ផលិតផ្ទះម្រេញគង្វាល ជាមុខរបរពេញនិយមនៃអ្នកភូមិសីមា ខេត្តតាកែវ

2017-10-26 23:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកភូមិមួយនៅខេត្តតាកែវមិនតិចជាង២០គ្រួសារទេកំពុងប្រញឹកដៃធ្វើផ្ទះម្រេញគង្វាលសម្រាប់បោះដុំលក់ឲ្យអ្នកនៅភ្នំពេញ និងតាមបណ្តាខេត្តមួយចំនួន។ ផ្ទះសម្រាប់ម្រេញគង្វាលនេះត្រូវគេទិញយកទៅដាក់នៅផ្ទះដោយជឿថាបានសេចក្តីសុខ និងរកទទួលទានមានបាន។

កំពុងអង្គុយធ្វើផ្ទះម្រេញគង្វាលនៅក្រោមផ្ទះ អ្នកស្រី ញ៉ែម ម៉ារីមា ឲ្យSabay ដឹងថាអ្នកស្រី និងស្វាមីចេះធ្វើផ្ទះម្រេញគង្វាលនេះតាំងពីនៅជាមួយឳពុកម្តាយម្លេះ ដោយថារៀនចំនាញនេះតពីឪពុកម្តាយ។ អ្នកស្រីឲ្យដឹងថាអ្នកភូមិប្រហែលជា២០គ្រួសារកំពុងប្រកបរបរនេះ។

(អ្នកស្រី ញ៉ែម ម៉ារីមា កំពុងអង្គុយបិទផ្ទះម្រេញគង្វាល)

រស់នៅក្នុងភូមិសីមា ឃុំលាយបូរ ស្រុកត្រាំកក់ ខេត្តតាកែវ អ្នកស្រីឲ្យដឹងថាផ្ទះម្រេញគង្វាលនេះធ្វើឡើងពីឫស្សីបិតឲ្យស្តើង និងកាត់បិទជាទ្រង់ទ្រាយផ្ទះដោយកាវស្អិត។

ចំណែកតម្លៃវិញក៏មិនធម្មតាដែរ អ្នកស្រីថាអ្នកទិញខ្លះបញ្ជាទិញផ្ទះមួយក្នុងតម្លៃ១០០ដុល្លារដោយផ្ទះនោះត្រូវមានក្បាច់រចនាច្រើន និងមានទំហំធំជាងផ្ទះលក់ធម្មតា។ អ្នកស្រីបញ្ជាក់ថាៈ « ដោយហេតុថាវាថ្លៃព្រោះមានខ្យូសអង្គុយលេង អាងហែលទឹក និង ម៉ូតក្បូរក្បាច់រចនាតុបតែងច្រើនទៀត»។

តម្លៃជាធម្មតាអ្នកស្រីថាចន្លោះពី៧០០០រៀល ទៅ៦ម៉ឺនរៀនទៅតាមប្រភេទ និងទំហំនៃ ផ្ទះនេះ។ អ្នកស្រីបន្តថាៈ «សព្វថ្ងៃមានអតិថិជនគាំទ្រកាន់តែច្រើនព្រោះគេមានជំនឿថាដាក់របស់នេះនៅមុខផ្ទះជួយឲ្យរកស៊ីធូរធារហើយសព្វថ្ងៃនេះយកទៅលក់បោះដុំរហូតដល់ភ្នំពេញ»។

(ផ្ទះមួយប្រភេទក្នុងចំណោមប្រភេទផ្សេងទៀតរបស់ផ្ទះម្រេញគង្វាល)

ចំណែកអ្នកផលិតផ្ទះម្រេញគង្វាលម្នាក់ទៀតគឺលោក ជាង ណាន ឲ្យដឹងដែរថាផ្ទះនេះមានអតិថិជនពេញនិយមទិញយកទៅដាក់តាមផ្ទះច្រើន ដោយជឿងថាម្រេញគង្វាលជាអ្នកជួយការពារផ្ទះសម្បែង។

លោកបញ្ជាក់ថាៈ « ដោយគេមានជំនឿថាម្រេញគង្វាលដែលមានកូនក្មេងតូចៗ៤នាក់នោះជាអ្នកជួយចាំថែរក្សាផ្ទះសម្បែងទប់ស្កាត់ខ្មោចព្រាយបិសាចមិនឲ្យយាយីម្ចាស់ផ្ទះហើយរកស៊ីមានបាន»។

អ្នកផលិតផ្ទះម្រេញគង្វាលអះអាងថាមុខរបរនេះអាចធ្វើឲ្យពួកគាត់បានចំណូលគួរសមសម្រាប់ផ្គត់ផ្គង់ជិវភាពប្រចាំថ្ងៃ និងថាមិនចាំបាច់ចំណាកស្រុកទៅធ្វើការនៅទីក្រុង ឬ ក្រៅប្រទេស៕

អត្ថបទដោយ៖ ជិន វេន