ដូណាល់ ត្រាំ ដាក់រហស្សនាមថ្មីឲ្យ គីម ជុងអ៊ុន

2017-09-18 00:47:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីអាមេរិក លោក ដូណាល់ ត្រាំ បានហៅមេដឹកនាំកូរ៉េខាងជើង លោក គីម ជុងអ៊ុន ថាជា «បុរសរ៉ុក្កែត» (Rocket Man) នៅក្នុងសារលើបណ្ដាញសង្គម Twitter ដែលនិយាយអំពីការសន្ទនាជាមួយប្រធានាធិបតីកូរ៉េខាងត្បូង លោក ម៊ូន ជេអ៊ីន (Moon Jae-in)។

លោក ដូណាល់ ត្រាំ

មេដឹកនាំអាមេរិករូបនេះ បានបង្ហោះសារនិយាយថា លោកបាននិយាយជាមួយ លោក ម៊ូន ជេអ៊ីន អំពីស្ថានការណ៍ជាមួយប្រទេសកុម្មុយនិស្តសម្ងាត់ កូរ៉េខាងជើង ដែលបានចាប់ផ្ដើមបាញ់មីស៊ីលជាបន្តបន្ទាប់ នៅប៉ុន្មានសប្ដាហ៍ចុងក្រោយនេះ ហើយថែមទាំងបានធ្វើការសាកល្បង នុយក្លេអ៊ែរដ៏មានឥទ្ធិពលបំផុតរបស់ខ្លួនទៀតផង។

ការបង្ហោះសាររបស់ប្រធានាធិបតីរូបនេះ បានធ្វើឡើងនៅថ្ងៃអាទិត្យ បន្ទាប់ពីមានការកើនឡើងនៃភាពតានតឹង នៅលើឧបទ្វីបកូរ៉េ ហើយបានព្រមព្រៀងដាក់ទណ្ឌកម្មកាន់តែខ្លាំងក្លា ទៅលើកូរ៉េខាងជើង បន្ទាប់ពីមានការសាកល្បងនុយក្លេអ៊ែរ និងមីស៊ីលនាពេលថ្មីៗនេះ។

លោក ម៊ូន ជេអ៊ីន

«មេដឹកនាំទាំង ២ បានព្រមព្រៀងគ្នាពង្រឹងកិច្ចសហប្រតិបត្តិការ ហើយបន្ថែមការដាក់ទណ្ឌកម្មកាន់តែខ្លាំងក្លា និងជាក់ស្ដែង ទៅលើកូរ៉េខាងជើង ដើម្បីឲ្យដឹងថា សកម្មភាពបង្កហេតុ នាំឲ្យមានការចែកឲ្យនៅដោយឡែកចំពោះផ្នែកការទូត និងរងសម្ពាធសេដ្ឋកិច្ច»។ នេះបើតាមសម្ដីអ្នកនាំពាក្យនៃការិយាល័យរបស់ លោក ម៊ូន។

លោក គីម ជុងអ៊ុន

ជាមួយគ្នានេះដែរ អ្នកនាំពាក្យរូបនេះ បានបន្ថែមឲ្យដឹងថា លោក ម៊ូន និង លោក ត្រាំ បានថ្កោលទោសយ៉ាងខ្លាំងចំពោះការបាញ់មីស៊ីលលើកចុងក្រោយបង្អស់របស់កូរ៉េខាងជើង និងបានឯកភាពគ្នាថា ប្រទេសទាំង ២ នឹងធ្វើការជាមួយសហគមន៍អន្តរជាតិ ដើម្បីអនុវត្តដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិចុងក្រោយបំផុត។

គួររំលឹកឲ្យដឹងផងដែរថា ដំណោះស្រាយកាលពីលើកមុន ក្រុមប្រឹក្សាសន្តិសុខអង្គការសហប្រជាជាតិ បានគាំទ្រលើសំណើនៃការដាក់ទណ្ឌកម្មរបស់អាមេរិក ចំនួន ៦ ធំៗទៅលើកូរ៉េខាងជើង ដូចជា ហាមឃាត់ការនាំចូលប្រេងកាត, ការនាំចេញវាយនភណ្ឌ, បញ្ចប់កិច្ចសន្យាការងារក្រៅប្រទេស, បង្ក្រាបការរត់ពន្ធ, បញ្ឈប់ការបណ្ដាក់ទុនជាមួយប្រទេសដទៃទៀត និងការដាក់ទណ្ឌកម្មលើអង្គភាពរដ្ឋាភិបាលកូរ៉េខាងជើង៕

ចុចអាន៖

ប្រភព៖ Independent ប្រែសម្រួល៖ សេង ឡុង