មកដឹងរឿងរ៉ាវជីវិតដ៏អាថ៌កំបាំងរបស់ភរិយា គីម ជុងអ៊ុន មនុស្សភាគច្រើន មិនធ្លាប់ដឹង

2017-09-28 02:54:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ព័ត៌មានតិចតួចបំផុត ដែលគេបានដឹងពីលោកស្រី Ri Sol-ju ដែលត្រូវបានគេកំណត់ថាជាភរិយារបស់មេដឹកនាំផ្ដាច់ការកូរ៉េខាងជើង គីម ជុងអ៊ុន កាលពីឆ្នាំ២០១២។

បើយោងតាមរបាយការណ៍របស់អ្នកស៊ើបការណ៍សម្ងាត់កូរ៉េខាងត្បូង បានឲ្យដឹងថា លោកស្រី Ri បច្ចុប្បន្នអាចមានអាយុ ២៨ ឆ្នាំ និង កូនចំនួន ៣ នាក់ទៀតផង។ ទោះជាយ៉ាងណាក៏ដោយ រដ្ឋាភិបាលកូរ៉េខាងជើង មិនបានបញ្ជាក់ពីព័ត៌មាននោះទេ។

លោកស្រី Ri មិនសូវបង្ហាញខ្លួនជាសាធារណៈញឹកញាប់នោះទេ ប៉ុន្តែជាធម្មតាលោកស្រីត្រូវបានគេមើលឃើញ នៅពេលដែលលោក គីម ជុងអ៊ុន អបអរសាទរការបាញ់សាកល្បងមីស៊ីល ហើយតែងតែត្រូវគេថតរូបបាន ញញឹមយ៉ាងសុភាព និង ស្លៀកសំលៀកបំពាក់ស្រស់ស្អាតយ៉ាងសមសួនតែម្ដង។

ភរិយាមេដឹកនាំរូបនេះ ត្រូវបានគេរាយការណ៍ថា បានកើតនៅក្នុងក្រុមគ្រួសារធូរធារ ដោយឪពុករបស់នាងគឺជាសាស្ត្រាចារ្យ និងម្ដាយជាគ្រូពេទ្យ ប៉ុន្តែរឿងរ៉ាវជីវិតរបស់នាងផ្សេងទៀត ត្រូវបានគេដឹងតិចតួចបំផុត ដូចជា មូលហេតុដែលនាងក្លាយជាភរិយារបស់លោក គីម ជុងអ៊ុន ជាដើម។

ខាងក្រោមនេះគឺជាអ្វីដែលយើងបានដឹងពី លោកស្រី Ri Sol-ju

លោកស្រីត្រូវបានគេស្គាល់ថាជាភរិយារបស់ លោក គីម ជុងអ៊ុន ជាលើកដំបូង កាលពីខែកក្កដា ឆ្នាំ២០១២ នៅពេលដែលប្រព័ន្ធផ្សព្វផ្សាយរបស់កូរ៉េខាងជើង បានប្រកាសវាជាផ្លូវការ។

ប្រព័ន្ធផ្សព្វផ្សាយអន្តរជាតិ មានការភ្ញាក់ផ្អើលយ៉ាងខ្លាំង ដោយសារតែស្ត្រីអាថ៌កំបាំងម្នាក់នេះ ត្រូវបានគេសម្គាល់ឃើញនៅជាមួយ លោក គីម ជុងអ៊ុន ក្នុងស៊េរីព្រឹត្តិការណ៍ជាបន្តបន្ទាប់ រួមទាំងការសម្ដែងល្ខោន និង ការគោរពនៅថ្ងៃខួបជីតារបស់លោក គីម ជុងអ៊ុន ផងដែរ។

ប្រព័ន្ធផ្សព្វផ្សាយកូរ៉េខាងជើង បានលើកឡើងអំពីលោកស្រី Ri ក្នុងអំឡុងពេលចូលរួមការបើកសម្ពោធសួនកម្សាន្តមួយ នៅក្នុងទីក្រុងព្យុងយ៉ាងថា «ខណៈពេលដែលបទចម្រៀងស្វាគមន៍ ត្រូវបានបន្លឺឡើង លោកសេនាប្រមុខ គីម ជុងអ៊ុន បានបង្ហាញវត្តមាន ជាមួយភរិយារបស់លោក គឺលោកស្រី Ri Sol-ju»។

យ៉ាងណាក៏ដោយ គេមិនបានដឹងច្បាស់ទេថា នៅពេលណាដែលលោក គីម ជុងអ៊ុន និងលោកស្រី Ri បានរៀបមង្គលការជាមួយគ្នា។ ប៉ុន្តែរបាយការណ៍មួយចំនួន បានឲ្យដឹងថា មង្គលការរបស់ពួកគេបានធ្វើឡើងនៅក្នុងឆ្នាំ២០០៩ ហើយលោកស្រី Ri បានផ្ដល់កំណើតកូនម្នាក់ នៅឆ្នាំ២០១០ ខណៈខ្លះទៀតបាននិយាយថា គូស្នេហ៍អាថ៌កំបាំងមួយគូនេះ បានជួបគ្នានៅក្នុងការប្រគំតន្ត្រីបុរាណមួយ នៅក្នុងឆ្នាំ២០១០។

រឿងរ៉ាវជីវិតរបស់លោកស្រី Ri មុនពេលរៀបការជាមួយលោក គីម ជុងអ៊ុន មិនត្រូវបានគេដឹងច្រើនឡើយ ប៉ុន្តែរបាយការណ៍សម្ងាត់របស់កូរ៉េខាងត្បូង បានឲ្យដឹងថា លោកស្រីធ្លាប់បានរៀនច្រៀងនៅក្នុងប្រទេសចិន ហើយបានទៅប្រទេសកូរ៉េខាងត្បូង នៅឆ្នាំ២០០៥ ក្នុងនាមជាសមាជិកក្រុមអ្នកលើកទឹកចិត្តរបស់កូរ៉េខាងជើង។

លោកស្រី Ri ត្រូវបានគេដឹងថា ជាអ្នកចូលចិត្តម៉ូដពីបរទេស ហើយធ្លាប់ត្រូវបានគេប្រទះឃើញ កាន់កាបូបថ្លៃៗដូចជាម៉ាក Dior និង Chanel ជាដើម។

កាលពីដើមឆ្នាំ២០១៧ លោកស្រី Ri បានបាត់ខ្លួនពីសាធារណៈ អស់រយៈពេលជាច្រើនខែ ជំរុញឲ្យមានការសង្ស័យចំពោះសុខភាពរបស់លោកស្រី។ នៅក្នុងខែសីហា ក្រុមអ្នកស៊ើបការណ៍សម្ងាត់របស់កូរ៉េខាងត្បូង បានរាយការណ៍ថា លោកស្រីបានផ្ដល់កំណើតដល់កូនម្នាក់ (កូនទី៣) ហើយមូលហេតុដែលបាត់ខ្លួនពីសាធារណៈ គឺដោយសារតែលោកស្រីមានផ្ទៃពោះ។

រហូតមកទល់ពេលនេះ គេជឿជាក់ថា ពួកគេមានកូនចំនួន ៣ នាក់ ខណៈព័ត៌មានលម្អិតបំផុតបានមកពីអតីតតារាបាល់បោះ Dennis Rodman ដែលជាមិត្តភ័ក្ដិជិតស្និទ្ធរបស់លោក គីម ជុងអ៊ុន។

យ៉ាងណាមិញ ប្រព័ន្ធផ្សព្វផ្សាយរបស់កូរ៉េខាងត្បូង បានសង្ស័យថា លោកស្រី Ri អាចធ្លាប់ត្រូវបានគេដាក់សម្ពាធឲ្យមានកូនទី ៣ ដោយសង្ឃឹមថាជាកូនប្រុស ដែលអាចទទួលមរតកនៃរបបផ្ដាច់ការរបស់ លោក គីម ជុងអ៊ុន ហើយវាក៏អាចឲ្យគេសន្មតបានថា កូនមុនទាំង ២ របស់ពួកគេគឺជាកូនស្រី៕

ចុចអាន៖

ប្រភព៖ Independent ប្រែសម្រួល៖ សេង ឡុង