ស្រាយមន្ទិលរឿង ឈូឈូ ជាកូនស្រី សឿន ផានផាភួង

2017-10-15 06:56:45
ចំនួនមតិ 0 | ចំនួនចែករំលែក 0

ចន្លោះមិនឃើញ

កន្លងមកមានពាក្យចចាមអារ៉ាមជាច្រើនបានលេចឮថាកុមារី អាង សុជាតា ហៅ ឈូឈូ ជាកូនស្រីបង្កើតរបស់តារាសម្ដែង សឿន ផានផាភួង។ ដំណឹងខាងលើនេះត្រូវបានសាមីខ្លួនទាំងពីរច្រានចោលថាមិនមែនជារឿងពិត។

កុមារី ឈូឈូ បានប្រាប់ Sabay ថា ថ្វីត្បិតនាងរស់នៅ និងធំធាត់ក្រោមការចិញ្ចឹមបីបាច់មើលថែយ៉ាងល្អពីកញ្ញា សឿន ផានផាភួង តាំងពីនៅតូចពិតមែនតែ ផានផាភួង មិនមែនជាម្ដាយបង្កើតរបស់ខ្លួនទេ គឺជាម្ដាយមីង។ ចំណែកឯម្ដាយឪពុកបង្កើតរស់នៅសហរដ្ឋអាមេរិក យូរៗទើបមកលេងស្រុកខ្មែរម្ដង។

តួឯកស្រីនៅតូចក្នុងរឿង "បំភ្លេចមិនបាន" បន្ថែមថា មូលហេតុដែលនាង ហៅកញ្ញា សឿន ផានផាភួង ថា"ម៉ាក់" ដោយសារតែទម្លាប់ហៅតាំងពីដឹងក្ដីមក ហើយប្រសិនបើខ្លួនថា " ម៉ាក់" ក៏មិនទាស់ខុសអ្វីដែរ ព្រោះ ផានផាភួង មើលថែនាងប្រៀបដូចជាម្ដាយបង្កើតទៅហើយ។

នាងថា៖"ខ្ញុំនៅឃ្លាតឆ្ងាយពីប៉ាម៉ាក់ ដែលគាត់រស់នៅអាមេរិក មិនមែនថាខ្ញុំមិននឹកទេបង តែដល់ពេលយូរទៅជាទម្លាប់ហើយគិតថាធម្មតា"។

ដោយឡែកញ្ញា សឿន ផានផាភួង វិញកន្លងមកក៏ធ្លាប់អះអាង និងប្រកែកថា ឈូឈូ មិនមែនជាកូនបង្កើតខ្លួនឡើយ តែនាងស្ថិតក្នុងនាមជាអាណាព្យាបាល និងជាម្ដាយមីងដែលមើលខុសត្រូវ ឈូឈូ តាំងពីនៅតូចមក។

តួអង្គស្រីក្នុងរឿង "៣០ថ្ងៃ" និយាយថា៖“ថ្ងៃនេះបងសុំនិយាយ ឲ្យអស់ ឈូឈូ គាត់មិនមែនជាកូនខ្ញុំទេ តែគាត់ជាមួយបង្កើតរបស់ខ្ញុំ មិនដឹងត្រូវនិយាយថាម៉េចទេ អ្នកខ្លះគាត់នៅតែយល់ច្រឡំថា ឈូឈូ ជាកូនបង ដល់ពេលបងប្រាប់ថាក្មួយហើយនៅតែមិនជឿទៀតថាបងកុហក"។

គួរបញ្ជាក់ថា កុមារី អាង សុជាតា ហៅ ឈូឈូ មានអាយុ១៣ ឆ្នាំ រៀននៅថ្នាក់ទី៨ នៅសាលាប៊ែលធី។ ចូលប្រលូកសិល្បៈមុនដំបូងនៅអាយុ ៥ តាមរយៈអ្នកមីងរបស់ខ្លួន តែប្រលូកមិនពេញលេញនោះទេ។ ចំណែកឯភាពយន្តដែលធ្លាប់សម្ដែងកន្លងមកមានដូចជារឿង "ក្មេងទី៦" “បំភ្លេចមិនបាន" “អនុស្សាវរីយ៍ថ្ងៃចូលឆ្នាំ" “៣០ថ្ងៃ" “កញ្ចក់" និងជាច្រើនរឿងទៀត៕

អត្ថបទ៖ ឆុង ស៊ីណាន