ដំណឹងល្អ! អាហារូបករណ៍ព័ត៌មានវិទ្យា ១០កន្លែងនៅ NIPTICT កំពុងរង់ចាំអ្នក
- 2017-10-05 03:52:00
- ចំនួនមតិ 0 | ចំនួនចែករំលែក 0
ដំណឹងល្អ! អាហារូបករណ៍ព័ត៌មានវិទ្យា ១០កន្លែងនៅ NIPTICT កំពុងរង់ចាំអ្នក
ចន្លោះមិនឃើញ
កាលពីម្សិលមិញក្រុមហ៊ុន Smart និងវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) បានពង្រឹងកិច្ចព្រមព្រៀង ដើម្បីគាំទ្រដល់យុវជនកម្ពុជាដែលមានទេពកោសល្យ ក្នុងវិស័យបច្ចេកវិទ្យាទូរគមនាគមន៍ និងព័ត៌មាន (ICT)។
នៅក្នុងពិធីចុះហត្ថលេខាក្រោមអធិបតីភាព ឯកឧត្តម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ក្រុមហ៊ុនស្មាតបានសន្យាថានឹងផ្តល់មូលនិធិផ្គត់ផ្គង់ពេញលេញសម្រាប់ការសិក្សារបស់និស្សិតចំនួន ១០នាក់ ដែលមានបំណងសិក្សាថ្នាក់បរិញ្ញាបត្រលើជំនាញទាក់ទងនឹង ICT នៅវិទ្យាស្ថានជាតិ NIPTICT ។ ជាមួយគ្នាលោកក៏បានមានប្រសាសន៍អរគុណ នូវទឹកចិត្តរបស់ក្រុមហ៊ុន Smart ដែលតែងតែគិតគូរដល់និស្សិតកម្ពុជាផងដែរ។
អាហារូបករណ៍ចំនួន ១០កន្លែង ដែលត្រៀមសម្រាប់និស្សិតប្រឡងយកនេះ គឺស្ថិតក្នុងចំណោមអាហារូបករណ៍ចំនួនសរុប ២០កន្លែង ក្រោមកម្មវិធីអាហារូបករណ៍ SmartEdu នាឆ្នាំនេះ ដែលកម្មវិធីនេះក៏ត្រូវបានគាំទ្រដោយក្រសួងអប់រំ យុវជន និងកីឡាផងដែរ។
នៅដើមឆ្នាំ២០១៦ ក្រុមហ៊ុនស្មាត បានបរិច្ចាកទឹកប្រាក់ជាង ៣៥ ម៉ឺនដុល្លារសហរដ្ឋអាមេរិក សាងសង់អន្តេវាសិកដ្ឋានក្នុងវិទ្យាស្ថានជាតិ NIPTICT សម្រាប់ឲ្យនិស្សិតយ៉ាងហោចណាស់ ១០០នាក់បានស្នាក់នៅ ដែលនិស្សិតខ្លះមកពីទីជនបទ ហើយដែលការឧបត្ថម្ភនេះ បានអនុញ្ញាតឲ្យពួកគេបានប្រើប្រាស់ធនធានផ្នែក ICT ដើម្បីជាការអភិវឌ្ឍជំនាញមានសមត្ថភាពប្រកួតប្រជែងថ្នាក់សាកល។ ទន្ទឹមនឹងនេះ ក្រុមហ៊ុនស្មាត ក៏ជាដៃគូសំខាន់របស់កម្មវិធីអ្នកស្ម័គ្រចិត្ត ICT កម្ពុជា និងកម្មវិធីពានរង្វាន់ ICT កម្ពុជា របស់វិទ្យាស្ថានជាតិ NIPTICT ផងដែរ។
លោក ថូម៉ាស ហ៊ុន (Thomas Hundt) នាយកប្រតិបត្តិក្រុមហ៊ុនស្មាត បានពន្យល់ថា៖ “ស្របពេលដែលក្រុមហ៊ុនស្មាតនៅតែបន្តជាក្រុមហ៊ុនឈានមុខគេក្នុងឧស្សាហកម្មទូរគមនាគមន៍ចល័ត និងជាអ្នកគាំទ្រយ៉ាងពេញទំហឹងចំពោះការអភិវឌ្ឍសហគមន៍ ដូច្នេះជាធម្មតា យើងតែងលើកទឹកចិត្តដល់ការអភិវឌ្ឍជំនាញ ICT តាមរយៈការអប់រំ។ ដូច្នេះហើយ បានជាយើងសម្រេចចិត្តពង្រីកកម្មវិធីអាហារូបករណ៍ SmartEdu នៅឆ្នាំនេះ៕"