ស្ត្រីម្នាក់ត្រូវបានបញ្ឈប់ពីការងារ បន្ទាប់ពីឲ្យម្រាមដៃកណ្ដាលទៅក្បួនឡាន ដូណាល់ ត្រាំ

2017-11-07 13:18:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីវ័យ ៥០ម្នាក់កាលពីពេលថ្មីៗនេះត្រូវបានបញ្ឈប់ពីការងារ បន្ទាប់ពីស្ត្រីរូបនេះបង្ហោះរូបភាពខ្លួនលើកម្រាមដៃកណ្ដាលទៅក្បួនរថយន្តរបស់លោកប្រធានាធិបតី ដូណាល់ ត្រាំ ទៅក្នុងបណ្ដាញទំនាក់ទំនងសង្គម។

ស្ត្រីរូបនេះមានឈ្មោះ Juli Briskman ត្រូវបានបណ្ដេញចេញពីតួនាទីជាបុគ្គលិកផ្នែកទីផ្សារ និងទំនាក់ទំនង ដោយក្រុមហ៊ុន Akima LLC បន្ទាប់ពីអ្នកស្រីយករូបអ្នកស្រីលើកម្រាមដៃកណ្ដាលធ្វើជា Profile Picture ក្នុងបណ្ដាញទំនាក់ទំនងសង្គម Facebook និង Twitter របស់អ្នកស្រី។ ក្រុមហ៊ុនបានលើកយកហេតុផលនៃការបញ្ឈប់ថា អ្នកស្រីបានរំលោភច្បាប់ប្រើប្រាស់បណ្ដាញសង្គម ដែលក្រុមហ៊ុនបានចែង ដោយរូបភាពនេះមានលក្ខណៈមិនសមរម្យ។ បន្ថែមពីលើនេះ ក្រុមហ៊ុនដែលមានទីតាំងក្នុងរដ្ឋ Virginiaមួយនេះ ក៏បានប្រាប់ទៅអ្នកស្រីទៀតថា ក្រុមហ៊ុនជាដៃគូរកស៊ីជាមួយរដ្ឋាភិបាល រូបភាពបែបនេះអាចធ្វើឲ្យប៉ះពាល់មុខជំនួញរបស់ក្រុមហ៊ុន។

តាមពិត រូបភាពនេះត្រូវបានថតដោយ ជាងថតរូប ធ្វើការនៅក្នុងសេតវិមានម្នាក់ ហើយបានបង្ហោះចែកចាយពេញបណ្ដាញសង្គម។ បន្ទាប់មកអ្នកស្រី Briskman ក៏យករូបនេះធ្វើជា Profile Picture ក្នុងបណ្ដាញសង្គមរបស់អ្នកស្រី រួចក៏ត្រូវក្រុមហ៊ុនបញ្ឈប់ពីការងារតែម្ដង។

មូលហេតុដែលអ្នកស្រី Briskman លើកម្រាមដៃកណ្ដាលទៅក្បួនឡានលោក ត្រាំ បែបនេះ គឺដោយសារអ្នកស្រីមិនពេញចិត្តនឹងគោលនយោបាយរបស់ប្រធានាធិបតីទាក់ទងនឹង Obamacare, ជនអន្តោប្រវេសន៍ និង Puerto Rico។ ម្យ៉ាងទៀត អ្នកស្រីក៏បានអះអាងខ្លួនថា ជាអ្នកគាំទ្របក្សប្រជាធិបតេយ្យផងដែរ ខណៈលោក ត្រាំ ជាប្រធានាធិបតីមកពីគណបក្សសាធារណរដ្ឋ។

បើទោះជាត្រូវបានបញ្ឈប់ពីការងារក៏ដោយ អ្នកស្រី Briskman បាននិយាយថាអ្នកស្រីមិនភាពស្ដាយក្រោយឡើយ ក្នុងការបង្ហោះរូបមួយនេះ ដោយអ្នកស្រីបញ្ជាក់ថា នេះជាឱកាសសម្រាប់អ្នកស្រីក្នុងបញ្ចេញនូវការយល់ឃើញរបស់អ្នកស្រី ទៅលើស្ថានភាពរបស់សហរដ្ឋអាមេរិកនាពេលបច្ចុប្បន្ន៕

ប្រភព៖ Huffingtonpost ប្រែសម្រួល៖ ហ៊ីម រស្មី