គីម ជុងអ៊ុន ដំឡើងតំណែងឲ្យអតីតមិត្តស្រី បន្ទាប់ពីលេចឮដំណឹងថា នាងត្រូវប្រហារជីវិត

2017-10-11 00:21:49
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតមិត្តស្រីរបស់មេដឹកនាំកូរ៉េខាងជើង គីម ជុងអ៊ុន អ្នកនាង Hyon Song-wol ដែលជាអ្នកចម្រៀងត្រូវបានប្រកាសដំឡើងតំណែងនៅក្នុងបក្សកំពុងកាន់អំណាចរបស់គីម ជុងអ៊ុន បន្ទាប់ពីមានសេចក្ដីរាយការណ៍ថា នាងត្រូវបានកាត់ទោសប្រហារកាលប៉ុន្មានឆ្នាំមុន។

អ្នកនាង Hyon Song-wol ត្រូវគេធ្លាប់ដឹងថា បានជាប់ទោសប្រហារជីវិតតាមរយៈការប្រើកាំភ្លើងបាញ់នៅខែសីហា ឆ្នាំ ២០១៣ ដោយរងបទចោទថា បានថតវីដេអូអាសអាភាស។

ប៉ុន្តែមួយឆ្នាំក្រោយមក ពាក្យចចាមអារ៉ាមទាំងនោះត្រូវបានរសាត់អណ្ដែត ក្រោយពេលនាងបង្ហាញមុខលើប៉ុស្តិ៍ទូរទស្សន៍ជាតិ។ ក្នុងអំឡុងពេលសម្ដែងចម្រៀងមួយ នាងបានលើកសរសើរគីម ជុងអ៊ុន ចំពោះស្នាដៃដ៏ល្អក្នុងសិល្បៈ។

Hyong បានចូលរួមជាមួយក្រុមតន្ត្រីនារីឈ្មោះ Moranhong Band ដោយច្រៀងជាច្រើនបទដើម្បីឃោសនាឲ្យបក្សកាន់អំណាចដូចជាបទ ជំហានជើងទាហាន និងខ្ញុំស្រលាញ់ក្រុងព្យុងយ៉ាង។

តាមប្រភពមួយអះអាងថា អ្នកនាង និង គីម ជុងអ៊ុន បានទាក់ទងគ្នាដំបូងតាំងពី ១៣ឆ្នាំមុន ប៉ុន្តែឪពុករបស់គីម ជុងអ៊ុន គឺលោកគីម ជុងអ៊ីល បានបង្ខំឲ្យផ្ដាច់ទំនាក់ទំនងទាំងស្រុង ហើយច្រើនឆ្នាំកន្លងទៅនាងបានទៅរៀបការនឹងបុរសផ្សេង។

ឥឡូវទំនាក់ទំនងរបស់នាង និង គីម ជុងអ៊ុន បានកើនឡើងមួយកម្រិតទៀត បន្ទាប់ពី គីម ជុងអ៊ុន បើកដៃឲ្យនាងចូលបម្រើការក្នុងគណៈកម្មាធិការកណ្ដាលរបស់បក្ស។ ការរុះរើតំណែងនេះ ប្រកាសឡើងក្នុងពិធីគម្រប់ខួបរបស់គណបក្សកាន់ពលករកូរ៉េខាងជើង (WPK) ដែលកំពុងកាន់អំណាចនៅថ្ងៃទី ១០តុលាម្សិលមិញ៕