មន្ត្រីថាគម្រោងនៅស្ពានអាកាសក្បាលថ្នល់យឺតយាវបន្តិចដោយសារកំពុងកែសម្រួលផ្នែកខ្លះនៃគម្រោង
- 2017-10-17 01:54:39
- ចំនួនមតិ 0 | ចំនួនចែករំលែក 0
មន្ត្រីថាគម្រោងនៅស្ពានអាកាសក្បាលថ្នល់យឺតយាវបន្តិចដោយសារកំពុងកែសម្រួលផ្នែកខ្លះនៃគម្រោង
ចន្លោះមិនឃើញ
មន្ត្រីឲ្យដឹងថាគម្រោងសាងសង់ស្ពានអាកាស និងផ្លូវក្រោមដីបន្ថែមលើគម្រោងចាស់របស់ស្ពានអាកាសក្បាលថ្នល់ហាក់យឺតយ៉ាវបន្តិចដោយថាសាលារាជធានីភ្នំពេញកំពុងកែសម្រួលផ្នែកខ្លះនៃគម្រោងសាងសង់ បូករួមទាំងការងារបច្ចេកទេស និងដោះស្រាយផលប៉ះពាល់មួយចំនួនដល់ប្រជាពលរដ្ឋ ខណៈដែលពលរដ្ឋធ្វើដំណើរឆ្លងកាត់ចង់ឲ្យសាលារាជធានីពន្លឿនការងារនេះ។
ពេលធ្វើដំណើរឆ្លងកាត់ស្ពានអាកាសក្បាលថ្នល់នោះអ្នកធ្វើដំណើរអាចឃើញដងសន្ទូចខ្ពស់ត្រដែតកាត់ស្ពានអាកាសត្បាលថ្នល់ដែលប្រើសម្រាប់យោងសម្ភារសំណង់ ប៉ុន្តែដងស្ទូចនេះហាក់ពុំមានសកម្មភាពឡើយនៅប៉ុន្មានសប្តាហ៍ចុងក្រោយនេះ ខណៈផ្នែកខ្លះនៃការដ្ឋានដែលបានជីកដីរួចក៏មានស្មៅចាប់ផ្តើមដុះឡើងវិញផងដែរ។
សម្រាប់ប្រជាពលរដ្ឋធ្វើដំណើរឆ្លងកាត់ស្ពានអាកាសក្បាលថ្នល់វិញចង់ឲ្យសាលារាជធានីពន្លឿនការសាងសង់នេះដោយថាបច្ចុប្បន្នចរាចរណ៍នៅម្តុំស្ពានអាកាសនេះមានការកកស្ទះខ្លាំង។ លោក តាំង លី ជាពលរដ្ឋធ្វើដំណើរឆ្លងកាត់ស្ពានថ្លែងថាៈ «គម្រោងបានសម្ពោធបើកការដ្ឋានសាងសង់រួចទៅហើយ ប៉ុន្តែដូចជាគ្មានសកម្មភាពសាងសង់...ខ្ញុំឃើញដែកដាក់គលើគ្នា ហើយរណ្តៅដែលជីកដីហើយវិញស្មៅចាប់ផ្តើមដុះមួយៗ និងភាគរយធ្វើបានមានតិចតួចបំផុត»។
ចំណែកអ្នកស្រី អ៊ាវ ដាណែក បុគ្គលិកបម្រើការងារនៅក្រុមហ៊ុនឯកជនមួយបានលើកឡើងដែរថា សាលារាជធានីភ្នំពេញគួរជំរុញសកម្មភាពសាងសង់ឱ្យបានឆាប់រហ័សជាងនេះ ព្រោះថាក្រៅពីការកកស្ទះអ្នកដំណើរខ្លះក៏ព្រួយបារម្ភពីសុវត្ថិភាពផ្ទាល់ខ្លួនដែរ ខណៈដងសន្ទូចធំមួយត្រូវបានដំឡើង នៅកាត់ទទឹងផ្លូវតែម្តង។ អ្នកស្រីបន្ថែមថាៈ «ពេលជិះម៉ូតូកាត់ហ្នឹងម្តងៗ ខ្ញុំចេះតែងាកមើលទៅដងសន្ទូច ព្រោះបារម្ភនឹងសុវត្ថិភាពដែរ បើធ្វើរាល់ថ្ងៃមិនអីទេ តែនេះដូចជាគ្មានសកម្មភាពសាងសង់អីសោះ»។
ទាក់ទងនឹងការលើកឡើងនេះ អ្នកនាំពាក្យសាលារាជធានី លោក ម៉េត មាសភក្តី ពន្យល់ថាដោយសារតែខាងសាលារាជធានីកំពុងកែសម្រួលផ្នែកខ្លះនៃគម្រោង និងថាកំពុងដោះស្រាយផលប៉ះពាល់ខ្លះៗជាមួយប្រជាពលរដ្ឋ។ លោឲ្យដឹងដែរថា សាលារាជធានីក៏មាន គម្រោងសង់ស្ពានអាកាសថ្មីមួយទៀតត្រង់ចំណុចប្រសព្វផ្លូវ៦០ម៉ែត្រ ផ្លូវព្រះមុនីវង្ស និងផ្លូវ២៧១ ដែលនៅមិនឆ្ងាយប៉ុន្មានពីស្ពានអាកាសក្បាលថ្នល់។
លោកបន្ថែថាៈ «ខ្ញុំអាចនិយាយបានថា គម្រោងនេះអាចមានភាពយឺតយ៉ាវ មិនហើយដូចការគ្រោងទុកពីមុនទេ ប៉ុន្តែសាលារាជធានីនឹងនៅតែបន្តការសាងសងដដែលទេ»។
បើតាមគម្រោង ការកសាងដំណាក់កាលទីពីរនេះ ស្ពានអាកាសក្បាលថ្នល់នឹងមានផ្លូវអាកាសចំនួនពីរ និងផ្លូវបត់ក្រោមដីចំនួនពីរទៀត ដោយថាដើម្បីបញ្ជៀសការកកស្ទះចរាចរណ៍៕