងខិតខំពង្រឹងការផ្ដល់សេវា និងផលិតផលដែលល្អប្រសើរនៅក្នុងខេត្តសៀមរាប"។

PRUDENTIAL នឹងរៀបចំកម្មវិធីអប់រំផ្នែកហិរញ្ញវត្ថុដល់ពលរដ្ឋក្នុងខេត្តសៀមរាប ដើម្បីបង្ហាញឲ្យឃើញពីសារៈសំខាន់នៃការកសាងផែនការហិរញ្ញវត្ថុឲ្យបានល្អប្រសើរ ក៏ដូចជាលើកកម្ពស់ការយល់ដឹងពីសេវាធានារ៉ាប់រងអាយុជីវិត។

អភិបាលរងខេត្តសៀមរាប ឯកឧត្ដម ទៀ សីហា បានលើកឡើងថា៖ "តាមរយៈការវិនិយោគនេះ ខ្ញុំសង្ឃឹមថា ក្រុមហ៊ុននឹងចូលរួមប្រកួតប្រជែងតម្លៃលើទីផ្សារប្រកបដោយសមធម៌ និងផ្ដល់សេវាកម្មជាច្រើនទៀតតាមតម្រូវការរបស់អ្នកប្រើប្រាស់ ព្រមទាំងបានផ្ដល់ការងារដល់ប្រជាពលរដ្ឋក្នុងខេត្តរបស់យើង"។

លោក អ៊ិន មាត្រា តំណាងក្រសួងសេដ្ឋកិច្ច និងហិរញ្ញវត្ថុ ក៏មានមតិស្រដៀងគ្នានេះដែរថា៖ "ការពង្រីកសាខាថ្មីបន្ថែមតាមបណ្ដាខេត្ត គឺជាភស្តុតាងមួយដែលបញ្ជាក់ពីកិច្ចខិតខំរបស់ក្រុមហ៊ុន និងការសហការជាមួយបញ្ញត្តិករធានារ៉ាប់រង អាជ្ញាធរដែនដីគ្រប់លំដាប់ថ្នាក់ ដើម្បីផ្ដល់សេវាកម្មធានារ៉ាប់រង ឆ្ពោះទៅការសម្រេច និងដោះស្រាយសំណងទាន់ពេលជូនអតិថិជន"។

ការពង្រីកការិយាល័យនេះ ក៏នឹងជួយពង្រឹងភាពជាដៃគូជាមួយដៃគូយុទ្ធសាស្ត្ររបស់ខ្លួន គឺធនាគារអេស៊ីលីដា ដែលក្នុងនោះ ផលិតផលធានារ៉ាប់រងអាយុជីវិតរបស់ PRUDENTIAL កំពុងផ្ដល់ជូននៅតាមសាខា អេស៊ីលីដា ជាង ១០០ កន្លែងទូទាំងប្រទេស។

ចង់ដឹងច្បាស់ពីការបើកសាខាថ្មីរបស់ PRUDENTIAL សូមមើលវីដេអូខាងក្រោម៖

ដោយ៖ វិទូ