មហាអំណាចចិន និងរុស្ស៊ី ចេញមុខព្រមានប្រើកម្លាំងទ័ពប្រឆាំងកូរ៉េខាងជើងហើយ

2017-08-17 04:16:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាការវិវឌ្ឍផ្នែកនយោបាយថ្មី និងសំខាន់មួយទៀតចំពោះបញ្ហាឧបទ្វីបកូរ៉េ ដោយមហាយក្សចិន និងរុស្ស៊ីចេញមុខប្រើកម្លាំងទ័ពប្រឆាំងកូរ៉េខាងជើង បើភាពតានតឹងមិនអាចដោះស្រាយបាន។

ប្រធានាធិបតីចិន ជិនពីង និងប្រធានាធិបតីរុស្ស៊ី ពូទីន អមជាមួយរដ្ឋមន្ត្រីការបរទេសរុស្ស៊ី Sergei Lavrov កាលប្រជុំនៅទីក្រុងមូស្គូ. រូបភាពផ្ដល់សិទ្ធិដោយ Reuter

រដ្ឋមន្ត្រីក្រសួងការបរទេសចិន Wang Yi បានអះអាងនៅថ្ងៃអង្គារថា គ្មាននរណាម្នាក់អនុញ្ញាតឲ្យក្រឡុកភាពតានតឹងនៅពីមុខចិន និងរុស្ស៊ីបានទេ និងអំពាវនាវឲ្យដោះស្រាយបញ្ហាដោយសន្តិវិធីចំពោះបញ្ហានុយក្លេអ៊ែរក្នុងឧបទ្វីបកូរ៉េ។

លោក Wang បានមានប្រសាសន៍ដូច្នេះ ក្នុងអំឡុងពេលសន្ទនាតាមទូរសព្ទជាមួយរដ្ឋមន្ត្រីការបរទេសរុស្ស៊ីលោក Sergei Lavrov។ លោកទាំងពីរបានពិភាក្សារកច្រកចេញបញ្ហាប្រឈមមុខដាក់គ្នានៅឧបទ្វីបកូរ៉េដោយយល់ឃើញថា ភាពគឃ្លើន និងការគំរាមកំហែងកម្លាំងយោធា គឺជារឿងមិនអាចទទួលយកបាន។

កិច្ចសន្ទនាកម្រិតខ្ពស់បានធ្វើឡើងចំពេលកើតមានភាពតានតឹងរវាងកូរ៉េខាងជើង និងសហរដ្ឋអាមេរិក រហូតបង្កើតឲ្យមានសមយុទ្ធយោធាមួយទៀតរវាងអាមេរិក និងកូរ៉េខាងត្បូងនៅថ្ងៃទី ២១សីហាខាងមុខ។ គម្រោងនេះបានធ្វើឲ្យកូរ៉េខាងជើងប្រតិកម្មធ្ងន់ៗ ថែមទាំងគំរាមបាញ់មីស៊ីលអន្តរទ្វីបទៅដល់តំបន់ក្បែរកោះ Guam ដែលជាមូលដ្ឋានទ័ពអាមេរិកទៀតផង។

យោងទៅតាមរដ្ឋមន្ត្រីរុស្ស៊ីខាងលើអះអាងថា ស្ថានភាពនៅឧបទ្វីបកូរ៉េអាចឡើងកម្ដៅម្ដងទៀត ព្រោះតែសមយុទ្ធយោធារួមរបស់កូរ៉េខាងត្បូង។ រដ្ឋមន្ត្រីទាំង ២រូប បានគូសបញ្ជាក់ថា អាមេរិក និងកូរ៉េខាងជើង គួរបញ្ឈប់ការគំរាមគ្នាតាមរយៈវោហារសាស្ត្រ និងសកម្មឌឺដងនានា ដើម្បីបន្ថយភាពតានតឹង។

អំឡុងពេលសន្និសីទកាសែតថ្មីៗនេះ កូរ៉េខាងជើងបានប្រកាសផ្អាកការគំរាមរបស់ខ្លួន ដោយនិយាយថា ខ្លួនរង់ចាំវាយតម្លៃមើលការប្រព្រឹត្តឆ្កួតៗរបស់អាមេរិកទៀត មុនពេលសម្រេចត្រូវបាញ់ ឬអត់។ ប៉ុន្តែយ៉ាងណា រដ្ឋមន្ត្រីការបរទេសអាមេរិកលោក Rex Tillerson បានមានប្រសាសន៍នៅថ្ងៃអង្គារកន្លងទៅថា អាមេរិកនៅតែស្វាគមន៍ការចរចាជាមួយកូរ៉េខាងជើងជានិច្ច៕