ឱកាសល្អសម្រាប់ផលិតករខ្មែរស្វែងយល់បទពិសោធន៍ពីផលិតករភាពយន្តបរទេសល្បីៗ

2017-11-08 07:54:10
ចំនួនមតិ 0 | ចំនួនចែករំលែក 0

ចន្លោះមិនឃើញ

មហោស្រពភាពយន្តជប៉ុន ដែលប្រព្រឹត្តទៅចាប់ពីថ្ងៃទី៩ ដល់ទី១២ខាងមុខនេះ បានសម្រិតសម្រាំងភាពយន្តជប៉ុន ចំនួន១២រឿងមកចាក់បញ្ចាំងជូនពលរដ្ឋខ្មែរបានទស្សនា ដោយឥតគិតថ្លៃ។ ក្នុងឱកាសនោះដែរ នៅថ្ងៃសុក្រទី១០ ក៏មានសិក្ខាសាលាចែករំលែកបទពិសោធន៍ពីផលិតករដ៏ល្បីរបស់ជប៉ុន ក្នុងការផលិតកុនផងដែរ។

តំណាងក្រសួងវប្បធម៌និងវិចិត្រសិល្បៈលោក ហ៊ុយ សុជាតិ បានប្រាប់ Sabay ថា សិក្ខាសាលា ស្ដីអំពីការចែករំលែកបទពិសោធន៍ពីផលិតករដ៏ល្បីរបស់ជប៉ុន និងធ្វើឡើងនៅទីស្ដីការក្រសួងវប្បធម៌តែម្ដង។ សម្រាប់ផលិតករខ្មែរត្រូវបានអញ្ជើញឱ្យចូលរួមប្រមាណជា១០០នាក់់ ហើយចំពោះអ្នកដែលមិនបានចូលរួមអាចស្វែងរកព័ត៌មានតាម គេហទំព័រព័ត៌មានរបស់ក្រសួងវប្បធម៌បាន។ លោកបញ្ជាក់ថា ផលិតករមកពីជប៉ុន នឹងចែករំលែកបទពិសោធន៍អំពី ការស្វែងរកមូលនិធិពីមជ្ឈដ្ឋានផ្សេងៗដើម្បីផលិតរឿង ព្រមទាំងបច្ចេកទេសផលិតកុនប្រកបដោយគុណភាព និងចែករំលែកបទពិសោធន៍មួយចំនួនទៀត។

តំណាងក្រសួងវប្បធម៌ និងវិចិត្រសិល្បៈ លោក ហ៊ុយ សុជាតិ ឆ្វេងដៃ

“យើងដឹងហើយថា នៅកម្ពុជាមានផលិតករមួយចំនួនពិបាករកប្រាក់ក្នុងការផលិតភាពយន្ត ដូច្នោះសិក្ខាសាលានេះ នឹងចែករំលែកវិធីសាស្ត្រ រកប្រាក់ពីខាងក្រៅ ដើម្បីមកផលិតរឿងឱ្យកាន់តែមានគុណភាពខ្ពស់ និងផ្ដោតទៅលើបច្ចេកទេសផលិតកុនមួយចំនួនទៀត។ ខ្ញុំសង្ឃឹមថាជំនួបនេះ និងអាចជួយឱ្យផលិតករខ្មែរ កាន់តែទទួលបានបទពិសោធន៍និងចំណេះដឹងបន្ថែម ដើម្បីឱ្យវិស័យភាពយន្តនៅកម្ពុជាកាន់តែមានគុណភាពល្អ"។

មហោស្រពភាពយន្តជប៉ុនត្រូវបានប្រារព្ធឡើងជារៀងរាល់ឆ្នាំ ដោយមានការសហការរវាង មូលនិធិជប៉ុន ស្ថានទូតជប៉ុន ក្រសួងវប្បធម៌និងវិចិត្រសិល្បៈ និងមជ្ឈមណ្ឌលសហប្រតិបត្តិការកម្ពុជា-ជប៉ុន ។ ភាពយន្តដែលដាក់បញ្ចាំងនោះមានភាពយន្តគំនូរជីវចល ភាពយន្តបែបមនោសញ្ចេតនា ភាពយន្តឯកសារ ហើយក្នុងនោះក៏មានភាពយន្តដែលធ្លាប់ទទួលបានពានរង្វាន់ផងដែរ។

មហោស្រពភាពយន្តជប៉ុនចាប់ផ្ដើមតាំងពីឆ្នាំ២០១៥មក ក្នុងគោលបំណងជំរុញការយល់ដឹងពីជីវភាពរស់នៅរបស់ប្រជាជន និងវប្បធម៌ជប៉ុន ដល់ប្រជាជនកម្ពុជា តាមរយៈការចាក់បញ្ចាំងភាពយន្ត។

មហោស្រពនេះនឹងដាក់បញ្ចាំងចាប់ពីថ្ងៃទី៩ ដល់ថ្ងៃទី១២ខែវិច្ឆិកា ឆ្នាំ២០១៧ នៅរោងភាពយន្ត Major Cineplex (AEON Mall) និងរោងភាពយន្ត Legend ទួលគោក នៅទីក្រុងភ្នំពេញ ចូលរួមដោយសេរី ។ សម្រាប់ព័ត៌មានលំអិតពីការដាក់បញ្ចាំងសូមចូលទៅកាន់ htt://kh.japanesefilmfest.org/screening-schedule/

អត្ថបទ៖ ប៉ូ សាគុន