Apple កំពុងឈឺក្បាលរឿង iPhone 8 ហើបអេក្រង់ មិនទាន់រកឃើញមូលហេតុ!

2017-10-08 01:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មកដល់ថ្ងៃនេះ ករណីហើបអេក្រង់ iPhone 8 បានកើតឡើងចំនួន ៥ ករណីរួចមកហើយនៅតាមបណ្ដាប្រទេសមួយចំនួនដូចជា ប្រទេសក្រិក កាណាដា ជប៉ុន និងហុងកុង នៅមិនទាន់រកឃើញមូលហេតុ។

iPhone 8 ហើបអេក្រង់នៅតៃវ៉ាន់

កាលពីសប្ដាហ៍មុន សារព័ត៌មានបរទេសល្បីៗជាច្រើនបានចុះផ្សាយព្រោងព្រាតពីដំណឹងដ៏រសើបរបស់ Apple លើករណី iPhone 8 ហើបអេក្រង់នេះ។

ចំពោះ iPhone 8 ហើបអេក្រង់ដែលគេសន្និដ្ឋានថាបញ្ហាមកពីថ្ម ត្រូវបាន Apple បញ្ចេញរបាយការណ៍តែមួយឃ្លាយ៉ាងខ្លីប៉ុណ្ណោះថា៖ "ពួកយើងកំពុងស្វែងរកមូលហេតុដែលបណ្ដាលឲ្យ iPhone 8 ហើបអេក្រង់”។

ករណីដ៏កម្រនេះ បានកើតឡើងដំបូងគេនៅកោះតៃវ៉ាន់ ខណៈស្ត្រីម្នាក់មានត្រកូល Wu មកពីទីក្រុង Taichung ភាគខាងលិចកោះតៃវ៉ាន់បានទិញ iPhone 8 Plus មកប្រើប្រាស់ បន្ទាប់ពីសាកថ្ម នាងឃើញអេក្រង់ទូរសព្ទបានប៉ោងចេញក្រៅបង្កឲ្យមានការភ្ញាក់ផ្អើលជាខ្លាំង កាលពីថ្ងៃសៅរ៍សប្ដាហ៍មុន។

បន្តមកទៀត ក៏មានករណីកើតឡើងស្រដៀងគ្នានេះចំនួន ៤ ករណីទៀតនៅប្រទេសក្រិក ហុងកុង និងកាណាដា ប៉ុន្តែមិនបង្កឲ្យមានរបួសនរណាម្នាក់ឡើយ។

តាមសារព័ត៌មាន The Verge ដែលបានសាកសួរលោក Sam Jaffe អ្នកគ្រប់គ្រងនៃមជ្ឍមណ្ឌលស្រាវជ្រាវថាមពល បានឲ្យដឹងថា "ករណីហើបអេក្រង់នេះ វាកម្រនឹងកើតឡើងចំពោះថ្មទូរសព្ទថ្មីណាស់"។ អ្នកជំនាញរូបនេះបន្តទៀតថា រោងចក្រផលិតថ្ម បានកំណត់រួចហើយ ចំពោះថាមពលថ្ម ហើយវាក៏ត្រូវបានផលិតឡើងដោយការពារហានិភ័យដូចករណីសាកថ្មបន្ថែមខាងលើនេះផងដែរ។

ទោះជាមានការលើកឡើងយ៉ាងនេះក្ដី Sam Jaffe ក៏មិនទាន់ប្រាកដថានឹងមានរឿងអ្វីកើតឡើងចំពោះស្មាតហ្វូនរបស់ Apple ដែរ ដូចនេះមានតែរង់ចាំមើល ការស៊ើបអង្កេតរបស់ Apple លើករណីនេះប៉ុណ្ណោះ៕