សរុបរឿងបរទេស ត្រូវហាមបញ្ចាំង និងដកខ្លួនលែងថតនៅស្រុកខ្មែរ

2017-10-24 02:47:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តបរទេសរឿង “Kingsman 2” ទើបត្រូវនាយកដ្ឋានភាពយន្តរបស់កម្ពុជា ហាមឃាត់ចាក់បញ្ចាំងនៅកម្ពុជាថ្មីៗនេះ ដោយហេតុថា រឿងនេះបានយកកម្ពុជាធ្វើជាសំបុកភេរវករ ធ្វើឲ្យមានការព្រួយបារម្ភ។ ប៉ុន្តែនេះមិនមែនជារឿងទី១ទេ ដែលត្រូវហាមឃាត់មិនឲ្យបញ្ចាំងនៅលើទឹកដីព្រះរាជាណាចក្រកម្ពុជា គឺនៅមានរឿងច្រើនទៀត បូកថែមទាំងរឿងខ្លះ ប្រកាសដកខ្លួនលែងថត នៅកម្ពុជាដោយខ្លួនឯងទៀតផង។ រឿងទាំងនោះមានដូចជា៖

១. “No Escape” ៖ និយាយពីគ្រួសារជនជាតិអាមេរិកមួយគ្រួសារដែលជាប់គាំងក្នុងរដ្ឋប្រហារមួយ ដោយរឿងនេះថតនៅប្រទេសថៃ។ ក្រោយចេញ Trailer រឿងនេះ បានធ្វើឲ្យពលរដ្ឋខ្មែរជាច្រើនប្រតិកម្មថា មានចេតនាមើលងាយអក្សរសាស្ត្រខ្មែរ ដោយសារតែក្នុងភាពយន្តមួយនេះ បានប្រើប្រាស់អក្សរខ្មែរបញ្ច្រាសជើង ដូចជា "យ ឈ " ជាដើម។ ជាលទ្ធផល រឿងនេះត្រូវហាមឃាត់នៅឆ្នាំ ២០១៥។

២."Fifty Shades of Grey”៖ រឿងនេះ ក៏ត្រូវក្រសួងហាមឃាត់កាលពីឆ្នាំ ២០១៥ ដែរ ដោយសារតែសាច់រឿងមានឈុតស្រើបស្រាលខ្លាំង។ ហេតុផលដូចគ្នានេះ “Fifty Shades of Grey”ក៏ត្រូវបានហាមឃាត់បញ្ចាំងនៅប្រទេសមួយចំនួនទៀតដែរដូចជា៖ ម៉ាឡេស៊ី ឥណ្ឌូណេស៊ី កេនយ៉ា និងអារ៉ាប់រួមជាដើម។

៣.ភាពយន្តហុងកុងរឿង "បេសកកម្មទន្លេមេគង្គ"៖ ភាពយន្តខ្នាតធំរបស់ហុងកុងនេះ ដំបូងឡើយបានដាក់ផែនការមកថតនៅកម្ពុជា ដោយថែមទាំងបានជ្រើសរើសតួសម្ដែងខ្មែរខ្លះចូលរួមផង។ ប៉ុន្តែក្រោយមក ផលិតកម្ម “Firework” ម្ចាស់ផលិតរឿងនេះ បានប្រកាសដកខ្លួនវិញ ជាមួយហេតុផលស្រពិចស្រពិល។ បញ្ហានេះ កាលណោះលោក ស៊ិន ចន្ទសាយ៉ា អតីតប្រធាននាយកដ្ឋានភាពយន្ត បានឲ្យដឹងថា មានបញ្ហាពាក់ព័ន្ធនឹងពេលវេលា ទីកន្លែង និងអាកាសធាតុ។ ប៉ុន្តែការដែលក្រុមផលិតបរទេសនោះ យកកម្ពុជាជាជម្រើសទី២ ជាមួយប្រទេសជិតខាងក៏ជាហេតុផលមួយដែរ។ លោកលើកឡើងថា “តាមខ្ញុំដឹងគេបារម្ភថា Scene ខ្លះថៃគេអត់អនុញ្ញាត អីចឹងគេមកស្រុកយើង តែឥឡូវថៃគេអនុញ្ញាតហើយ គេ(ផលិតកម្ម)ក៏ Move ទៅវិញ។ អីចឹងខ្ញុំថា គេទុកយើងជាជម្រើសទី២ទេ"។

៤.រឿង “មហាអធិរាជាណាចក្រខ្មែរ”៖ រឿងនេះ គឺជារឿងដ៏ធំដែលហូលីវូដបានប្រកាសមកផលិតឲ្យកម្ពុជាជាមួយទុនជាង ៧០លានដុល្លារ ដោយបានទាំងបានជ្រើសរើសតួសម្ដែងលំដាប់ពិភពលោកមានដូចជា Angelina Jolie តារាចិន លី លានជា កីឡាកាសល្បីឈ្មោះ ចន ស៊ីណា និងតារាស្រីកូរ៉េ ហាន់ជីអ៊ុន ជាដើមផង មកថត។ ប៉ុន្តែបានត្រឹមតែធ្វើឲ្យប្រជាពលរដ្ឋខ្មែរមោទនភាពនឹងដំណឹងនេះ រឿង “មហាវីរបុរសខ្មែរ” ស្ងាត់ឈឹង មិនឃើញមានសកម្មភាពអ្វីឡើយ។ ក្រោយមកទើបមានដំណឹងថា ក្រុមផលិតបានសម្រេចផ្អាកវិញហើយ ជាមួយហេតុផលមិនច្បាស់លាស់៕