ជីវិតអ្នកធាក់ស៊ីក្លូ ហាលភ្លៀង ហាលខ្យល់ តែចំណូលបានត្រឹមមួយរស់
- 2017-09-15 09:40:02
- ចំនួនមតិ 0 | ចំនួនចែករំលែក 0
ជីវិតអ្នកធាក់ស៊ីក្លូ ហាលភ្លៀង ហាលខ្យល់ តែចំណូលបានត្រឹមមួយរស់
ចន្លោះមិនឃើញ
ស៊ីក្លូជាមធ្យោបាយដឹកជញ្ជូនដ៏ពេញនិយមមួយក្នុងប្រទេសកម្ពុជា តាំងពីសម័យអាណានិគមនិយមបារាំងមកម្ល៉េះ។ តែក្រោយមកវត្តមានស៊ីក្លូចាប់ផ្ដើមបាត់បង់បន្តិចម្ដងៗ ពីមួយជំនាន់ទៅមួយជំនាន់ រហូតមកដល់បច្ចុប្បន្ន មានអ្នករត់ស៊ីក្លូមិនច្រើនប៉ុន្មានឡើយប្រកបរបរនេះ ហើយភាគច្រើនជាមនុស្សចាស់កម្លាំងខ្សោយ។ ប្រើកម្លាំងជើងប្រឹងធាក់ដឹកទាំងមនុស្សផង ឥវ៉ាន់សំពីងសំពោងផង អ្នករត់ស៊ីក្លូវ័យចំណាស់២រូប ប្រាប់ថា របរនេះបានត្រឹមតែមួយរស់ ថ្ងៃខ្លះសឹងតែរកចំណូលមិនបានផង តែនៅខំតស៊ូ ដើម្បីរកលុយចិញ្ចឹមជីវិត និងគ្រួសារ។
រៀបរាប់មកកាន់ Sabay លោក ហេង ធា អាយុ៥២ ឆ្នាំ បានប្រាប់ថា ប្រកបរបររត់ស៊ីក្លូរយៈពេល ៣០ឆ្នាំមកហើយ។ ចំណែកឯចំណូលបានមកពីការរត់ស៊ីក្លូនេះ បានត្រឹមតែមួយរស់ប៉ុណ្ណោះ ដោយក្នុងមួយថ្ងៃអាចរកបានត្រឹមតែ ១ ០០០០ទៅ ១ ២០០០ រៀល ហើយថ្ងៃខ្លះសឹងតែរកមិនបានផងក៏មានដែរ។ក្នុងនោះត្រូវចំណាយទៅលើថ្លៃបាយ ១ថ្ងៃ ៨ ០០០ ទៅ ៩ ០០០រៀលសល់ពីនោះ លោកត្រូវសន្សំទុកយកទៅផ្ញើគ្រួសារនៅឯស្រុកកំណើត។
ត្រាច់ចរ តាំងពីស្រុកពញាឮ ខេត្តកណ្ដាល មកផ្សងព្រេងរត់ស៊ីក្លូនៅភ្នំពេញ បុរសវ័យកណ្ដាលរូបនេះ ប្រាប់ថា ចេញធាក់តាំងព្រឹកព្រលឹមម៉ោង ៤ទៀបភ្លឺ ហើយយប់ឡើងត្រូវសម្រាកនៅលើស៊ីក្លូតែម្ដង ព្រោះមិនមានលទ្ធភាពជួលផ្ទះស្នាក់នៅនោះឡើយ។
រយៈពេលជាង ៣០ឆ្នាំមកនេះ លោក ហេង ធា លើកឡើងថា បើនិយាយអំពីផលលំបាកវិញ គឺស្ទើរតែនិយាយលែងចេញទៅហើយ តែបើគ្មានជម្រើសផ្សេងមានតែតស៊ូបន្តទៅទៀត។ "ហឹមម...បើយាយពីរឿងលំបាកវិញ និយាយលេងចេញហើយក្មួយអើយ តែធ្វើម៉េចបើយើងក្រ ចេះតែទ្រាំៗទៅ" នេះជាសម្ដីពិតរបស់រត់ស៊ីក្លូ រៀបរាប់ទាំងអួលដើមក។
លោក ហេង ធា បន្តទៀតថា ថ្ងៃខ្លះសឹងតែគ្មានអ្នកណាជិះក៏មាន ហើយនេះក៏ជាមូលហេតុ អ្នករត់ស៊ីក្លូដទៃទៀតសម្រេចចិត្តឈប់តែម្ដង ព្រោះចិញ្ចឹមខ្លួនមិនចង់រស់ផង ដោយសារបច្ចុប្បន្ននេះប្រជាពលរដ្ឋនិយមជិះរ៉ឺម៉កកង់ ឫម៉ូតូឌុបឯណោះទេ។
មកជួបជាមួយលោកតា កង សែម វិញប្រកបមុខរបររត់ស៊ីក្លូនេះ តាំងពីសម័យសង្គមរាស្ត្រនិយមមកម្ល៉េះ ហើយក្នុងថ្ងៃអាចរកប្រាក់ចំណូលច្រើនបំផុតត្រឹមតែ ២ ០០០០ប៉ុណ្ណោះ។ លោកតា ប្រាប់ថា ផ្ញើជីវិតលើរបរនេះហើយ ព្រោះមិនដឹងពឹងអ្នកណា បើកូនសុទ្ធតែក្រដូចគ្នា។ ដូច្នេះហើយមានតែខំរកខ្លួនឯង ល្អជាជាងលើកដៃសំពះសុំលុយគេ។
ក្រោកធាក់ស៊ីក្លូតាំងពីម៉ោងជិត ៥ភ្លឺ លោកតា មានស្រុកកំណើតមកពីខេត្តតាកែវ រូបនេះប្រាប់ថា មុខរបរនេះជួបផលលំបាកច្រើនណាស់ត្រូវចំណាយកម្លាំងធាក់បែកញើសជោកទាំងកណ្ដាលថ្ងៃ ហើយយប់ឡើងមិនមានកន្លែងសម្រាកត្រឹមត្រូវនោះទេ បានត្រឹមសម្រាន្តក្នុងស៊ីតាមសំយាបផ្ទះគេប៉ុណ្ណោះ៕
ទស្សនាវីដេអូខាងក្រោមនេះ៖