ដឹងអត់ ប្រទេសណាខ្លះកំពុងរកស៊ីជាមួយកូរ៉េខាងជើង?

2017-09-05 04:04:28
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីកូរ៉េខាងជើងអះអាងពីជោគជ័យក្នុងការតេស្ដគ្រាប់បែកអ៊ីដ្រូហ្សែនកាលពីថ្ងៃអាទិត្យថ្មីៗ ប្រធានាធិបតីអាមេរិក ដូណាល់ ត្រាំ បានគំរាមបញ្ឈប់ពាណិជ្ជកម្មទាំងអស់ជាមួយប្រទេសណាដែលកំពុងធ្វើពាណិជ្ជកម្មជាមួយកូរ៉េខាងជើង។

រាប់ពីឆ្វេងទៅស្ដាំមេដឹកនាំកូរ៉េខាងជើង ចិន ឥណ្ឌា និងរុស្ស៊ី

ការថ្លែងរបស់ ត្រាំ គឺចង់សំដៅទៅលើប្រទេសចិនដែលកូរ៉េខាងជើងធ្វើពាណិជ្ជកម្មជាមួយរហូតដល់ ៩០% នៃពាណិជ្ជកម្មបរទេស។ ត្រាំ ធ្លាប់អំពាវនាវឲ្យចិនធ្វើសកម្មភាពបន្ថែម ដើម្បីកាត់បន្ថយមហិច្ឆតានុយក្លេអ៊ែរកូរ៉េខាងជើង។ ទោះយ៉ាងណា អ្នកជំនាញអះអាងថា ក្រុងប៉េកាំង មិនមានឆន្ទៈចាត់វិធានការក្ដៅដែលធ្វើឲ្យប៉ះពាល់ដល់ទំនាក់ទំនងឡើយ។

ចិនក៏ជាដៃគូពាណិជ្ជកម្មធំបំផុតរបស់អាមេរិកដែរ ទំហំទឹកប្រាក់នាំចេញ និងនាំចូលរវាងប្រទេសទាំងពីរមានចំនួនសរុបជិត ៦៥០ពាន់លានដុល្លារក្នុងឆ្នាំ ២០១៦។

ក្រៅពីប្រទេសចិន នៅមានប្រទេសបួនប្រាំទៀតធ្វើពាណិជ្ជកម្មជាមួយកូរ៉េខាងជើងផងដែរ ដូចជាឥណ្ឌា ប៉ាគីស្ថាន រុស្ស៊ី ថៃ ហ្វីលីពីន។ នេះបើតាមទិន្នន័យវិទ្យាស្ថានបច្ចេកវិទ្យាម៉ាសាឈូសេតផ្នែកស៊ើបអង្កេតសេដ្ឋកិច្ចឆ្នាំ ២០១៥។

កូរ៉េខាងជើង បាននាំចេញទៅប្រទេសចិនមានទំហំទឹកប្រាក់ ២,៣ពាន់លានដុល្លារ, ឥណ្ឌា ៩៧,៨លានដុល្លារ, ប៉ាគីស្ថាន ៤៣,១លានដុល្លារ, Burkina Faso ៣២,៨លានដុល្លារ និង ២៦លានដុល្លារប្រទេសនៅអាស៊ាន។

ចំណែកនាំចូលវិញ ពីចិន ២,៩៥ពាន់លានដុល្លារ, ឥណ្ឌា ១០៨លានដុល្លារ, រុស្ស៊ី ៧៨,២លានដុល្លារ, ថៃ ៧៣,៨លានដុល្លារ និងហ្វីលីពីន ៥៣,២លានដុល្លារ។ គិតមកទល់ពេលនេះ ទំហំទឹកប្រាក់ខាងលើអាចមានការប្រែប្រួលព្រោះតែការរឹតបន្តឹងដោយសារទណ្ឌកម្មរបស់អង្គការសហប្រជាជាតិ៕