ឆ្លៀតទំនេរពីការសិក្សាជួយលក់លៀសម្តាយយកប្រាក់ទុករៀន
- 2017-10-20 03:38:27
- ចំនួនមតិ 0 | ចំនួនចែករំលែក 0
ឆ្លៀតទំនេរពីការសិក្សាជួយលក់លៀសម្តាយយកប្រាក់ទុករៀន
ចន្លោះមិនឃើញ
ដោយសារស្ថានភាពគ្រួសារមិនសូវធូរធារ បានជំរុញឲ្យយុវជនម្នាក់ឆ្លៀតពេលរៀនផងជួយម្តាយលក់លៀសហាលតាមចិញ្ចើមផ្លូវផង ដើម្បីរកប្រាក់ដោះស្រាយបន្ទុកគ្រួសារព្រមទាំងឧបត្ថម្ភដល់ការសិក្សារបស់ខ្លួន។
គយ ណារ័ត្ន បច្ចុប្បន្នជាសិស្សថ្នាក់ទី១២ នៃវិទ្យាល័យជាស៊ីមតាកែវ ត្បិតឆ្នាំនេះត្រូវជាឆ្នាំប្រឡងក្តី ក៏ណារ័ត្ន មិនអាចចំណាយពេលតែទៅលើការសិក្សាមួយមុខនោះទេ តែណារ័ត្នត្រូវឆ្លៀតពេលទំនេរពីការសិក្សាបន្តិចបន្តួចដើម្បីជួយលក់លៀសហាលម្តាយនៅទីតាំងមួយជាប់មាត់បឹងតាកែវ។
យុវជនមានស្រុកកំណើតក្នុងក្រុងដូនកែវ រូបនេះ មានឪពុកជាមន្ត្រីរាជការចូលនិវត្តន៍ ហើយគ្រួសារពឹងមួយផ្នែកធំលើរបបរលក់លៀសហាលនេះ ដែលណារ័ត្ន ថាខ្លួនត្រូវជួយម្តាយធ្វើការងារនេះដើម្បីបានថវិកាខ្លះសម្រាប់រៀន និងផ្គត់ផ្គង់គ្រួសារ។ ណារ័ត្ន ថាខ្លួនត្រូវក្រោកពីព្រលឹមដើម្បីជួយលាងសម្អាតលៀស ទុកឲ្យម្តាយផ្សំគ្រឿងសម្រាប់ហាលលក់ឲ្យបានរួចរាល់មុននឹងទៅសាលា និងពេលចេញពីរៀន ណារ័ត្នថាខ្លួនក៏មកជួយលក់ម្តាយបន្តទៀត។
ណារ័ត្ន បន្ថែមថាៈ «ខ្ញុំគ្មានអាម្មណ៍ខ្មាសអៀនជាមួយមិត្តភក្តិអីទេក្នុងការលក់លៀសតាមចិញ្ចើមផ្លូវបែបនេះ... របរលក់លៀសហាលជាមួយម្តាយពិតជាចាំបាច់ណាស់សម្រាប់ទ្រទ្រង់ជីវភាពគ្រួសារ»។ បើនិយាយពីចំណូលពីការលក់លៀសហាលនេះវិញ ណារ័ត្ន ថាមួយថ្ងៃអាចរកប្រាក់បានប្រហែលជាពីរទៅបីម៉ឺនរៀនប៉ុណ្ណោះ។
សម្រាប់ម្តាយរបស់ណារ័ត្នវិញ គឺអ្នកស្រី ខ្មៅ ផល្លា មានប្រសាសន៍ថាអ្នកស្រីមិនចង់ឲ្យកូនជួយដូចនេះទេ ដោយបារម្ភថាអាចប៉ះពាល់ដល់ការសិក្សារបស់កូន។ អ្នកស្រីបន្ថែមថាៈ « ណារត្ន័តែងនិយាយថាមិនឲ្យឪពុកម្តាយបារម្ភពីការសិក្សារបស់គេទេតែទោះបីយ៉ាងណាក៏ខ្ញុំចេះតែបារម្ភខ្លាចមុខរបរនេះធ្វើឲ្យប៉ះពាល់ដល់ការសិក្សារបស់កូនព្រោះឆ្នាំនេះជាឆ្នាំប្រលងបាក់ឌុបផង»។
សម្រាប់ ណារ័ត្ន របរលក់លៀសហាលមិនធ្វើឲ្យណារ័ត្នខ្មាសមិត្តភក្តិនៅទេ តែបានញ៉ាំងឲ្យ ណារ័ត្ន មានគំនិតចង់ធ្វើជាអ្នកជំនួញ ហើយរំពឹងថាអាចបន្តការសិក្សាលើផ្នែកពាណិជ្ជកម្មក្រោយបញ្ចប់ថ្នាកទី១២៕