បំបែកកំណត់ត្រា! មហោស្រពភាពយន្តខ្លីចតុមុខឆ្នាំនេះ មានរឿងបរទេសរាប់ពាន់

2017-10-26 03:38:21
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីមហោស្រពភាពយន្តខ្លីចតុមុខ ឆ្នាំ ២០១៧នេះ ទទួលបានការគាំទ្រយ៉ាងខ្លាំងពីផលិតករភាពយន្តបរទេស ដែលមានរឿងរហូតដល់ ៣១២៤ រឿងខ្លី មកពីប្រទេសសមាជិកអាស៊ាន សហរដ្ឋអាមេរិក និងសហភាពអឺរ៉ុប។ នេះជាការបំបែកកំណត់ត្រាថ្មីមួយទៀត នេះបើយោងតាម ប្រសាសន៍របស់លោក ស៊ំ ស៊ីថែន អ្នកនាំពាក្យរបស់មហាស្រពភាពយន្តខ្លីចតុមុខ ដែលថ្លែងក្នុង ពិធីបើកមហោស្រពនេះកាលពីយប់មិញ នៅសាលមហោស្រពចតុមុខ។

ក្នុងឱកាសនោះដែរ ឯកឧត្តម សំ សុគន្ធ រដ្ឋលេខាធិកា នៃក្រសួងវប្បធម៌ និងវិចិត្រសិល្បៈ បាន បញ្ជាក់ថា ពីមួយឆ្នាំទៅមួយឆ្នាំ ការរីកផុសផុលនៃវិស័យសិល្បៈភាពយន្តនៅប្រទេសកម្ពុជាកាន់តែរីកចំរើន និងកាន់តែមានភាពល្បីល្បាញ រហូតដល់ក្រៅប្រទេសចូលរួម និងមានឱកាសស្វែងយល់ពីសុខសន្តិភាពរបស់កម្ពុជាផងដែរ។

ក្នុងនោះសន្ទុះនៃការផលិតខ្សែភាពយន្តរបស់ផលិតករខ្មែរក៏កាន់តែច្រើនដូចគ្នា ជាពិសេសក្នុងឆ្នាំនេះ មហោស្រពភាពយន្តខ្លីចតុមុខ ក៏ទទួលបានខ្សែភាពយន្តខ្លីដាក់ប្រកួតពីផលិតករខ្មែររហូតដល់ ៤៩ រឿង ហើយរឿងដែលជាប់ជាជម្រើសក្នុងការចាប់បញ្ចាំងមានរហូតដល់ ២៨ រឿង ហើយរឿងដែលជាប់ក្នុងការប្រកួតជុំចុងក្រោយ មាន ៧រឿង។

នេះជាលើទី ៦ ហើយ នៃការប្រារព្វកម្មវិធី មហោស្រពចតុមុខភាពយន្តខ្លីចតុមុខ នៅឆ្នាំនេះមានការបង្ហាញនូវស្នាដៃខ្សែភាពយន្តខ្លីផ្សេង រហូតដល់ទៅ ៤ កម្មវិធី ដូចជាខ្សែភាពយន្តខ្លីរបស់ក្រុមជុំរំភាពយន្ត ឬ FilmCam, ខ្សែភាពយន្តខ្លីរបស់គម្រោង Legacy Film Lap, កម្រងខ្សែភាពយន្តខ្លី Family and You និងការបង្ហាញខ្សែភាពយន្ត ៥ ដែលជាប់ចំណាត់ថ្នាក់លេខ ១ ក្នុងរយៈពេល៥ឆ្នាំដំបូងរបស់មហោស្រពភាពយន្តខ្លីចតុមុខ។

អត្ថបទៈ Sunny

រូបភាពៈ CSFF