Richarlison ៤ ឆ្នាំមុន រកតែស្បែកជើងថ្មីមួយគូពាក់មិនបាន ឥឡូវក្លាយជាកីឡាករឆ្នើម

2017-10-15 07:27:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធពាក់អាវលេខ ១១ របស់ Watford កីឡាករ Richarlison កាលពី ៤ ឆ្នាំមុន គ្មានលទ្ធភាពសូម្បីទិញស្បែកជើងទាត់បាល់សមរម្យ ប៉ុន្តែជីវិតបានផ្លាស់ប្ដូរ១៨០ដឺក្រេ បន្ទាប់ពីបុរសម្នាក់បាននាំយុវជនសញ្ជាតិប្រេស៊ីលនេះឲ្យសម្រេចក្ដីសុបិន្ត ក្លាយជាកីឡាករលំដាប់ពិភពលោក។

Renato បច្ចុប្បន្នជាភ្នាក់ងាររបស់ Richarlison គឺជាមនុស្សដំបូងហើយដែលបានផ្ដល់កាដូជាទីគាប់ចិត្ត ឲ្យខ្សែប្រយុទ្ធសញ្ជាតិប្រេស៊ីល នូវស្បែកជើងទាត់បាល់ថ្មីមួយគួ ដែលពីមុនមកកុមារកើតពីគ្រួសារក្រីក្រមួយនេះធ្លាប់ពាក់តែស្បែកជើងចាស់ៗ។

Renato ទៀតសោតក៏បាននាំយកយុវជន ដែលធ្លាប់តែទាត់បាល់លើឆ្នេរខ្សាច់ក្នុងភូមិ ឲ្យទៅលេងលីគទី២របស់ប្រេស៊ីល ក្នុងឆ្នាំ២០១៤។ មួយឆ្នាំក្រោយមក បានផ្លាស់ទៅលេងឲ្យក្លឹប Fluminense នៅក្របខ័ណ្ឌកំពូលប្រេស៊ីល។ ទីបំផុត នៅចុងខែកក្កដា ២០១៧ នេះ ការសម្រេចបានបំណងប្រាថ្នាដែលបានផ្លាស់ទៅលេងនៅ ក្របខ័ណ្ឌកំពូល English Premier League ក្នុងតម្លៃខ្លួនជិត ១៥លានដុល្លារ (១១,២ លានផោន)។

ពីគ្រួសារកម្មករក្រីក្រ ក្នុងតំបន់ទេសចរណ៍ដ៏សម្បូរសប្បាយនៃប្រទេសប្រេស៊ីល

Richarlison មានស្រុកកំណើតនៅភូមិភាគអាគ្នេយ៍ជាប់ដែនសមុទ្រនៃប្រទេសប្រេស៊ីល មានឆ្នេរដ៏ស្រស់ស្អាត និង ជាតំបន់ឧស្សាហកម្មផលិតដែក និង ប្រេង ដ៏មានសក្ដានុពល។ ប៉ុន្តែកុមារប្រេស៊ីលរូបនេះ ជាកូនច្បងនៃបងប្អូន៥នាក់នៃគ្រួសារក្រីក្រ ដែលមានឪពុក ជាកម្មករកាត់ថ្ម និង ម្ដាយ ជាអ្នកបោសសម្អាត។

"ខ្ញុំធ្លាប់មើលបាល់ Premier League តាមកញ្ចក់ទូរទស្សន៍ពូខ្ញុំ ហើយស្រមៃថានឹងបានទៅលេងទីនោះថ្ងៃណាមួយ"។ កីឡាករវ័យ២០ឆ្នាំនិយាយ។

ជីវិតថ្មីលើទឹកដីប៉ងប្រាថ្នា

កីឡាករវ័យ២០ឆ្នាំនិយាយថា អ្នកចាំទី Heurelho Gomes របស់ Watford ដែលជាជនរួមសញ្ជាតិប្រេស៊ីលដូចគ្នា បានជួយគេគ្រប់យ៉ាង រាប់តាំងពីជួយរកផ្ទះ រថយន្ត ជាអ្នកណែនាំពីរបៀបរស់នៅលើទឹកដីថ្មីនៅអង់គ្លេស ជាអ្នកបកប្រែ និងមែនទែនទៅជាអ្នកសម្របសម្រួលតាំងពីការហូបចុកជាដើម។

"និយាយឱ្យស្មោះទៅ ខ្ញុំមិនដឹងអ្វីទាំងអស់អំពី Watford ថាជា ទីក្រុង ឬ ក្រុមបាល់ទាត់។ ប៉ុន្តែខ្ញុំមានអារម្មណ៍កក់ក្ដៅខ្លាំងណាស់ កីឡាករ, បុគ្គលិក, អ្នកចាត់ការក្លឹប រួមក្រុមអ្នកគាំទ្របានស្វាគមន៍ខ្ញុំជាខ្លាំង "។ កីឡាករវ័យក្មេងសញ្ជាតិប្រេស៊ីលបាននិយាយ។

កាលលេងនៅប្រេស៊ីលពិតជាគ្រោះថ្នាក់ខ្លាំងណាស់ ប្រសិនបើប្រកួតចាញ់ អ្នកមិនអាចសូម្បីតែដើរកាត់ក្រុមអ្នកគាំទ្រ។ ពេលខ្លះពួកគេផ្លោះរបង ហើយមានពីរបីដងដែរ កាលដែល Richarlison នៅលេងឲ្យក្លឹប Fluminense នៅប្រេស៊ីល ក្រុមអ្នកគាំទ្របានទៅស្រែកជេរកីឡាករដល់ប្រលានយន្តហោះ ពេលពួកគេប្រកួតចាញ់។ Richarlison បន្ថែម។

ជារួម ខ្សែជីវិតរបស់ កីឡាករវ័យក្មេងប្រេស៊ីល ផ្លាស់ប្តូរទាំងស្រុង នៅពេលបាន Renato នាំទៅលេងបាល់ទាត់កម្រិតអាជីព បូករួមនឹងទេពកោសល្យរបស់ខ្សែប្រយុទ្ធរូបនេះ និងចុងក្រោយពេលទៅលេងឲ្យ Watford ដោយបានការជួយជ្រោមជ្រែងពីមិត្តរួមសញ្ជាតិ ពិសេសរឿងភាសា ដោយសារតែកុមារភាពក្រីក្រ Richarlison មិនបានរៀនសូត្រជ្រៅជ្រះ៕

ប្រភព៖ thesun ប្រែសសម្រួល៖ សុខ លាងហ៊ត