រឿងដើមឈើ១ដើម កក្រើកនៅស្រុកថៃ ត្រូវបង្ខំចិត្តគាស់ចោល ដោយហេតុផលហួសចិត្ត

2017-10-21 04:08:26
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងរ៉ាវដ៏ចម្លែកមួយ បានកើតឡើងនៅក្នុងប្រទេសថៃ ស្ដីពី វិវាទរវាងដើមឈើ និង កាំជណ្ដើរ បន្ទាប់ពីអ្នកប្រើប្រាស់បណ្ដាញសង្គមជាច្រើនបញ្ចេញទស្សនៈខុសៗគ្នា រឿងគាស់ដើមឈើ ចេញពីកាំជណ្ដើរស្ពានអាកាសថ្មើរជើង ស្របពេលដែលខ្លះស្នើឲ្យគាស់ ខណៈអ្នកខ្លះចំអក នឹងចំណាត់ការគួរឲ្យអស់សំណើចនេះ។

ប្រមាណ៦ឆ្នាំមុន ស្ពានអាកាសថ្មើរជើងមួយកន្លែងត្រូវបានសាងសង់នៅផ្លូវផឡាក់ជីត ទីក្រុងបាងកក ដែលជណ្តើររបស់វាបានទម្លាក់ត្រឹមគល់ប៉ាដាវដ៏ចំណាស់មួយដើម តែអាជ្ញាធរមិនបានកាប់ឬគាស់ចេញទេ ទុកឲ្យជណ្តើរស្ពាន និង ដើមឈើនេះរស់រួមរស់ដោយសុខក្សេមក្សាន្តជាមួយគ្នាអស់ជាច្រើនឆ្នាំ។ នេះបើតាមកាសែតក្នុងស្រុក The Coconut។

ប៉ុន្តែថ្មីៗនេះ មានអ្នកលេង Facebook ម្នាក់បានថតរូបដើមឈើនេះហើយ post រហូតធ្វើឲ្យអ្នកប្រើប្រាស់បណ្ដាញសង្គមជាច្រើនចូលមក comment និង លើកជាសំណួរអំពីសុភវិនិច្ឆ័យរបស់សាលារាជធានី ម៉េចបានទុកឲ្យដើមឈើមួយដើមមកបាំងផ្លូវអ្នកដើររាប់ឆ្នាំចឹងកើត?

យ៉ាងណាមិញ ក៏មានអ្នកលេង Facebook ជាច្រើនទៀតនៅក្នុងប្រទេសថៃ បានសរសេរបែបចំអកថាកំហុសអ្នកណា? “ដើមឈើមកមុន ឬ ស្ពានមកមុន?”។ "អ្នកធ្វើស្ពាននេះ គួរតែបានពានរង្វាន់មនុស្សឆ្នើមប្រចាំឆ្នាំ!”។

តែយ៉ាងណា សាលារាជធានីបាងកក មិនបានកាប់ដើមឈើនេះទេ ហើយដើម្បីចៀសវាងការរិះគន់ពីមជ្ឈដ្ឋានទូទៅ សាលារាជធានីគ្រាន់តែគាស់វាទៅដាំនៅទីតាំងផ្សេង ហើយផុសរូបដើមប៉ាដាវ លើទឹកដីថ្មី ដើម្បីឲ្យមហាជនអស់ការសង្ស័យ៕