ប្រឡងច្រៀងធ្លាក់មែន តែ Celine ទទួលបានរឿងអស្ចារ្យក្នុងជីវិតពី Celine Dion!

2017-09-25 23:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្វីត្បិតមិនបានទទួលជ័យជម្នះពីកម្មវិធី America's Got Talent ប៉ុន្តែថ្មីៗនេះ Celine Tam ស្រាប់តែបានជួបរឿងល្អមួយ ដែលអាចនិយាយបានថា ប្រាថ្នាមួយទៀតរបស់នាងបានសម្រេចហើយ។

កុមារីគួរឲ្យស្រឡាញ់ Celine Tam បានត្រូវតារាក្នុងដួងចិត្ត Celine Dion អញ្ជើញឲ្យចូលរួមជាភ្ញៀវកិត្តិយសក្នុងកម្មវិធីរបស់នាងនៅ Las Vegas តាមរយៈគណនី Twitter។

នេះជាកិត្តិយសដ៏ធំធេង សម្រាប់នាងតូចវ័យ ៩ឆ្នាំរូបនេះ និងគ្រួសារ ខណៈកំពូលតារាល្បីសញ្ជាតិកាណាដាផ្ដល់កិត្តិយសអស្ចារ្យនេះ។

ប្រិយមិត្តច្បាស់ជានៅចាំមិនទាន់ភ្លេចទេ ពេលដែល Celine Tam បង្ហាញមុខជាលើកដំបូងក្នុងកម្មវិធី America's Got Talent វគ្គ Auditions នាងបានលើកយកបទចម្រៀង "My Heart Will Go On” របស់ Celine Dion មកបកស្រាយ ធ្វើឲ្យមហាជនចាប់អារម្មណ៍ជាខ្លាំង។

គួរឲ្យស្ដាយ កុមារី Celine មិនបានឈានមកវគ្គផ្ដាច់ព្រ័ត្រទេ ពោលគឺបានជាប់ត្រឹមវគ្គពាក់កណ្ដាលផ្ដាច់ព្រ័ត្រប៉ុណ្ណោះ ប៉ុន្តែនាងមិនបានអាក់អន់ចិត្តនោះទេ ថែមទាំងបានអរគុណគ្រួសារ និងអ្នកគាំទ្ររបស់ខ្លួនទាំងអស់តាំងពីដើមមកផងដែរ។

ក្នុងនោះ បើតាមអ្វីដែលបង្ហោះលើគណនី Twitter នាងបានបង្ហាញពីប្រាថ្នារបស់ខ្លួនថា សង្ឈឹមថ្ងៃណាមួយនាងនឹងបានច្រៀងជាមួយ តារាសំណព្វចិត្ត Celine Dion ហើយពេលនេះប្រាថ្នារបស់នាងបានសម្រេចហើយ៕

ចុចអាន៖

ប្រភព៖ justjared ប្រែសម្រួល៖ យី សុធារី