កងកម្លាំងពិសេសអង់គ្លេស បើកប្រតិបត្តិការតាមសម្លាប់កូនប្រុស អូសាម៉ា ប៊ិនឡាឌិន

2017-10-02 03:57:57
ចំនួនមតិ 0 | ចំនួនចែករំលែក 0

ចន្លោះមិនឃើញ

កងកម្លាំងពិសេសរបស់អង់គ្លេស ឬហៅថា SAS (Special Air Service) កំពុងបើកបេសកកម្មតាមសម្លាប់ ឬចាប់ខ្លួនកូនប្រុសអតីតមេដឹកនាំភេរវកម្មអាល់កៃដាលោក អូសាម៉ា ប៊ិនឡាឌិន គឺលោក ហាមហ្សា (Hamza)។

Hamza ត្រូវគេចោទថា បានដើរតាមគន្លងរបស់ឪពុកដើម្បីដឹកនាំក្រុមភេរវករអាល់កៃដា។ មន្ត្រីស៊ើបការណ៍អាមេរិក និងអង់គ្លេស បានចាត់ឈ្មោះ Hamza ក្នុងបញ្ជីខ្មៅរបស់ពួកគេដែលជាមនុស្សចង់ចាប់ខ្លួនបំផុតទាំង១០ លើលោក។

ពួកគេបានព្រមានថា លោក Hamza គឺជាមនុស្សសកម្ម និងកំពុងរៀបចំផែនការវាយប្រហារពិសេសមួយទៅកាន់ប្រទេសលោកខាងលិច ដើម្បីសងសឹកការស្លាប់របស់ឪពុកខ្លួនក្នុងកណ្ដាប់ដៃកងកម្លាំងពិសេសអាមេរិក US Navy Seals កាលឆ្នាំ ២០១១។

Hamza មានអាយុ ២៨ឆ្នាំ បានបាត់ខ្លួនពីផ្ទះសុវត្ថិភាពរបស់ឪពុកនៅទីក្រុង Abbottabad ប្រទេសប៉ាគីស្ថាន ប៉ុន្មានសប្ដាហ៍ មុនឪពុកត្រូវបានសម្លាប់។ ប៉ុន្តែរូបគេបានបង្ហាញមុខជាថ្មីនៅរយៈពេល ២ឆ្នាំក្រោយ និងធ្លាប់ចេញវីដេអូសរសើរការវាយប្រហារនៅទីក្រុងឡុងដ៍។ លោកធ្លាប់ព្រមានរៀបគម្រោងវាយប្រហារយកលំនាំតាមការបញ្ជាយន្តហោះបុកអគារពាណិជ្ជកម្មនៅអាមេរិកថែមទៀត។

ពេលនេះ Harmza ត្រូវគេជឿថាកំពុងលាក់ខ្លួននៅប្រទេសស៊ីរី។ ឥឡូវប្រតិបត្តិការរួម Joint Coalition Special Operation Unit រួមបញ្ចូលទាំងទាហាន SAS ៤០នាក់ផង បានធ្វើដំណើរទៅកាន់ប្រទេសស៊ីរី តាមស្វែងរក Hamza និងគ្នីគ្នារបស់គេហើយ។ ពួកគេមានគម្រោងសម្លាប់ដោយប្រើយន្តហោះដ្រូន បើអាច ចាប់ខ្លួនទាំងរស់៕