ឱកាសពិសេស ជួបជាមួយតួកាចឆ្នាស និងស្លូតបូតគួរឲ្យស្រលាញ់ សម័យសង្គមរាស្ត្រនិយម

2017-11-07 08:36:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តនឹងបានជួបវីរៈសិល្បករដ៏មានទេពកោសល្យ មានឈ្មោះល្បីល្បាញនៅក្នុងទសវត្សរ៍ ៦០ គឺ អ្នកស្រី ឌី សាវ៉េត តារាទឹកភ្នែក និង អ្នកស្រី សាក់ ស៊ីស្បោង តារាស៊ិចស៊ី កាចឆ្នាស់ឆ្នើម នៅក្នុងកម្មវិធី «មួយម៉ឺនអាល័យ» លើកទី៣ ដែល រៀបចំដោយ ក្រុមព្រះសូរិយា។

កម្មវិធីនេះនឹងប្រព្រឹត្តទៅ នៅថ្ងៃទី ១៨ វិច្ឆិកា ឆ្នាំ២០១៧ ចាប់ ពីម៉ោង ៣ រសៀល រហូតដល់ ល្ងាច នៅមជ្ឈមណ្ឌល សហប្រតិ្តការកម្ពុជា-ជប៉ុន (CJCC)។

តាមការបញ្ជាក់ ពី លោក យាង វណ្ឌី ប្រធានក្រុមព្រះ សូរិយា ប្រាប់ Sabay ថា កម្មវិធីនេះគឺធ្វើឡើងដើម្បីរម្លឹក ពីមរតភាពយន្ត ក្នុងសម័យសង្គមរាស្រ្តនិយម ដែលជាការរួមសម្តែងរបស់អ្នកស្រី ឌីសាវ៉េត និង សាក់ ស៊ីស្បោង និងបង្ហាញបទចម្រៀងដែលជាស្នាដៃផលិត របស់ក្រុមព្រះសូរិយាផងដែរ។

ប្រធានក្រុមព្រះសូរិយាបន្ថែមថា កន្លងមកក្រុមលោកជ្រាវឃើញ អ្នកស្រី សាក់ស៊ីស្បោង និងអ្នកស្រី ឌី សាវ៉េត បានសម្តែងរួមគ្នា មានប្រមាណជាង៣០រឿង ។

ចំពោះប្រិយមិត្តដែលមានបំណងចង់ជួប និងទស្សនា ការសម្តែងខ្សែភាពយន្តរបស់តារាជើងចាស់ទាំងពីររូប គឺត្រូវទិញសំបុត្រ ចូលរួមទស្សនា តម្លៃ២ម៉ឺនរៀល បើសិនជាទិញបានមុនថ្ងៃទី១០ ខែវិច្ឆិកា តែបើក្រោយថ្ងៃទី១០នេះ សំបុត្រម្នាក់ តម្លៃ ៤ម៉ឺនរៀល។

ប្រាក់ដែលបានមកពីការលក់សំបុត្រ នឹងប្រើប្រាស់សម្រាប់ទទ្រង់ដល់ក្រុមព្រះសុរិយា ក្នុងការសិក្សាស្រាវជ្រាវលើវិស័យភាពយន្តខ្មែរ។

អត្ថបទៈ ស្រីអូន