៤ព្រឹត្តិការណ៍សំខាន់ៗជាប្រវត្តិសាស្ត្រ នឹងកើតឡើងក្នុងថ្ងៃតែមួយនៅកម្ពុជាខាងមុខនេះ
- 2017-10-12 07:58:29
- ចំនួនមតិ 0 | ចំនួនចែករំលែក 0
៤ព្រឹត្តិការណ៍សំខាន់ៗជាប្រវត្តិសាស្ត្រ នឹងកើតឡើងក្នុងថ្ងៃតែមួយនៅកម្ពុជាខាងមុខនេះ
ចន្លោះមិនឃើញ
ព្រឹត្តិការណ៍៤សំខាន់ៗ ប្រទេសកម្ពុជាដែលនឹងកើតឡើងក្នុងថ្ងៃតែមួយ នាថ្ងៃទី ១៥ ខែតុលា ឆ្នាំ២០១៧ខាងមុខនេះ។ ព្រឹត្តិការណ៍ធំៗទាំង ៤នេះ ពិតជាសំខាន់បំផុត ដែលប្រជាពលរដ្ឋខ្មែរទូទាំងប្រទេសគ្រប់លំដាប់ថ្នាក់ត្រូវដឹង និងកត់ចំណាំទុក។
១. ពិធីគោរពព្រះវិញ្ញាណក្ខន្ធ របស់ព្រះបរមរតនកោដ្ឋព្រះបាទ សម្ដេចព្រះនរោត្ដម សីហនុ
នៅថ្ងៃទី ១៥តុលា ខាងមុខនេះព្រះបរមរាជវាំង និងប្រមុខរាជរដ្ឋាភិបាល ក៏ដូចជាប្រជាពលរដ្ឋខ្មែរទូទាំងប្រទេស នឹងរៀបចំពិធី គោរពព្រះវិញ្ញាណក្ខន្ធ ព្រះបាទសម្ដេច ព្រះនរោត្ដម សីហនុ ដែលទ្រង់បានយាងចូលទិវង្គត នៅថ្ងៃទី១៥ ខែតុលា ឆ្នាំ២០១២ វេលាម៉ោង ០១៖២០នាទីយប់ នៅទីក្រុង ប៉េកាំង ប្រទេសចិន។
ព្រះបរមរតនកោដ្ឋព្រះបាទសម្ដេចនរោត្ដមសីហនុ ជាព្រះវររាជបិតាជាតិខ្មែរ ទ្រង់បានលះបង់ព្រះកាយពល ធ្វើបូជនីយកិច្ច ទាមទារឯករាជ្យពីអាណាព្យាបាលបារាំង បានដោយពេញលេញ នៅថ្ងៃទី៩ ខែវិច្ឆិកា ឆ្នាំ១៩៥៣។ ព្រះអង្គបានបំពេញព្រះរាជកិច្ចដឹកនាំប្រទេសយ៉ាងរីកចម្រើនបំផុតក្នុងសម័យសង្គមរាស្ត្រនិយម និងបន្សល់ទុកនូវស្នាមព្រះហស្តជាច្រើនរាប់មិនអស់រហូតមកដល់បច្ចុប្បន្ន។
ព្រះបរមរតនកោដ្ឋព្រះបាទសម្ដេចនរោត្ដមសីហនុ ប្រសូតនៅថ្ងៃទី៣១ ខែតុលា ឆ្នាំ១៩២២ នៅរាជធានីភ្នំពេញ ព្រះរាជាណាចក្រកម្ពុជា។
២. ការធ្វើឆ្លងកាត់ស្ពានលីយ៉ុងផាត់ព្រែកព្នៅលែងតម្រូវឱ្យបង់ប្រាក់
កាលពីថ្មីៗកន្លងទៅនេះប្រមុខរាជរដ្ឋាភិបាលបានប្រកាសថា ចាប់ពីម៉ោង ០០:០០នាទី ថ្ងៃទី១៥ ខែតុលា ឆ្នាំ២០១៧ ខាងមុខនេះតទៅ ប្រជាពលរដ្ឋដែលធ្វើដំណើរឆ្លងកាត់ស្ពានលីយ៉ុងផាត់ព្រែកព្នៅនឹងលែងតម្រូវឲ្យបង់ប្រាក់ទៀតហើយ ដោយថារដ្ឋាភិបាលនឹងទិញយកស្ពាននេះ មកគ្រប់គ្រងវិញ។ ការទិញយកមកគ្រប់គ្រងវិញនេះ គឺដើម្បីដោះស្រាយនូវការលំបាក និងជួយលើកកម្ពស់ជីវភាពប្រជាជន ពិសេសសម្រួលដល់ការធ្វើដំណើរទៅមករបស់ប្រជាពលរដ្ឋ។
៣. ការចូលទស្សនាកម្សាន្តរមណីយដ្ឋានឋានសួគ៌បូកគោលែងយកលុយ
សម្ដេចតេជោ ហ៊ុន សែន បានឱ្យដឹងកាលពីថ្មីៗកន្លងទៅនេះទៀតថា ក្រុមហ៊ុន សុខា អូតែល បានស្ម័គ្រចិត្តឈប់លក់សំបុត្រយកថ្លៃចូលឧទ្យានជាតិព្រះមុនីវង្ស «បូកគោ» និងរមណីយដ្ឋានបូកគោ ដែលនឹងចូលជាធរមាន ចាប់ពីវេលាម៉ោង ០០:០០ នាទី ថ្ងៃទី១៥ ខែតុលា ឆ្នាំ២០១៧ តទៅ។
ការឈប់លក់សំបុត្រយកថ្លៃចូលឧទ្យានជាតិនេះ នឹងជួយសម្រួលដល់បងប្អូនជនរួមជាតិក៏ដូចជាភ្ញៀវទេសចរទាំងអស់បានឡើងទៅទស្សនាកម្សាន្តនៅលើតំបន់រមណីយដ្ឋានប្រវត្តិសាស្ត្រ។ ជាពិសេសបានទស្សនាទេសភាពដ៏ស្រស់ត្រកាល និងសែនមនោរម្យ ស្វែងយល់អំពីប្រភេទសត្វ រុក្ខជាតិដ៏មានតម្លៃ ដែលមាននៅក្នុងតំបន់ឧទ្យានជាតិនេះ។
៤. កីឡាករ-កីឡាការិនីជំនាញ ប្រមាណ៥ពាន់នាក់ ប្រើប្រាស់រថយន្តក្រុងរបស់រាជធានីភ្នំពេញ ដោយឥតគិតថ្លៃ
សម្ដេចតេជោ ហ៊ុន សែន នាយករដ្ឋមន្ត្រីបានប្រកាសទៀតថា ចាប់ពីថ្ងៃទី១៥ ខែតុលា ឆ្នាំ២០១៧នេះ កីឡាករ-កីឡាការិនីជំនាញ ប្រមាណ៥ពាន់នាក់ ប្រើប្រាស់រថយន្តក្រុងរបស់រាជធានីភ្នំពេញ ដោយឥតគិតថ្លៃ។ ការមិនយកលុយកីឡាករ-កីឡាការិនីជំនាញនេះ គឺដូចគ្នាទៅនឹងកម្មករ-កម្មការិនីដូច្នោះដែរ៕