ខឹងមិត្តប្រុសសុំចែកផ្លូវ បើករថយន្តតម្លៃជាង ១០ម៉ឺនដុល្លារទម្លាក់ទឹកចោល

2017-10-17 04:40:25
ចំនួនមតិ 0 | ចំនួនចែករំលែក 0

ចន្លោះមិនឃើញ

នារីជនជាតិរុស្សីម្នាក់ បានធ្វើឲ្យមនុស្សជាច្រើនហួសចិត្ត និងភ្ញាក់ផ្អើល បន្ទាប់ពីបើករថយន្តទំនើបម៉ាក Mercedes របស់មិត្តប្រុសតម្លៃជាង ១០ម៉ឺនដុល្លារទម្លាក់ក្នុងទឹកលិចបាត់។

នារីរូបនេះមានឈ្មោះ Kristina Kuchma អាយុ ២៤ឆ្នាំ មានចិត្តខឹងនឹងបុរសជាសង្សារឈ្មោះ Guy Gentiles អាយុ ៤១ឆ្នាំជាខ្លាំង ក្រោយពីគាត់បានសុំចែកផ្លូវអំឡុងពេលញ៉ាំអាហារពេលល្ងាចជាមួយគ្នា។ បន្ទាប់ស្ដាប់ឮពាក្យទាំងនេះ នាង Kuchma ក៏បានត្រលប់មកផ្ទះវិញភ្លាមៗតែម្នាក់ឯង។

បន្តិចក្រោយមក នាង Kuchma បានផ្ញើសារទៅកាន់មិត្តប្រុសថា "បងប្រាប់អូនថា បងនឹងជួយអូនបើកជំនួញរកស៊ីមួយ ហើយបងចង់ធ្វើវិនិយោគិន? ល្អណាស់ វិនិយោគិន អូនមានកាដូភ្ញាក់ផ្អើលមួយឲ្យបង នៅទីធ្លាក្រោយផ្ទះទៅមើលទៅ"។

លុះព្រឹកស្អែកឡើង លោកក៏បានទៅមើលក៏ឃើញរថយន្តម៉ាក Mercedes S400 របស់ខ្លួនកំពុងស្ថិតនៅបាតអាងទឹកទៅហើយ។ ដំបូងបុរសជាសង្សារស្ទើរធ្លាក់ថ្លើម ព្រោះខ្លាចនាងនៅក្នុងរថយន្ត ប៉ុន្តែពិនិត្យរួចរាល់មិនឃើញនាងឡើយ។ ទោះបីជាសុំចែកផ្លូវក៏លោកនៅតែបារម្ភ និងអាណិតនាងខ្លះដែរ។

បើតាមសម្ដីរបស់Gentiles ប្រាប់ថា មិត្តស្រីរបស់ខ្លួនចង់បើកជំនួញដោយសង្ឃឹមថា លោកនឹងជួយជាដើមទុនប្រមាណ ៥ម៉ឺនដុល្លារ។ លោកធ្លាប់ទិញកាបូបម៉ាក Gucci ទូរសព្ទ iPhone កាស Beat ជាកាដូរខួបកំណើតរបស់នាងម្ដងហើយ។ ចំណែកការសុំចែកផ្លូវនេះ គឺលោកមិនពេញចិត្តចំពោះការទាមទារសុំប្រាក់មិនចេះឈប់មិនចេះហើយរបស់មិត្តស្រីតែម្ដង៕