រវាង Resolution និង Pixel Density តើមានទំនាក់ទំនងអ្វីខ្លះលើអេក្រង់ស្មាតហ្វូន?

2017-09-16 04:29:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ទាក់ទងនឹងអេក្រង់នៃស្មាតហ្វូននាពេលបច្ចុប្បន្ន បើកាលណាចង់ប្រៀបធៀបគ្នា អ្នកត្រូវដឹងពីកម្រិត Resolution និង Pixel Density។ តើពាក្យទាំង ២ នេះមានអត្ថន័យដូចម្ដេច? ហើយមានទំនាក់ទំនងជាមួយគ្នាបែបណាខ្លះ?

អ្វីទៅជា Resolution?

ជាដំបូងយើងត្រូវស្គាល់ពាក្យ Pixel ជាមុនសិន ដោយនេះជាបណ្ដុំនៃបំណែកធាតុតូចបំផុត ដែលត្រូវបង្កើតចេញជារូបភាពមួយ។ មានរាងជាការ៉េតូចៗ ខណៈបើគ្រាប់ភីកសែលកាន់តែច្រើន នោះគុណភាពបង្ហាញនៃរូបភាពឲ្យយើងឃើញកាន់តែច្បាស់និងងាយស្រួលពិនិត្យមើល។

Resolution ឬគុណភាពបង្ហាញរូបភាពអេក្រង់ ជារង្វាស់នៃគ្រាប់ភីកសែលជាច្រើន រាប់ពីឆ្វេងទៅស្ដាំ និងពីផ្នែកបាតរហូតដល់កំពូលនៃអេក្រង់ស្មាតហ្វូន។ ផ្នែកពីឆ្វេងទៅស្ដាំ យើងហៅថាអ័ក្សអាប់ស៊ីស X និងពីបាតទៅកំពូល ជាអ័ក្សអរដោណេ Y។ ឧបមាថាអេក្រង់ស្មាតហ្វូនមួយ រាប់ពីឆ្វេងទៅស្ដាំមានកម្រិតបង្ហាញ ៧២០ ភីកសែល និងពីបាតទៅកំពូល ១ ០៨០ ភីកសែល។ បែបនេះគេត្រូវសរសេរជាន័យពេញថា ៧២០ x ១០៨០ ភីកសែល។ (ជាទូទៅគេត្រូវសរសេរតួលេខនៃអ័ក្សអាប់ស៊ីសមុនអ័ក្សអរដោណេ)។

អ្វីទៅជា Pixel Density?

Pixel Density ឬដង់ស៊ីតេភីកសែល ជារង្វាស់នៃឯកតាម្យ៉ាង ដែលគិតជា PPi (Pixel Per Inch)។ កម្រិត PPi កាន់តែខ្ពស់ គុណភាពពណ៌និងភាពច្បាស់នៃអេក្រង់ នឹងធ្វើឲ្យយើងមើលឃើញកាន់តែច្បាស់ត្រជាក់ភ្នែក ប៉ុន្តែកម្រិត PPi ក៏មានការកំណត់ត្រឹមទំហំតួលេខណាមួយ ដែលភ្នែកមនុស្សមិនអាចមើលឃើញ បើខ្ពស់ហួសពេក។ ឧទាហរណ៍: ស្មាតហ្វូន iPhone X មានដង់ស៊ីតេភីកសែល 458 PPi។

ទំនាក់ទំនងរវាង Resolution និង Pixel Density:

បើនិយាយពីទំនាក់ទំនងរវាងពាក្យទាំង ២ នេះគឺចាំបាច់បំផុត ព្រោះគេមិនអាចគណនាចេញកម្រិត PPi នៃដង់ស៊ីតេភីកសែល ដោយមិនប្រើទំហំ Resolution បាននោះទេ ទៀតសោតគេក៏ត្រូវការ Display Size ឬទំហំអេក្រង់ ឧទាហរណ៍: ទូរសព្ទមានអេក្រង់ ៤,៧ អ៊ីញ។ ខាងក្រោមបង្ហាញអ្នកពីរូបមន្តនិងវិធីគណនារក Pixel Density។

បញ្ជាក់ថាចំពោះលក្ខខណ្ឌខ្លះ ផ្អែកលើទំហំអេក្រង់ គេមិនបានបង្ហាញច្បាស់នោះទេ ដោយខ្លះគេបង្គត់យក ម្ល៉ោះហើយចម្លើយនៃ PPi អាចបង្ហាញលេខរាងច្រៀកគ្នាបន្តិច។ សម្រាប់រូបមន្តនេះ អ្នកអាចយកទៅប្រើការបានទាំងសម្រាប់ទូរទស្សន៍, នាឡិកាឆ្លាតវៃ, ថេបប្លែត និងឧបករណ៍អេឡិចត្រូនិកមួយចំនួនទៀត៕

ទទួលបានព័ត៌មានថ្មីៗ គន្លឹះមានប្រយោជន៍រួមទាំងចំណេះដឹងផ្សេងៗពីបច្ចេកវិទ្យា កុំភ្លេចចុច Like Page Sabay News Technology...

ចុចអានបន្ត ៖

ប្រភព៖ Teknosrc ប្រែសម្រួល ៖ កៅ រក្សា