កូរ៉េខាងជើង ចោទប្រកាន់ សហរដ្ឋអាមេរិក ថាជាអ្នកប្រកាសសង្គ្រាម

2017-09-26 00:35:26
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋមន្ត្រីក្រសួងការបរទេសរបស់ប្រទេសកូរ៉េខាងជើង លោក Ri Yong-ho បានចោទប្រកាន់លោកប្រធានាធិបតីអាមេរិក ដូណាល់ ត្រាំ ថាបានប្រកាសសង្គ្រាមមកលើប្រទេសរបស់ខ្លួន និងបាននិយាយថា ទីក្រុងព្យុងយ៉ាងមានសិទ្ធិបាញ់ទម្លាក់យន្តហោះទម្លាក់គ្រាប់បែកអាមេរិកទៀតផង។

លោក Ri Yong-ho

លោក Ri បានអះអាងទៀតថា កូរ៉េខាងជើង ក៏អាចអនុវត្ត (បាញ់ទម្លាប់យន្តហោះអាមេរិក) បានដែរ បើទោះបីជាយន្តហោះចម្បាំងទាំងនោះ មិនស្ថិតនៅលើដែនអាកាសរបស់កូរ៉េខាងជើងក៏ដោយ។

ទោះបីជាយ៉ាងណា សេតវិមាន បានច្រានចោលសេចក្ដីថ្លែងការណ៍មួយនេះថា មិនទំនងទាល់តែសោះ។ ជាមួយគ្នានេះដែរ មន្ទីរបញ្ចកោណ បានព្រមានទីក្រុងព្យុងយ៉ាង ឲ្យបញ្ឈប់ការបង្កហេតុនានាផងដែរ។ អ្នកនាំពាក្យអង្គការសហប្រជាជាតិម្នាក់ បាននិយាយថា ការពិភាក្សាដ៏ក្ដៅគគុក អាចនាំឲ្យមានការយល់ខុសកាន់តែធ្ងន់ធ្ងរ។

គួរបញ្ជាក់ថា ការអត្ថាធិប្បាយរបស់លោក Ri គឺជាការឆ្លើយតបទៅនឹងសារ នៅលើបណ្ដាញសង្គម Twitter របស់លោក ត្រាំ ដែលនិយាយថា មេដឹកនាំកូរ៉េខាងជើង នឹងមិនស្ថិតនៅយូរទៀតទេ ប្រសិនបើពួកគេបន្តវោហារសាស្ត្ររបស់ពួកគេតទៅទៀត។

សារនៅលើបណ្ដាញសង្គម Twitter របស់លោក ត្រាំ

ប្រធានាធិបតីអាមេរិក ដូណាល់ ត្រាំ

លោក Ri បានប្រាប់ក្រុមអ្នកសារព័ត៌មាន នៅពេលលោកចាកចេញពីទីក្រុងញីវយ៉ក ដែលជាកន្លែងលោកថ្លែងទៅកាន់មហាសន្និបាតអង្គការសហប្រជាជាតិ កាលពីថ្ងៃសៅរ៍សប្ដាហ៍មុន ថា «ពិភពលោកទាំងមូលគួរតែចងចាំយ៉ាងច្បាស់ថា គឺសហរដ្ឋអាមេរិកទេ ដែលជាអ្នកប្រកាសសង្គ្រាមមុនគេបង្អស់ មកលើប្រទេសរបស់យើង (កូរ៉េខាងជើង)»។

គីម ជុងអ៊ុន

«ចាប់តាំងពីសហរដ្ឋអាមេរិក បានប្រកាសសង្គ្រាមមកលើប្រទេសរបស់យើងមក យើងនឹងមានសិទ្ធិធ្វើគ្រប់វិធានការដើម្បីប្រឆាំងតបត រាប់បញ្ចូលទាំង សិទ្ធិបាញ់ទម្លាប់យន្តហោះទម្លាក់គ្រាប់បែកអាមេរិកទៀតផង បើទោះបីជាវាមិនស្ថិតនៅលើដែនអាកាសនៃប្រទេសរបស់យើងក៏ដោយ»។ លោក Ri បានបន្ថែមយ៉ាងដូច្នេះ។

ឆ្លើយតបសំដៅទៅលើសាររបស់លោក ត្រាំ រដ្ឋមន្ត្រីកូរ៉េខាងជើងរូបនេះ បាននិយាយថា ចំពោះសំណួរដែលថា នរណានឹងមិននៅបានយូរទៀតនោះ នឹងត្រូវបានឆ្លើយតបដោយប្រទេសរបស់លោកជាមិនខាន។

គីម ជុងអ៊ុន

គួរឲ្យដឹងថា សេចក្ដីថ្លែងការណ៍របស់លោក Li បានធ្វើឡើង រយៈពេល ២ ថ្ងៃប៉ុណ្ណោះ បន្ទាប់ពីយន្តហោះចម្បាំងអាមេរិក បានហោះហើរនៅជិតឆ្នេរសមុទ្ររបស់កូរ៉េខាងជើង ក្នុងការបង្ហាញកម្លាំងយោធាមួយ។

យ៉ាងណាមិញ អ្នកនាំពាក្យមន្ទីរបញ្ចកោណ លោក Col Robert Manning បានឆ្លើយតបដោយនិយាយថា «ប្រសិនបើកូរ៉េខាងជើង មិនបញ្ឈប់សកម្មភាពបង្កហេតុរបស់ពួកគេទេ នោះយើងនឹងធ្វើឲ្យប្រាកដថា យើងផ្ដល់ជម្រើសដល់ប្រធានាធិបតី (ត្រាំ) ក្នុងការដោះស្រាយជាមួយ កូរ៉េខាងជើង»៕

ចុចអាន៖

ប្រភព៖ BBC ប្រែសម្រួល៖ សេង ឡុង