នៅថ្ងៃការ ភ្ញៀវនឹងមិនស៊ីត្រាវរអ៊ូរឿងភេសជ្ជៈទេ បើធ្វើតាមនេះ
- 2017-11-06 09:47:25
- ចំនួនមតិ 0 | ចំនួនចែករំលែក 0
នៅថ្ងៃការ ភ្ញៀវនឹងមិនស៊ីត្រាវរអ៊ូរឿងភេសជ្ជៈទេ បើធ្វើតាមនេះ
ចន្លោះមិនឃើញ
បន្ទាប់ពីវល់ៗរឿងរកចុងភៅ សម្អាងការ ហាង និងធៀបការ ការងារបន្ទាប់គឺត្រូវពិភាក្សាគ្នាថាគួរដាក់ប្រភេទភេសជ្ជៈអីសម្រាប់ទទួលភ្ញៀវ ជាពិសេសកម្មវិធីញ៉ាំការពេលល្ងាចតែម្ដង។
ការកំណត់បរិមាណ និងប្រភេទភេសជ្ជៈ គឺផ្អែកលើចំនួន និងប្រភេទភ្ញៀវដែលចូលរួម។ ការកំណត់បរិមាណភេសជ្ជៈជារឿងងាយស្រួលទេ ព្រោះបើយើងទៅរកដេប៉ូចែកចាយ គេនឹងសួរថាភ្ញៀវយើងមានប៉ុន្មានតុ ហើយខាងដេប៉ូនឹងចាត់ចែងគណនារួចជាស្រេចថាភេសជ្ជៈប៉ុន្មានកេសត្រូវសម្រាប់កម្មវិធី។ បើសល់ ដេប៉ូនឹងយកវិញ។
សំណួរសួរថា ម្ចាស់ដើមការគួរដាក់ភេសជ្ជៈប្រភេទណាខ្លះ? ភេសជ្ជៈត្រង់នេះ សំដៅប្រភេទទឹកក្រូច និងទឹកផ្លែឈើ។
ការជ្រើសរើសប្រភេទភេសជ្ជៈ គឺត្រូវគិតពីប្រភេទភ្ញៀវចូលរួម ថាតើ ប៉ុន្មានភាគរយចាស់ ប៉ុន្មានភាគរយក្មេង? នេះការលើកឡើងរបស់លោក ហេង ទី អាជីវករផ្សារថ្មីដែលទើបតែការរួចកាលពីចុងឆ្នាំមុន។
"អង្កាល់ការខ្ញុំ អត់បានគិតដល់ ឲ្យតែគេដាក់តែ ប៊ីយែរ និងទឹកក្រូច [មានហ្គាស]។ ភ្លេចគិតរឿងទឹកក្រូចប្រភេទអីខ្លះ និងទឹកផ្លែឈើសម្រាប់មនុស្សចាស់ ព្រោះចាស់ៗអត់ចូលចិត្តញ៉ាំរបស់មានហ្គាស។ ដឹងអី ថ្ងៃញ៉ាំការ ពួកម៉ាកខ្ញុំដែលអង្គុយតុជាមួយចាស់ៗ ប្រាប់ថា ពួកគាត់រអ៊ូ ព្រោះអត់មានទឹកក្រូច និងទឹកផ្លែឈើដែលញ៉ាំបាន"។
កុំឲ្យខុសដូចលោក បុរសត្រៀមធ្វើជាឪពុកគេឆាប់ៗនេះ បានលើកឧទាហរណ៍ថា បើគង់តែយើងយកទឹកក្រូចសម្រាប់កម្មវិធី ២០ កេសដដែល ក្នុងនោះយើងគួរបែងចែកប៉ុន្មានកេសសម្រាប់ទឹកក្រូចមានហ្គាស ដូច Pepsi អីទៅ ប៉ុន្មានកេសសម្រាប់ទឹកក្រូចផ្អែមអត់សូវមានហ្គាស ដូចជា 7Up, Mirinda និងប៉ុន្មានកេសសម្រាប់ទឹកផ្លែឈើអីទៅ។ ក្រៅពីទឹកសុទ្ធ ចាស់ៗក៏អាចញ៉ាំភេស្ជៈផ្សេងៗបាន កុំឲ្យដូចពិធីការលោក មានតែភេសជ្ជៈសម្បូរហ្គាស ពិបាកដល់ចាស់ៗដែលមានបញ្ហាក្រពះ។
អត្ថបទពាក់ព័ន្ធ៖ ត្រូវប៉ាន់ម៉ាច់អ្នកជិតការ! ភេសជ្ជៈប៉ុន្មានប្រភេទនេះ កំពុងផ្ដល់រង្វាន់រាប់ពាន់ដុល្លារ ទាំងអ្នកក្រុង ទាំងអ្នកខេត្ត
រីឯស្រីស្អាត ម៉ី ម៉ី ម្ចាស់ហាងផ្កាមួយកន្លែងនៅម្ដុំបឹងកេងកង ប្រាប់តាមហ្វេសប៊ុកថា ម្ចាស់ការភាគច្រើនរវល់វក់វីរឿងច្រើន ចឹងអត់បានគិតល្អិតរឿងប្រភេទទឹកក្រូច ទឹកផ្លែឈើអីទេ។ បើគិត គិតត្រឹមប្រភេទស្រា ប៊ីយែរប៉ុណ្ណោះ។
"កុំតែបានបងសួរ កុំអីភ្លេចត្រង់ហ្នឹងបាត់! អូនជិតការដែរ តែអត់បានលម្អិតរឿងហ្នឹងសោះ ប្រុងនឹងឲ្យខាងដេប៉ូរៀបចំម៉ាកំផ្លេហើយតើ”! ស្រីស្អាតវ័យជិត ២០ ឆ្នាំដែលគ្រោងនឹងរៀបការដើមឆ្នាំក្រោយនេះ ភ្ញាក់ខ្លួន ពេល Sabay សម្ភាស។
សាច់ញាតិបងប្អូន និងភ្ញៀវ មានច្រើនប្រភេទ និងចំណូលចិត្តខុសៗគ្នា ចឹងម្ចាស់ដើមការគួរមានជម្រើសភេសជ្ជៈច្រើនតាមដែលអាចធ្វើបាន ព្រោះអីខាងដេប៉ូនឹងយកវិញ បើនៅសល់។ សំខាន់ គឺចេះគ្រប់គ្រងការចាត់ចែងភេសជ្ជៈទាំងនោះ កុំឲ្យបាត់មិនដឹងមុខទៅ ជាការស្រេចហើយ៕