អូស្ត្រាលី ត្រៀមធ្វើសង្គ្រាមប្រឆាំងកូរ៉េខាងជើង បើ គីម ជុងអ៊ុន ហ៊ានបាញ់អាមេរិក

2017-08-11 03:08:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសអូស្ត្រាលីនឹងចេញទៅជួយអាមេរិក ប្រសិនបើកូរ៉េខាងជើង វាយប្រហារលើអាមេរិកពិតមែន។ នេះបើតាមការអះអាងរបស់លោកនាយករដ្ឋមន្ត្រីអូស្ត្រាលី Malcolm Turnbull នៅថ្ងៃសុក្រនេះ។

នាយករដ្ឋមន្ត្រីអូស្ត្រាលី Malcolm Turnbull

ការបង្ហើរសារខាងលើ គឺធ្វើឡើងបន្ទាប់ពីលោកនាយករដ្ឋមន្ត្រីបានពិភាក្សាអំពីស្ថានភាពដោយចំហជាមួយអនុប្រធានាធិបតីអាមេរិកលោក Mike Pence កាលពីយប់ថ្ងៃព្រហស្បតិ៍ម្សិលមិញ។ នាយករដ្ឋមន្ត្រី Turnbull បានថ្លែងប្រាប់វិទ្យុអូស្ត្រាលី 3AW នៅថ្ងៃសុក្រនេះថា "យើងមានកិច្ចព្រមព្រៀង ANZUS មានន័យថា ប្រសិនបើមានការវាយប្រហារលើអាមេរិក ឬអូស្ត្រាលី នោះភាគីម្ខាងនឹងចេញទៅជួយជាក់ជាមិនខាន។ យើងចូលរួមការពារគ្នាទៅវិញទៅមក"។

គួររម្លឹកថា កាលពីម្សិលមិញសារព័ត៌មានរដ្ឋកូរ៉េខាងជើងបានផ្សាយថា ខ្លួនបានត្រៀមខ្លួនរួចជាស្រេចក្នុងការបាញ់មីស៊ីល ៤ គ្រាប់ទៅជិតកោះ Guam ដែលជាមូលដ្ឋានយោធាអាមេរិក នៅពាក់កណ្ដាលខែសីហានេះ ដោយប្រើមីស៊ីល Hwasong-12 ហោះរំលងដែនដីជប៉ុន រួចធ្លាក់នៅចម្ងាយប្រមាណ ៣០គីឡួម៉ែត្រពីកោះ Guam ប្រសិនបើមេដឹកនាំវ័យក្មេង គីម ជុងអ៊ុន បើកភ្លើងខៀវ៕