ឆ្នេរអូរត្រេះ-ពយម៉ាចូវ ជាឆ្នេរបង្កើតថ្មី ស្ងប់ស្ងាត់ និងសម្បូរក្ដាមសមុទ្រ និងគ្រំ ជាប់ផ្ទាំងថ្ម

2017-09-15 04:04:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រៅពីអ្នករស់នៅក្នុងខេត្តព្រះសីហនុ មានភ្ញៀវទេសចរតិចតួចណាស់ស្គាល់ឆ្នេរអូរត្រេះ-ពយម៉ាចូវ ព្រោះវាជារមណីយដ្ឋានទើបបង្កើតថ្មី ក្រោយពីកសាងផ្លូវរួចរាល់ ថ្មីៗនេះ។ ប៉ូយម៉ាចូវ គឺប្រិយមិត្តត្រូវធ្វើដំណើរប្រហែលជា ២០នាទី រាប់ពីឆ្នេរអូត្រេស តាមផ្លូវលំ រហូតដល់ទីតាំងបង្កើតថ្មីមួយនេះ។

តើអ្វីទៅជាលក្ខណៈពិសេស ពយម៉ាចូវ? ចម្លើយយ៉ាងខ្លី ព្រោះតំបន់នេះ នៅមិនទាន់មានភ្ញៀវទៅលេងច្រើន ដូច្នេះ សម្រស់ធម្មជាតិមានច្រើន ដូចជា ឆ្នេរស្រស់ស្អាត មានព្រៃប្រឹក្សា និង ជាពិសេសសំបូរគ្រឿងសមុទ្រ ដូចជា ក្ដាម ត្រី និង មឹក ជាប់ផ្ទាំងថ្មធំៗ ក្នុងទឹកសមុទ្រ ដែលភ្ញៀវខ្លះបានយកវាធ្វើម្ហូបភ្លាមៗ នៅហ្នឹងកន្លែងតែម្ដង។ អ្វីដែលកាន់តែពិសេស តំបន់នេះមានខ្យល់អាកាសល្អបរិសុទ្ធ អមដោយឆ្នេរសស្អាត អាចឲ្យភ្ញៀវទេសចរងូតទឹកលេងកម្សាន្តយ៉ាងសប្បាយរីករាយ។

ទោះបីជាយ៉ាងណាក៏ដោយ ប្រសិនបើប្រិយមិត្តមិនទាន់បានត្រៀមអាហារតាមខ្លួនទេ នោះនឹងប្រឈមអត់អីញុំាជាមិនខាន។ មិនមានអ្វីញុំា ព្រោះរមណីយដ្ឋានទើបបង្កើតថ្មីនេះ នៅមិនទាន់មានអ្នកលក់ដូរហូរហែ ដូចនៅឆ្នេរអូរឈើទាល ឆ្នេរអូរត្រេះ ខេត្តព្រះសីហនុ នៅឡើយ។ ម៉្លោះហើយ ប្រសិនបើភ្ញៀវទាំងឡាយចង់ទៅកម្សាន្តនៅទីនោះ កុំភ្លេចវេចបាយ ម្ហូបអាហារ ភេសជ្ជៈ ផ្សេងៗទៅជាមួយ ដើម្បីក្រាលកន្ទេលអង្គុយញុំា ស្រូបខ្យល់អាកាសបរិសុទ្ធ លាយឡំសម្រស់ធម្មជាតិ នឹងធ្វើឲ្យអ្នកទាំងអស់គ្នារសាត់អស់ទុក្ខកង្វល់ ក្រោយពីបំពេញការងារយ៉ាងហត់នឿយជាក់ជាមិនខាន។

តែអ្វីដែលសំខាន់សូមប្រិយមិត្តកុំភ្លេចរឿងមួយណា៎! «ញុំាអីហើយកុំភ្លេចវេចខ្ចប់សំរាមទុកដាក់ឲ្យបានស្រួលបួល ឬចោលសំរាមក្នុងធុងសំរាម ដើម្បីរក្សាអនាម័យ និងរក្សាសម្បត្តិធម្មជាតិយើងទាំងអស់គ្នា»៕

សូមទស្សនាវីដេអូ